الحلقة 38:
قفزت عليها تحضن فيها من اللور وتحكي
هيا : واش يا صاحبتي ماراكيش ناوية تنقصي شوي في إبداعاتك تخلينا نوصلو ليك .
ضحكت على صحبتها وعملتلها إشارة براسها لالا .
هيا : ممم راكي حابا نعيا وانا مانيش قادرة نقرا ونتعب ،تعرفي صاحبتك فنيانة .
كتبتلها فاللوح وهي تضحك.
هاجر : مانيش عارفا علاه خرجتي طبيبة ونتي كل الوقت تحوسي تهربي من الخدمة .
هيا : ايه غلطة حياتي انا المسكينة ،مين قاتلي ماما "باغيتك طبيبة يا بنتي شكون يداويني مين نكبر" تأثرت وخديت برايها وهاكي تشوفي فيا أنا الي مرضت بسباب هاذ المهنة وماما راهي واقفة على رجليها .
هاجر : هههه ربي يحفظهالك .
هيا : ويحفظك ليا زينونتي .
قص عليهم ثلفون هيا الي صونا وريپوندات .
هيا : ألو ماما ، اا ،لالااا مانيش حابا نروح روحي وحدك .،وعلااش ديريلي هكذا ، اوووف اوكي ماما اوكي .
شافت معاها هاجر وقرات الحزن في عينيها ، كتبت فاللوحة و وراتلها .
هاجر : راكي رايحا عندو ؟
ردتلها وهي فرحانة وخايفة .
هيا : ايه، عرضتنا خالتي نبقاو ايام عندها ، وانا صراحة موليتش نرتاح تم ، نحس روحي ضعيفة بزاف مين نشوفو وهو ول على بالو .
هاجر : ربي يهنيك حبيبتي ويجي الي ينسيك فيه .
هيا : ماشكيتش ، هذا حب الصغر ،الحب الأول ومع الأسف حب من طرف واحد ، والشي الي يوجع كتر مين تكونو من نفس العايلة عرسو تحضريه وتضحكي ونتي قلبك مكوي .
هاجر : فيها خير انشاالله .
تبسمت مع صحبتها الوحيدة الي تحس بالراحة معاها حكمت في يديها ومشات يروحو يقعدو كاش ما ياكلو .
___________
عند إلياس :
بقا لثواني يشوف معاهم وهدر .
إلياس : انعم ؟ تفضلوا شكون نتوما ؟
شافو مع بعضاهم ل الزوج وجاوبو عاطف .
عاطف : معرفتنيش يا إلياس ؟
بقا يتمعن فيه ، حل عينيه وقال .
إلياس : عااطف ؟؟؟؟
عاطف : بشحموا ولحمو
قرب ليه حضنوا وسلم عليه وهو يهدر .
إلياس : ياااه شحال فرحت كي شفتك الحمدالله الي راك بخير ،
شاف مع آدم ومع عاطف بمعنى وهذا شكون .
عاطف: هذا آدم ، الي جا بيامات قليلة قبل ما تغادر الميتم .
إلياس : اه ايه شفيت عليه ، مرحبا بيكم أدخلوا الدار داركم .
دخلو وعاطف الي بقا يشوف فالدار ويتبسم ، وصلهم ل الصالة ورحب بيهم ،قعدوا كل واحد في بلاصتو ،نطق عاطف .
عاطف : ماشاالله يا خويا ، حققت حلمك وراك عايش الحمدالله .
إلياس : ايه الحمدالله صح تعبت وقريت لكن الفضل كلو يعود لقيس .
عاطف : وحنا على هاذ السبب جيناك .
نطق كاسر الصمت الي كان فيه .
آدم : فالحقيقة رحنا ل الميتم نستطلعوا على قيس ،لكن بدون جدوى ، ولتم لقينا المسؤولة الي راهي تم نسيت إسمها .
إلياس : سارة !
عاطف: ايه هي .
آدم : خبرتنا الي انت تاني جيت وحوست على معلومات تخصو وعطاتلنا نيمرو ديالك .
إلياس : اه معناها انتم الي كنتو تعيطو .
عاطف : ايه حنا مالك يا صاحبي ثقيل هكذا ، رد لوكان كاش نهار تعيطلك وحدة بالغالط راحت عليك .
إلياس : ههه الله غالب طبيعة فيا ، صراحة انا كنت نحوس على عاطف زادة ،مين سمعت الي نتا هربت من الميتم شكيت في انك عارف مكانوا .
عاطف : لالا ، من وين راح نعرف اصلا قيس اختفى ورا ما تكفل بيك هذاك السيد .
آدم : لكن حنا ،ماراناش نحوسو على قيس ، الهدف تاعي نعرف شكون هو وعلاش مكان حتا معلومة عليه فالأرشيف.
إلياس : مين نعرفو مكان قيس نعرفو الباقي .
تبسم على غباؤو وهدر مع روحو بصوت خفيف مايتسمعش .
آدم : عارف مكانوا و ما قدرت نعمل شي .
شاف معاه عاطف وقالو .
عاطف: كاش ما هدرت .
آدم : لالا ،
عاطف : لكن البنت الي .
جا راح يكمل كلاموا شاف معاه آدم شوفة خلاتو بلعها .
إلياس : أما بنت !
عاطف،: لا ولشي .
حبسو من الهدرة مين سمعوا صوت حاجة تكسرت .، ناض بزربة لناحية الصوت يجري وهو خايف عليها ، بالنسبة لعاطف وآدم مين شافوا خوفو تبعوه ،
دخل وهو متبع الصوت الي خداه ل المطبخ ولقاها حاكمة في يدها الي كلها دم و الصحن طايح فالأرض ،تخلع راح يجري يتحسس يدها ويهدر .
إلياس : راكي يخير وسام ؟ واش صرا ؟
هدرت بصوت ضعيف وعينيها معمرين بالدموع ،
وسام : سامحني طاح من يدي .
شاف معاها وتبسم .
إلياس : عادي المهم إصابتك نشوفوها .
دخلو وراه لقاوه مع طفلة يدها تسيل بالدم والفوضى معمرة المكان ، شاف لثواني مع ظهرها وشعرها الي خافي ملامح وجها وتقبض قلبوا ،حس بخوف وألم ، مين طلعت راسها زاد الاحساس ، مفهمش علاه هو تاني كان حاب يجري يشوف يدها وجرحها ،تمنى لوكان جا في بلاصة إلياس ، عينيها لخضر الي فكروه في عينين أمو ، تبسم بحرقة وكمل يشوف معاها
❤هيا❤ الشخصية الجديدة 🔥❤
