حلقة الشخصيات وشرح الاحداث : 🔥
هاجر : هي أول شخصية بديت فيها قصتي ، باباها منير وماماها توفات وخلاتها صغيرة ، رباها باباها وجداتها خديجة ، لكن تموت وهي صغيرة بسبب حادث سير مدبر . علاه وشكون قتلها ؟ 🙄مع الايام نعرفوا .🤐( ملاحظة راهي ماتت وتدفنت مكالاه تسخايلو اني رايحا نرجعها 😂) .
منير : أب هاجر ، والي انقذ وتين وتكفل بيها، الي يخدم طبيب في أشهر مستشفى ، ومع الوقت أصبح المدير بعد ما مات المدير الاول رشيد الي كان يعتبر منير كصديق وابن وخلالو كل ممتلكاتو ومن بينهم المستشفى. ( هذا رشيد تاني مارانيش رايحا نجبدو من لقبر ،غير ماكالاه تتوسوسولو😂 )
قيس : الي شفنا أنو كان صديق مقرب لهاجر الي ماتت، وقدرت تعرف منو سرو ، السر هذا هو سبب إختفاؤو ولوكان تعرفوه تفكو شيفرة لكرونيك كاملة😳👌 . وين راح و واش راه يدير ، مع الوقت تعرفوا . أهم حاجة كشفتها أنو قيس هو ولد كريمة و فؤاد ، وعندو توأم الي هي وتين ❤.
وتين : بطلة القصة ، هي هاجر الي تكفل بيها منير، الي لقاها قبل 17 سنة مرمية وكلها ضرب ومخنوقة ، فقدت ذاكرتها و النطق ، واش صرالها وشكون عمل فيها هكذا وعلاه ؟ تكتشفوه مع الأيام.❤ ( الي كشفت عليه انو هي توأم قيس يعني بنت كريمة وفؤاذ ) و تعرف آسر (آدم) بحكم تذكرت إسمو .
آسر (آدم ) : كل الي قدرنا نعرفو عليه أنو الشيطان😈 بحد ذاتوا . وعلاه ول هكذا راح تعرفو مع الوقت ، وتعذروه يمكن هو أكثر واحد تأذى في القصة.، و واش الهدف تاعو من كل هاذ التصرفات ؟🤔 ( الحاجة الي منتبهتيوش ليها ف الحلقة 9 واش صرا بين آدم والزعيم الي أطلق على روحو النار ، هل بسبة شخصية آدم الحقيقية ؟ أو دار بينهم حوار آخر ؟ )🙄
إلياس : صديق قيس الوحيد فالميتم، وبفضل قيس وخطتو تكفل بيه رجل وحقق حلمو واصبح طبيب، ودرك راهو يبحث على صاحبو قيس . ( والسؤال المطروح هنا هل خطة قيس وتفضيل انو يتكفلوا بإلياس عليه عندها علاقة بإختفاؤو ؟) 🤔
عاطف : صديق آدم الوحيد ، والي تلاقاه فالميتم قبل مايهرب. و هو الحب الأول لحياة .مع الوقت تعرفوا شخصيتوا أكثر ، ( هل يستاهل حب حياة في نظركم او لا ؟ 😟)
حياة : اكثر شخصية متدينة ،تربات فالميتم وتكفلوا بيها عائلة قدرت تغير حوايج من حياتها ودرك راهي مخطوبة لواحد اسمو هشام . ( حبها الأول عاطف ، في بالكم رايحا تولي معاه او تكمل مع هشام ؟)😰
وسام : أكثر وحدة تعذبت ، الكل تربى في ميتم لكن هي تربات في مستشفى للأمراض العقلية والي قدرنا نعرفوا من الحلقات ،أنو كاين شخص سبب في حياتها هاذي و الشخص هذا ذكر أنو عندها أخ ! ( السؤال هنا ! شكون وسام وشكون خوها، وشكون الي راح يخرجها من حالتها ؟ 🤐)
كريمة : كل الي نعرفوه عليها أنها محبوسة في قصرها، وأنو راجلها فؤاد كان مانع عليها تجيب دراري لكنها تجاهلتو لمرة وجابت توأم الي هوما قيس و وتين ( السؤال هنا : علاه منعها ؟ وعلاه قيس و وتين مراهمش معاها ) .
ملاحظة مهمة : 📢📢📍
آدم ماشي أخ وتين وقيس ، و مكانش توأم ثلاثي ف لحكاية ، هكذا باش ترتاحو😝، ودرك قولولي شكون فهمت هكذا من الأول وقدرت تتوقع الاحداث ؟❤ و واش توقعاتكم الجاية ، و وين راح قيس و واش سرو ؟ و واش هوما ليكوپل تاع لكرونيك ؟ يلا حبوباتي طلعو حلقات البارح ل 60 جام و التعليق هنا 60 باش نكمل .
