الحلقة 46:
عند هشام :
روح ل الدار كيما قاتلو ، دخل ماحسولوش استغرب ،واقيلا راهم مركزين مع حكاياتهم ، قرب يسمع فيهم ،سمع كلامها ضحك ، يتفاجأ بشخصيتها معاهم ، ومعاه كتلة سكات وحشمة ،
سميحة : صحا والي قبلو علاش هرب السيد و وجهو حمر تقول عطيتيه بونية ؟
هيا : الي قبلو ي ماما، قالي ( حبسي لخدمة عمري نصرف عليك 100 مليون فالشهر )
عليمة : يا يما ، اكيد قبلتي 100 مليون يا بنت .
هيا : ممم ، فالحقيقة عطيتو بركلة ل ...
سميحة وعليمة : ل ؟؟؟
عملتلهم بيديها اشارة لتحت .
شافو معاها بصدمة
عليمة : يا ويلي .
هيا : متخافيش خالتي ، مين راح مسكين ل السبيطار يتأكد انو مزال قادر يجيب دراري لقاني في وجهو، هكذا بينتلو بلي خدمتي صالحة .
عليمة : يا ويلي ، اسحب كلامي يا بنتي .
يسمع فيها ويضحك ، شحال يحب النسا الي يدافعوا على خدمتهم وقرايتهم واهدافهم وميغرهم حتا شي ، حم حم ودخل ، مع دخل حمارت وهبطت راسها ضحك في سرو.
عليمة : اهلا يا ولدي
راح سلم على راسها .
سميحة : وانا يا ولد .
ضحك وكمل حتا هي سلم على راسها، وتكلم.
هشام : جيتكم بخبر يفرح .
شافوا معاه في ثلاتة حتا هي .
هشام : راهو قريب العرس ، يعني راهي قابلة ،معناها يمكن السمانة الجاية العرس.
مين كمل كلامو ،يديها ورجليها بداو يرعشوا ، احساس حستو مين فقذت باباها وهاي درك راحا تفقذ الشخص الي حبتو لسنين ، هبطت راسها وعينيها غلبوها ، حاولت تمسحهم بيديها بلا مايفيقو بيها ، اصلا راهم قافزين بفرحتهم . دورت ليه بعد ما تمالكت نفسها .
هيا : ربي يكمل هشام ، لعقوبة لذرية الصالحة .
هشام : انشالله ختي .
كلمة ختي منو كملت على مابيها ، خلاتهم يقفزو ويخطو ل العرس وخرجت ،كانت في بالها واحد ما نتبه ليها ،اما هو انتبه لخروجها ، مسح على جبينو ينحي الفكرة الي في بالو وتكلم بينو وبين حالو .
هشام : علاش تقلبت ، زعما ؟ لالا هشام شاراك تهدر ، هي من بكري متحبش هاذ الأجواء.
راحت تجري جيهة الباب قفلتو دورت المفتاح وطاحت ودموعها طاحوا معاها هدرت وهي تخبط على قلبها
هيا : اااااه يا ربي اه ، يا ربي علاااااش علااااااش علاااش ، راني منحملش ،مقدرتش ومنقدرش ، يا ربي علااش حطيتلي حبو في قلبي ، يا ربي نتا علابالك الي حبي ليه صافي ، جامي درت الحيلة ،جامي خممت نفزدلو ،جامي وعلااااه علاااه ماشي انا علااااه ،يا ربي علاه الي نحبو ميحبنيش ، نستنا في كلمة من عندو ،كلمة تكفيني لكن عرسو بزااااف بزااف عليا ، راني منقدرش نزيد نمثل ونتا عارف .
كملت تبكي والبكية حصلت داخلها محبتش تخرج ، تقطع عليها النفس ووجاع في قلبها، كلش فيها يتوجع ،اول مرة تذوق ديك البكية ، مين تحبي عبد وهو مساماعش بيك أمر عادي ،لكن مين يتزوج وزيد بزيادة معروضة ل العرس مستحيل تقدر تحملو . طلقت النفس والبكية خرجت معاها صرخة سمعتها غير هي ، هدرت وهي تترجاه .
هيا : ياا ربي عشقو فضني ، فات كلشي فياا ،يا ربي راني نرقد بيه ونوض ، راني عارفة اني لازم نقبل بمكتوبك ،عارفة انك مخبيلي ما احسن عارفة عارفة ، لكني منقدرش حتا من اني ندعي يكون ليا منقدرش نحس روحي انانية ، يا ربي عاوني .
كملت تبكي وتخبط في روحها ، حتا فض بيها ، فضو دموعها ،فض جهدها فض احساسها ،فض كلشي فيها .
___________
عند آدم :
ناض وبقا يشوف في صورتها الي قدامو ، ويتكلم .
آدم : لازم تنحي الشك يا آسر ، جزء فيا يقول الي نتي ختي ويتمنى هاذ الشي والجزء الثاني رافض نتمنا متكونيش ختي نتمنا متكونيش نتي الي تعذبتي ، لوكان تكوني تعذبتي يا ختي ، والله والله وعد مني نحرق الاخضر واليابس غير على جالكي نخرج الوحش الي في داخلي غير على جالكي.،
ناض شاف مع لمراية عدل روحو لبس وخرج ، كلهم كالعادة مصطفين ، هاذ الشي ميحبوش ، في بالهم انو شخص قاسي ، اما لازم هو يبين هاذ الشي .
__________
عند إلياس :
اليوم تاع البارح كان بزاف صعيب عليه ، شوفتها وهي تتألم ،خلاه يتوجع ، شوفتها على ديك الحافة خلاتو يحب يكون في بلاصتها ،يتأذى هو وهي لالا. راح طل عليها طبطب ودخل مين سمع الإذن ،قرب ليها وهي تشوف فالأرض .حط يديه فوق يديها انتبهتلو ، الشي الي خلاه يزيد يهبل ، ساعات تغوص في أحلام اليقظة ،يحب يدخل يشوف واش في راسها ، حركتها البارح خلاتو ميغيبش عليها كل شوي يجي يفاكر فيها ، ونفس الشي يلقاها غايسة .
إلياس : صباح الخير .
شافت معاه بعينيها الذابلين .
وسام: صباح النور .
إلياس : تعرفي حاجة ؟
شافت معاه تستنا فيه يكمل .
إلياس : المجنون الحقيقي هو الي دخلك في ذاك السبيطار وسام ماشي نتيا ،
هبطت راسها تتفادى نظراتو .
إلياس : ونظن بلي انا تاني راح نجن .
