الحلقة 52:
إلياس : عجبتني لكن عندي ليك خدمة ،نسحقك تركزي فيها .
وسام : الي هي ؟ لقيت كاش شي على قيس ؟
جاوبها وبدا يحكيلها فالأحداث .
وسام : وتين ؟ راني باغيا نشوفها هاذ الطفلة .
إلياس : مين تخرج النتيجة تاع الاختبار اذا خرجت ايجابية ناخدك تشوفيها .
وسام : لالا ، نشوفها غدوة مين تروح تجيب النتيجة .
إلياس : حاضر يا سيدي .
وسام : وعلاش ما جبتش الي اسمها هاجر جنب ديك اللمرة وشوف ردة فعلها .
إلياس : خممت فيها ، لكن صحة لمرة لا تسمح ولازم نتأكد من هاذ الشي ، خصوصا انها قالت بفمها الي بنتها ماتت.
وسام : هدرتها بحزن ؟
إلياس : ايه حزن كبير .
وسام : صحا قلي مكانش عند قيس شي نقدرو نميزوه بيه .
إلياس : كيما واش ؟
وسام : علامة مثلا ، مين تشوفها تعرفو .
إلياس : اه كان في ظهرو وحمة ، وحمة على شكل تاج ، وكان ميحبش يبدل حدانا بسبابها، يعني أنا لاحظتها مرة
وسام : ممم اوك
__________
عند وتين :
بعد ماخرجت من البيرو تاع باباها ، مشات شويا فالسبيطار شافت باب محروسة برجال ، عداتها ، مين عداتها جاها فضول واحساس تعرف شكون هاذ الشخصية ، تقدمت ل الباب جات داخلة حبسوها دوك الرجال.
: ممنوع الدخول آنسة .
عملتلهم بيدها ل الكاغط تاعها بمعنى أنها طبيبة هنا .
: نعتذرو منك لكن الأوامر هكذا ، مسموح غير ل الطبيب إلياس بالدخول .
تبسمت معاهم وراحت محبتش تزيد تانسيسثي أصلا فضولها و الاحساس الي فيها فقط الي خلاها تحاول تدخل ، كالعادة كانت ماشيا حتا تقفز تحضنها .
هيا : وييينك يا صغرونة هذا زعما الي مبغيتيش تخليني وحدي .
كتبتلها فاللوح .
هاجر : سامحيني .
هيا : عادي حبيبتي . هذاك هو يلاه نروحو وقتنا خلاص .
تبسمت معاها وراحو بدلو قشهم وتوجهو ل الخارج ، توقفت لدقيقة وكتبتلها .
هاجر : سامحيني ، اليوم مانيش راجعة ل الدار .
هيا : عادي حبيبتي براحتك مرة خلاف انشالله.
ودعتها ، ورجعت كتبتلو ميساج .
هاجر : راك قاعد ؟ واش رايك نتلقاو اليوم ونتطمن على جرحك ؟
___________
عند آدم :
قاعد مع حليم حتا وصلو ميساج منها ، حلو وتبسم وردلها .
آدم : أكيد ، نص ساعة ونكون عندك فالسبيطار .
شاف تبسيمتو حتا هو فرح وقالو .
حليم : الطاهر عندك شي تعملو . انا نروح برك يا ولدي تهلا في روحك وفي عاطف .
آدم : اوكي ، متخافش ولدك في امانتي .
وصلو ل الباب وهو راح ركب الطاكسي ديالو وديمارا عندها .
_________
عند هيا :
ودعت صحبتها وراحت ل الدار الي ولات بالنسبة ليها عذاب وهي تشوف فيهم يعدلو ويعملو اللازم لعرسو وهو فرحان ، وصل ل الباب مع جات تدخل خرجوا منها .
سميحة : يااه بنتي جيتي .
تبسمت معاها تبسيمة خوفتها .
عليمة : ههه يلا بنتي يلا .
هيا : واش وين ؟؟؟
حكموها من يديها ل الزوج وكركروها وهي تتعافر معاهم ، خرج وراهم يشوف فيها كيفاش تتكركر وتعيط باش يطلقوها ويضحك .قدم ليهم وهدر بصوت .
هشام : خلوها ،وعلاش راكم حابينها تجي معاكم بسيف .
سميحة : يا ولدي هاذي لوكان تخليها تحضر عرسك بطابليتها .
هشام : ههه معليش تحضر العرس بواش حبت .
هبطت راسها وبلعت غصتها .
عليمة : لالا ، عندنا غير هي في عايلتنا ولازم تبرز الجمال العائلي ،أمشي أمشي .
ضحك عليهم وكب والدنيا ماش سايعتو من الفرحة ، شاف مع تلفونو تقلق شويا عليها مراهيش تعبي عليه ،لكن قال أكيد مع أجواء العرس والتحضيرات ، حرك الطاكسي وراح ماشي بيهم موصلهم ل المول لكبير وين يلقاو الي يلزمهم ، هبطو بعد ما شكروه و وصاوه يجي ليهم.
هشام : انشالله، اصلا راني هنا برك.
هو راح وهوما دخلو ، والحاجة الي يشوفوها يبعتوها تقيسها ، وهي ماش طايقة روحها ، قررت تخرج وتخليهم وحدهم لتم ، تسلسلت برا بلا ما يفيقو وهربت ،تنفست لهوا وقعدت في كرسي لتما ، شويا هكا ،جا واحد يتبلا فيها .
: واش الزين ، عينيك هبلوني معليش تمديلي النيميرو .
سمطت فيه وناضت مين ناضت حكمها في يدها ، غير ما حكمها جاتو الدبزة لوجهو ، قابلها وعينيه شاعلين نار شاف معاها شوفة وقاللها بصوت منرڤي .
هشام : ادخلي ل نكمل عليك نتي زادا طيري تدخلي .
دمعو عينيها وهربت وهي تشوف فيه مزال يضارب معاه ، كبلو وداه معاه أكيد لمركز الشرطة ، رجعت والنشعة الي نشعهالها مازالت في بالها ، اكيد درك يخمم فيها هي الغالطة ، قاطعو تفكيرها مين جاو عندها .
سميحة : وين كنتي يا بنتي ، مالو وجهك ؟
