الحلقة 60:
عند هشام :
لابس بدلتو الي زايدة فيه النص ،ناقصتو عروستو ويكون متكامل ، شاف مع روحو فلمراية برضا ، احساس بالخوف تملكو من اول النهار ،محبش يدقق فيه ، خرج لبرا لقا باباه عارض كل صحابو وفاميلتهم حتا من الضباط جاو وكل حد يخدم معاه ، الضابط حليم زادا ، سلم عليهم وباركولو ، والزغاريت مالية الدار .
______
عند هيا :
الي كانت تبكي في بيتها ومع كل زغروتة تزيد في بكاها ،حاسا روحها تتقطع ، عدلت روحها بالسيف عليها ولبست لاغوب الغوز تاعها . دخلت ماماها عليها .
سميحة : بسمالله على بنتي الزينة ، تقول نتي لعروسة ماشالله ماشالله.
شافت معاها بتبسيمة وهي حاكمة دموعها، دخلت عليهم عليمة الي فرحت وهي تشوف في بنت ختها وقاتلها .
عليمة : يشهد ربي اني تمنيتك عروستي لكن ربي يمكن مخبيلك ما خير .
سميحة : يلا نروحو نجيبو لعروسة هذاك هو .
خرجو عند المعروضين ، طاحت عينها عليه لابس الاسود زاد فيه النص ، طلعت راسها تدعي ربي لآخر مرة ، هبطو دموعها وركبت فالطاكسي ، وديمارا لكورتاج لدار لعروسة .
مين وصلو هبطت عليمة وسميحة وعليم وهشام وصحابو و هيا ، طلعو ل دار حياة ودخلو ل الصالة ،وين رحب بيهم صلاح وصليحة .
صليحة : روح يا ولدي راهي فالبيت خرجها .
راح بخطوات ثقال ، وهي تشوف معاه ومتمنية تصير معجزة . قدم ل الباب طبطب ودخل ، شافها ب لاغوب بلونش الي زادت فيها النص ، تبسم وقرب ليها .
هشام: مبروك علينا يا لعروسة .
شافت معاه شوفات وفي عينيها دموع . دموع خلاتو يرعش ويعرف انهم ماش بسباب وداع والديها او فرحتها . بعد عليها سند على كرسي كان تم وقاللها بصوت تاعب.
هشام: ماراكيش باغيا ؟؟
شافت معاه ودموعها زادو .
هشام: قولي متخافيش .
عملتلو براسها ايه. الشي الي خلاه ميقدرش يوقف كتر وقعد فالكرسي الي جنبها ،
هشام: والسبب،؟ و وعلاش ستنيتي لهاذ اللحظة .
حياة : سامحني ، مقدرتش نواجهك ، انا من صغري نحب حد ،ونتا عارف الحب كيف يكون ، لكن والله والله إذا درك تقوليلي يلا معايا ،ندفنو في قلبي ونكمل معاك .
شاف معاها بضحكة ، بقا غير يضحك جملتها خلاتو يهبل ، راهي عارفة انو ميخليهاش تروح بسيف عليها ، ميزوجش بيها بسيف عليها وفي قلبها حد تاني ، حكا بصوت فيه بحة بكا .
هشام،: من اليوم ، ما نعرف ماتعرفيني يا بنت الناس ، في هاذ اليوم راكي خسرتي واحد كان قادر يحرق الدنيا على جالك ، وروحي راكي حرة في حياتك .
كلماتو زادت على مابيها ، عارفتو مليح انو راح يحكي هكذا ، عارفة انها خسرت راجل لكنها ولأول مرة تبع قلبها صحيح الوقت ماش مناسب لكن معندها ما دير ، جا خارج ، تذكر العرس و باباه وصحابو والعايلة حس بالصدمة كيفاش راح يقابلهم و واش يقوللهم ، حكمتو من يدو وقاتلو .
حياة : درك نلبس ونعملو العرس كي شغل شي ما صرا ، منبعدها كل واحد يروح في طريقو .
ضحك ضحكة وخزر فيها بقرف ،وكانت هاذي اول مرة يشوفها بطريقة خلاف ،وكأنو ربي نزع حبها من قلبو ضربة خطرة ، خبرها وهو مبعد عليها.
هشام : منسحق منك والو ،مشكلتي انا نحلها.
خرج عيط على أمو و خالتو ويماها وباباها وباباه .
الي جاو ل الغرفة مافاهمين والو ،غير انهم لقاو حياة تبكي ، شاف معاهم الكل وقاللهم.
هشام: عمي بنتك قررت انها ماتتزوجش ،وهذا من حقها .
شافو معاها الكل يستوعبو فواش قاعد يهدر ، عليمة الي جاتها الدوخة وسميحة الي حكمت فيها ،
صلاح : سامحنا يا ولدي.
هشام : السماح ،
عليم : لكن كيفاش ؟؟؟ والعرس و الناس رايحين نتبهدلو .
هشام: جيبو هيا.
شاف الكل مع بعضاهم وقالو بصوت واحد .
: كيفاش ؟
هشام : ياك كنتو باغيين نتزوج ب هيا ، جيبوها ، خلونا نغطيو هاذ التبهديلة .
راحت سميحة عيطت ليها ، مين دخلت ل الغرفة ما فهمت شي . لقات الكل يبكي ومصدوم وحتا من لعروسة نازعة روبتها، تقدم عاطف قرب ليها ويقول .
هشام: علابالي انك تحلمي بحوايج خلاف ، أول مرة راح نطلب منك حاجة يا بنت خالتي ،
شافت معاه بإستغراب وخلاتو يكمل هدرتو .
هشام: نتمنى تنقذيني من هاذ التبهديلة وتلبسي لاغوب وتكوني في بلاصة لعروسة وتقبلي بيا .
بقات للحظات تستوعب فالشي الي قالو وتشوف معاهم .
هيا : ههه كيفاش ؟؟؟
هشام : تعيشي هيا ، لمدة صغيرة من بعدها إذا بغيتي نطلقو وكل واحد يمشي فحالو .
قدمت ليها عليمة وقاتلها .
عليمة،: تعيشي بنتي .
شافت مع ماماها الي عملتلها براسها ايه انها توافق وتكلمت.
هيا : أخرجوا ، خلوني نلبس لاغوب .
تبسمولها كامل وهو شاف معاها نظرة ، لأول مرة يشوف ليها كشخص واعي كشخص أنقد سمعتو ،تبسم معاها بإمتنان وخرج مخليها تلبس . شافت بدورها مع لاغوب بلونش الي كانت ماش من ذوقها ، ول البيت كانت بيتها ، الشي الوحيد الي كانت تتمناه هو ، للحظة حست انو ربي استجاب لدعاءها ، لكن كلمة الطلاق خلاتها تدمع ، لبست لاغوب الي من حسن الحظ جات قدها ،سمعت دق فالباب ، ودخلت حياة وهي تتبسم معاها .
حياة : شكرا بزاف ، حبيت نقلك انك تستاهلي ما خير ، تستاهلي عرس كبير بذوقك وبالشخص الي اختارو قلبك ، سامحيني راني حاسة روحي انانية لكن القلب واش يدير ، نتمنا تحافظي على هشام .
قاطعتها بنبرة غضب وهي تقول .
هيا : آخر مرة يجي اسمو على لسانك ،كمية القهر الي شفتو في عينيه طول حياتي مشفتوش ،العجز الي كان فيه راح يجي يوم وتحسي بيه ،ديري في بالك انو الدنيا دور ،وحاجة ما دوم ، ودرك تبقاي على خير وبعدي تماما على عايلتنا .
