الحلقة 14:
عند وسام :
بعد ما خرجوا وأخيرا فرحوا بزاف ، حكمت في يديها الصغار وهربت تجري بيها مبعدتها على ذاك لمكان ، من فرحتها ملاحظتش أنو كانو يراقبوهم ويتبعوهم .
وصلت لعمارة طويلة شافت معاها وقاتلها .
سهام : يلا وسام ، هذا هو المكان الي رايحين نسكنوا فيه، راني كريتو ومخبرت حتا واحد ، حتا أسامينا لازم نبدلوهم .
عملتها براسها أنها موافقة على كلامها ، تبسمت وطلعت معاها ، ل الطابق الرابع حبسو حدا باب ، جبدت المفتاح من جيبها شافت معاه بتبسيمة ومدتهولها وهي تهدر .
سهام : هاكي ، حليه نتيا .
تبسمت معاها ودات المفتاح من بين يديها ودورتو حتا تحل الباب ودخلت ، دار بسيطة فارغة من كلشي أما الدفئ الي حستوا فيها متقدرش توصفو . حضنتها حضن كبير وشكرتها بزاااف على الي عملتو .
سهام : لا شكر على واجب ، راكي كيما بنتي، أما لدرك المفاجأة لكبيرة مشفتيهاش .
فتحت عينيها فيها بمعنى واش من مفاجأة، حتا من كلمة مفاجأة مكانتش تعرف معناها . ضحكت عليها وحكمتها من يديها وسحبتها لباب في آخر الرواق غير ما فتحتو ،بانت ليها غرفة طلاءها كلو زهري و فيها دباديب و دولاب صغير وسرير صغير أبيض يشعل فوقو غلافو لبيض . تغرغرو عينيها بالدموع وهي تشوف غرفة أحلامها ، وأخيرا عرفت معنى كلمة مفاجأة . شافت فيها نظرة كلها حب وامتنان وعاودت حضنتها .
سهام : مممم خلاص يا بنتي ، من درك اي حاجة راكي حايبتها تقوليها ليا، صح اني معنديش فلوس أما نخدم ونجيبها لبنتي الصغرونة .
بالنسبة لوسام كانت الأرض ماش سايعتها تشوف فالدباديب الي قدامها وتقفز ، فجأة دق الباب ، قطع عليهم تبسيمتهم .
سهام : كملي ألعبي وشوفي الدولاب واش فيه و أنا راني جايا ، نشوف شكون على الباب يمكن الجيران جاو يرحبو بينا ، اوك ؟
وسام : هههه أوك .
فتحت الدولاب لقات فيه فساتين على كل نوع ولون فرحة بزاف وقررت تجرب واحد فيهم .، سهام الي راحت تفتح الباب وهي فرحانة فجأة ومن دون إنذار دخل فيها سكين في كرشها .
قاعدة تدور وتشوف مع روحها ف لمرايا ، وراحت تجري توريلها كيفاش جاها ، وهي تغني وتقفز ،،، ثواني وكانت حدا أبشع منظر شافتو في حياتها وأكبر صدمة الي رايحا تتلقاها و تبدللها حياتها الكل ، سهام غارقة في دمها و فوق راسها خمس رجال الواحد فيهم أضخم من الثاني ، حلت فمها من الصدمة ، والي زاد على مابيها مين شافوها تبسموا و بداو كل واحد فيهم يطلق فالرصاص على جسم سهام ، من كثرة الرصاص مقدرتش اصلا تعرف شحال من رصاصة دخلت لجسمها ، في كل رصاصة يضربوها تفقد الامل انها مازالت عايشة ، كل رصاصة تتضرب يطير من عقلها كلش حتا طاحت فالأرض .
هازوها و رجعوها ل الميتم الي جات منو ، وعملو اتصال يخبروه بالي المهمة تنفدت ، بعد كلامهم ضحكة بالقوة وقاللهم بصوت خشين وحاسم .
💀: صحيتو ، ودرك نحتاج المكان نظيف و الجثة ورموها ، منسحقش مشاكل بسبة حاجات تافهين .
: حاضر سيدي .
_______________
عند هاجر :
بعد ما عداو ليام ودخلت تقرا منير تاني رجع لخدمتو ، كان ديما يحاول يخلص بكري ويروح لمدرستها ويستناها ، كان يستنا فيها تخرج حتا جاتو وحدة .
👩: السلام عليكم موسيو منير سراجي ؟
منير : وعليكم السلام ، ايه انا هو تفضلي !
👩: جيت نكلمك برك بخصوص هاجر، قالولي الي نتا باباها وديما تستناها هنا، ستنيتك .
منير : غير الخير ؟؟
👩: لا خير خير ، حبيت نعرف برك وين كانت تقرا ، يعني مستواها ماشاالله ، منيش عارفة كيفاه نقلك مي الظاهر انو عندها نسبة ذكاء عالية .
مين قالتلو هكا ارتاح وفرح بزاااف ورد عليها بضحكة .
منير : الحمدالله ، كنت خايف عليها ، اا الصراحة هاجر فاقدة الذاكرة .. مؤقتا وانا نتولى تربيتها ، اما كلامك هذا ريحني خصوصا انها كذلك تعاني من مشكلة الكلام .
👩: اه ، ماشاالله عليها ، متبانش انها فاقدة الذاكرة ومن اهتمامك بيها تبان باباها ، أما بالنسبة للنطق عادي جدا مدرستنا تهتم بهاذ الحالات ، وراني نراقبها متخافش .
منير : شكراا بزاف آنسة ريحتيني .
👩: وزيد بزيادة درنا اجتماع و قررنا انو لازم نطلعوها فالمستوى ، يعني نقيمو مستواها جيدا ونخلوها تطلع للمتوسط عادي جدا .
منير : ااه ، مادابيا راني معاكم فالخطوة هاذي ،ونظن الي هي رايحا تفرح بزااف .
👩: انشاالله ، نستأذن منك درك .
منير : بالسلامة .
فرح وهو يشوف فيها جايا من بعيد لولهة سخايلها بنتو، تبسم وقال في قلبو أصلا نتي بنتي ... بنتي الي جابهالي ربي .. بقا دقائق يتفكر فاليوم الي شافها فيه .
