الحلقة 45:
هشام : وعلاه نطلقوا ، راني خبرتك شفتو بعيني في مكانهم.
شاف معاه لثواني ،راح ل الدولاب وفكو ،خرج من الصورة ومدهالو . وهو يتكلم .
حليم : هذاك ولدي عاطف .
الصدمة الي فيه مقدرش يخبيها . رد عليه باستغراب .
هشام : ولدك ؟
حليم : ايه ، ولدي الي ستغنيت عليه وحطيتو فدار الايتام بسباب خدمتي ، ولدي الي طول حياتي نعاني بسبابو ، من جيهة خايف عليه من خدمتي ومن جيهة خايف عليه من الشي الي حطيتو فيه .
هشام : لكن .. شفتو قتلك.
حليم : متخممش بزاف حتا وجودو تم مدروس ، وراهو في صالحنا وصالحوا.
هشام : اذا هكذا اوك ، انا نخليك .
حليم : لكن ولدي ونعرفوا ، اتوله منو هاذ ليام مراحش يعديهالك بالساهل .
هشام : هههه معندو ما يدير
__________
عند حياة :
راحت عند ماماها .
حياة : صباح الخير أحلى أم فالدنيا .
صليحة: صباح النور ا بنتي .راكي فرحانة اليوم .
حياة : لا ، مرتاحة برك ، واقيلا نعيط ل هشام نقلو يحدد موعد العرس .
ناضت تشوف معاها وتهدر .
صليحة : صح ؟ من جدك تحكي ؟
حياة : ايه
ضربتها بزغروتة سمعت الجيران بيها ، مع صوتهم دخل يجري عندهم .
صلاح : شا كاين ؟؟؟؟
صليحة: بنتك هداها ربي وراهي رايحا تتزوج .
حياة : أكيد بعد ما توافق بابا .
صلاح: يااا بنتي إذا بغيتي نديرو العرس اليوم .
شافت معاه وهدرت .
حياة : راك كاره مني وعلاااش اليوم مازالني حابا نبقا معاكم .
صلاح : انا نكره من بنتي ؟ لالا راني حاب نفرح بيكي ، شحال ستنيتو هاذ النهار الي نخرجك فيه تحت ذراعي .
تبسمت معاهم وقالت بصوت حزين .
حياة : ربي يخليكم ليا .
صلاح : ويخليك ابنتي ، فرحتي هشام ؟؟؟
حياة : لالا ، لكن درك شويا نهدرلو ونعيط لطاطا عليمة تاني نخبرها ، قالي هشام خالتو راها تم ، هكذا هوما تاني يفرحوا واذا قرر يحط الموعد قريب يعاونوها .
صلاح : ايه هشام راح يطير من الفرحة .
صليحة: ربي يحفظكم لبعض ويسهللكم انشالله ونشوف وليداتكم .
حياة : انشالله ماما .
_________
عند هشام :
بعد ما خلص شغلو ، وهو يخمم في كلام حليم ، زعما يجي نهار الي هو تاني يخاف على ولادو ، اتفكر انو محطش الطلب باش ينقل لقسم آخر ، خبط على جبهتو وكمل ، جاتو هدرت عاطف في راسو . ( راااح ندمك ، راح ندمك على عملتك هادي ، غير استناني .)
كلامو خلاه يخاف لسبب انو علابالو عندو يد في العصابات ، خايف يوصل لأهلو ، زفر بالقوة وقال ،
هشام : إذا كنت راجل ارواح عندي انا .
وصل ل الدار ،دخل فيها كانت كلها بالأثاث الي خيرتو هي ، خلاها تختار براحتها ،مشا فيها لثواني وهو يسخايل كيفاش راحا تكون حياتو معاها ، حايب يشوفها بلا جلبابها يشوف حركاتها ، يشوفها تطبخ تغسل تمسح ،تجود تقري ولادو تربي تفهم ، تتناقش معاه ، حتا من المشاكل الزوجية راهو متحمس ليهم معاها هي راهو حاب يعيش الحياة الزوجية كيما راهي . بدون تصنع وبكل حب وعشق . دخل لبيتهم وتبسم ، قعد فوق السرير وبقا يخمم فيها، مع تخمامو صونا ثلفونو وكان اسمها .ضحك وجاوب .
هشام : عمرك طويل حياة .
حياة : واقيلا كنت تخمم .
هشام : ايه تعرفي وين راني ؟
حياة : وين؟
هشام : في دارنا
حياة : ممم انشالله ، وكتاه ناوي على العرس .
حل عينيه تقعد وقاللها .
هشام : كيفاش ؟ عاودي كلامك .
حياة : ممم يعني راني قابلة ، وكتاه حايب نديروه نديروه .
قفز من بلاصتو وهو حاكم الفرحة ، هدر والفرحة ماش سايعتو .
هشام : تحبي دركا ،دركا معنديش مشكل .
حياة : هشااام .
هشام : هههه ماراكيش عارفة قداه فرحتيني .
حياة : ممم مين توصل لداركم راني نعيط لماماك نحكي معاها .
هشام : ايه عيطي ،.
حياة : ودركا نخليك ، وروح ل الدار متبقاش تم بزاف .
هشام : ايه اصلا راني جيعان .
حياة : بالسلامة .
قفل عليها وبقا رايح جاي وعينيه يبرقو من الفرحة .
___________
عند هيا :
بعد ما وصلهم وراح ، دخلو سلمو على خالتها وبداو يعاونو فيها .
عليمة : بنتي هيا وكتاش نفرحو بيك هذاك هو ، تشرطتي بزاف الي يجي ترفضيه .
تبسمت معاها من فوق قلبها وقاتلها .
هيا : كي يجي المكتوب يا خالتي .
عليمة : انشالله يا بنتي ، نتي الف واحد يتمناك طبيبة الله يبارك وزينونة وين يلقاو كيفك .
ضحكت وقالت
هيا : شفتي يا خالتي ومين نتشرط يقولو كيفاش .
نطقت ماماها .
سميحة : يا بنتي نتي ماراكيش تشرطي نتي راكي تهربي فيهم . كيما آخر واحد جاها يا عليمة ختي خدام وعندو صوارد ومقبول والاخلاق .
هيا : تقاشرو معجبونيش الصراحة .
شافو معاها لزوج .
سميحة وعليمة : تقاشرو ؟
هيا : ايه لابس تقاشر ملونين مع الصباط يا يما وجاي يخطب نظن هذا سبب وجيه لالا ؟
_______
