الحلقة 6 :
عند منير :
بعد ما بكر لخدمتو ، اليوم عندو بزاف مرضى ، إحساس من بداية اليوم يجيه ،احساس خوف ألم ،مفهمش واشبيه فجأة جات في بالو صغرونتو هاجر ، عيط ليماه يسقسيها إذا رجعت ول لالا .
منير : ألو يما .
خديجة : أنعم أولدي
منير : يما ، هاجر رجعت من المدرسة .
خديجة : ايه يا ولدي راهي تطيب ف لغدا ،تحب نجوزهالك .
منير : تطيب ف لغدا ؟ يما علاش طاوعيها هكا راهي صغيرة قادرة تحرق روحها .
سمعتو ردت عليه .
هاجر : مانيش صغيرة بابا واصلا يما راهي فوق راسي .متخافش .
حاولت تهديه شويا اما مطاوعوش قلبو وقاللها .
منير : مدي الثيليفون ليماك أبنتي .
هاجر : همممم اووك .
دورت لجداها وعطاتلها الثيليفون وهي مشنفة علابالها درك يقنعها وتمنعها .
خديجة : خلاص يا ولدي ،درك نقلها تعمل حاجة خلاف ، اصلا راهو قريب يوجد ، ودرك خبرني نتا مازلت باش تجي ؟
منير : لالا يما ها راني فالطريق جاي .
قفل الخط بعد ما ارتاح كي سمع صوتها، اما نفس الاحساس يعاود يجيه يتكمش في بلاصتو من فكرة انو تصرالها كاش حاجة .
___________
وقف قدام الباب لكبير وتبسم بشر مع دخل ،ڨابلتو حاطة يديها على خصرها .
فتيحة : أهيييه يا سيد ، عندنا شاعة وحنا نسناو فيك درك وين جيت .
شااف معاها شوفة و تبسيمتو رجعت نار شاعلة ، رجعت لورا بخطوة و هبطت يديها بشويا ،عدلت من روحها وهدرت .
فتيحة : تفضل .
دخل متجاهلها أصلا آخر همو هي ، جا لهاذ لبلاصة يخلص مهمتو الي رايحا تغير حياتو ويروح ، كل ما يخطو خطوة يلقاهم يشوفو معاه وكاريزما تاعو مالية لمكان ، حتا انو كاين بنات تخباو ورا بنات خلاف وكاين الي غادر المكان ، تبسم بسخرية و كل تفكيرو يلقا الهدف الي جا علاجالو ، فجأة حبستو يد تمدت قدامو، شاف مع يدو وطلع راسو لوجهو .
عاطف : مرحبا بيك معانا ، انا عاطف .
استغرب واشمن وجه يجي يمدلو يدو باش يخمس عليه و واش من وجه عندو يقاطع طريقو ، تحرك كمل طريقو وكأنو مكانش كاين أصلا تعداه وراح يستكشف ف الدنيا .
جات تجري جيهتو وتكلمت .
حياة : هممم عاطف مديرش عليه اصلا راهو يخوف .
تبسم وهو مزال يشوف مع ظهرو وقاللها .
عاطف : بالعكس راني حاسة انا وهو راح نكونو أعز أصدقاء .
تقدم للبيوت وهو يحفض في كل شبر ، دخل ل البيت لكبيرة و جاتو صدمة، رجع بزربة للخلف و دور للبيت لخرا جا يدخل ، قاطعو بكلامو .
قيس : هاذيك غرفة لبنات ، و هاذي غرفة الذكور .
دور براسو لجيهتو وبقا يشوف معاه ثواني ، لأول مرة فحياتو يحس بشعور خوف و استغراب ، شاف معاه من فوق ل لتحت وتكلم .
أدم : ممم مرسي ، أما شاراك دير تم .
مفهمش عليه الشي الي زاد استغرب منو ، كان رايح ينطق يكمل يسقسيه أما صوت إلياس قاطعو .
إلياس : قيييس يااا قيس .
دور لجيهة الصوت لقا ولد جاي صوبهم وقف لثواني وهو يشوف معاهم لزوج و تبسم ودخل ل الغرفة .
إلياس : شكون هذا ؟؟؟ يخوف .
جاوبو وهو يشوف في خيالو كيف دخل لداخل وسؤال يدور في راسو ، هدر كلمة بصوت واطي
قيس : شافني ؟
إلياس : اه وشنو ؟ علي صوتك راك عارفني طرش منسمعش مليح .
قيس : اه الياس من وكتاه راك هنا .
الياس : تحكي صح ؟
قيس : اه والو ، هايا هيا نفهمك فالدرس .
جاوبو بفرح كبيييير .
الياس : حاضر معلمي .
تبسم عليه وجبد الكراس وبقا يفهم فيه في كل صغيرة وكبيرة ، ومن الحظ الجيد أنو الياس راسو خفيف ول كان راح يلقى صعوبة كبيرة مع الخدمة الي عليهم و قرايتو هو .
خلصو الدراسة الي كانت اصلا بالسرقة على لولاد لخرين وعلى فتيحة ، عارفين انها لوكان تفيق بيهم تعاقبهم وتحرم انهم يشوفو بعض ، لكن تحسن الياس خلاهم يريسكيو .
____________
راح لغرفة مكتبها ودق الباب زوج مرات، بعد دقيقتين جاه الرد .
فتيحة : تفضل .
دخل من الباب لقا لون وجها تبدل وراح الوان في ألوان قالتلو وصوتها يرعش .
فتيحة : شكووون سمحلك تجي لهاذ الممر ، م ممنوع منعا باتا تدخلو هنا .
شاف معاها بتقزز وجاوب بكل صرامة .
آدم : مارانيش ميت عليك ، حبيت نعرف برك بلاصتي ، فالغرفة .
رتاحت بعد كلامو وردت بعجرفة .
فتيحة : ايييه رقم سريرك 8 وماذابيك مرة خلاف تحب تسقسي حاجة تستناني حتا نهبط .
تبسم وخرج مقاللهاش اصلا كلمة حاضر او اي شي من الي هي متعودة عليه ، نظرتو الي كلها تحدي وشر خلاتها هي الي تخاف وهي الي متعودة انو الكل يخاف منها ، ماشي فالممر ويشوف ف السقف وساعات ف لكوانات ، اصلا كان الهدف تاعو من انو يطلع لمكتبها يراقب كاميرات المراقبة ويحفظ المكتب .
