الحلقة 70:
وسام : أوعدني متخلينيش وحدي ،وأنك تخلص هاذ الشي الكل بدون ما تتأذى.
آسر : وعد ، لكن نتي تبقاي مع إلياس ، وانا ناخد ب ثارنا لزوج ، حتا انا نخاف عليكي ، ومين يخلاص كلشي ،نجي ندي ختي ونجيبها تعيش معايا .
تبسمت وقالتلو .
وسام : و وتين ؟
آسر: مالها.
وسام : راني عارفة انك تحبها ، نظراتك ليها غير.
تنهد من قلبو وقال .
آسر : ندفن حبي ،في قلبي ، هي معندها حتا ذنب لكن بوها ، بوها هو سباب كلشي ، ومن سابع المستحيلات أني نعديهالو .
____________
جا نهار جديد ، كل واحد فيهم يخمم في واش صرا ،
______
عند حياة الي فرحانة ، اليوم عرسها من الشخص الي حبتو ، لابسة لاغوب ودور بيها ، وتحمد في ربي وتشكرو ، دخل عليه ،حتا من هو كان تحفة ، شاف معاها وتبسم ، وفي داخلو حاجة تحركت فيه ، زينها اول مرة يشوفو ، قدم ليها باسها من راسها بحنانة وقاللها .
عاطف: يلاه يا لعروسة.
مدلها يدو حكمت فيه ، وخرجو ، خرجت تحت ذراع باباها الي كان يشوف في بنتو الي كبرت ويضحك ، أهم حاجة بالنسبة ليه انها تكون مهنية وفرحان. قدم لوذنيها وقال .
صلاح: متنسايش يا بنتي أنو عندك ديما دار تجي ليها ، وسند ليك و مدامني عايش حاجة ماتحتاجيها ، باستلو راسو وشكرتو من قلبها ، دورت تشوف مع ماماها الي كانت شابعة بكا ،شي من فرحتها وشي من فراقها ، قدمت حتا هي ليها حضنتها وباستها ، قاعد يشوف فيها كيفاش تودع في أهلها ، في لحظة غاضتو ونسا انتقامو ، لكنو فطن وتبسم بشر بينو وبين روحو .
خرجها على الزغاريت ، و الكورتاج ، مقلبين الدنيا رايحين ل الصالة ، نصف ساعة كانو وصلو وهبطها معاه وهي مغطية بالبرنوس ، يحوس عليه بعينيه لقاه واقف من بعيد ، ويشوف مصدوم . تبسم وقال في قلبو .
عاطف: واخيرا رجعتلك الضربة ضربتين . الاولى فزدتلك زواجك و الثانية خديتها من بين يديك وفي فترة قليلة .
______
عند هشام :
صدر روحو ل العرس الي راهو معروض ليه كاره، شاف معاها لقاها جابتلو بدلتو وحدتهالو ، تبسم وشكرها .
هيا: تعمن العرس؟
هشام : والله ولد الضابط الي يشرف علينا ، لازم نروح ماجاياش وهو بنفسو عرضني .
تبسمت معاه وقاتلو .
هيا : انتبه على حالك.
هشام : نتي تاني ،
خرجت مخليتو يلبس ، وراحت لبيتها تشوف مع السرير الي باقي كيما راه ، تبسمت بقهرة وقالت ،
هيا: واش كنتي حاسبة يا هيا ؟ من غيرتو عليك البارح راح ينساها في ليلة ويجي عندك ؟
سمعت صوتو وهو يخبرها انو خارج ،واذا تحتاج حاجة في طريقو . جاوبتو ب لا ، سمعت الباب ، ناضت حتا هي كاش ما طيب وتشوف هاذ الدار الي ماشي ليها .
وصل ل العرس ، سلم على حليم وبقا برا ، غير ما وصل الكورتاج وخرجو ، شاف معاه حاكم في عروستو ، بنظرة وحدة قدر يميز مشيتها بالرغم من انها مغطية ب برنوس ، حبس في بلاصتو ، مين شاف باباها و امها تأكد ،من شكوكو لكن عقلو يقلو لالا ، شاف مع عاطف الي حتا هو كان يشوف معاه ويتبسم بشر ، وهكذا تذكر كلامو ، والشي الي صرا ، لكن كلامها هي منافي لواش صاري ، رعش وتقدم ناحيتو ، وتكلم بصوت مسموع.
هشام : بالبراكة عليك ، لعقوبة ل الذرية الصالحة.
تبسم بسخرية وردلو .
عاطف: ونتا زادا .
صوتو خلاها ترعش ، شافت معاه مطلعة راسها ، ويا ريتها ماشافت ، هشام واقف ويتبسم معاها تبسيمة كلها اشمئزاز وقرف ، للحظة حست روحها ضعيفة .
هشام : مبروك حياة ، نتمنا يكون كيما حابتو .
جاوبتو
حياة : تعيش .
حكم يديها بقوة وتجاوزو ،وهو يجر فيها ل داخل ، مع جو العرس وكلشي نسات الشي الي صرا ، رقصو معاها وفرحتو ،خلاتها ترتاح .أما هشام ، راح ديراكت ل الدار ، وقرر بينو وبين روحو يطوي صفحتها نهائيا ، اصلا راهو طواها في لحظة تخليها عليه يوم عرسهم ، بالنسبة ليه الحب مين تدخل الخيانة فيه ، او تفضيل النفس ، يمحيه من قلبو وكأنو مكانش،كاين ، الحب اهتمام تفهم مراعاة ، حنانة ،تضحيات ، حتا لوكان مكانش حب ،مين يكونو هاذ لحوايج ، يخلوه يظهر في قلبك غصب عليك.
_______
عند إلياس و آسر :
جالسين حتى هوما يشوفو في عاطف .
إلياس : ايه يا صاحبي مازلنا حنا برك.
رد عليه بعدم مبالاة.
آسر : كاش أخبار على وتين ؟
إلياس : لا .
جا راح يرد عليه قاطعو تلفونو الي صونا ، شاف مع الرقم الغريب والميساج الي دخل ، قراه ،يتمعن فيه ،
رجع هاتفو لجيبو وبقا يخمم.
مين خلص العرس ، كل واحد راح لدارو .
_________
