الحلقة 33 :
دخلت عليهم وهوما يحكو ويشوفو مع صورة هاجر ، تبسمت وطبطبت باش ينتبهوا لوجودها .
منير : اه بنتي اتفضلي .
تبسمت معاه وشافت مع آدم بتأنيب ، عملتلو إشارة بيدها وهي تأشرلو ل السرير ، تبسم معاها وقاللها .
آدم : سامحيني حضرة الدكتورة ، يلزم عليا نروح .
منير : وين تروح يا ولدي، وجرحك مبراش .
آدم : متخافوش عليا ، نروح ل الدار وراني نجيب الي يعتني بجرحي ، شكرا بزاف ليكم وسامحوني إذا كنت عبء ثقيل عليكم .
منير : حاشا يا ولدي الدار دارك في اي وقت ،ويشهد علي اني حبيتك ورتاحتلك .
تبسم معاه وشاف معاها لقاها ساكتة وتشوف فالارض ، محبش يزيد يطول وقال .
آدم : معناها انا نستأذنكم ، درك شوي يجي عاطف .
منير : براحتك سند عليا نعاونك نوصلو ل الصالة وين نستناو صاحبك .
عمل الي هدرلو عليه وتعداها وخرج مع منير ل الصالة ،أما هي بقات تشوف مع ظهرو لثواني وتخمم في نظراتو الي كل يوم تتغير ،ساعات تحسها نار تحرق الدنيا الكل. ساعات تحس فيهم حنية ،وهاذ المرة حاسة فيهم خوف ، تنهدت بقلة حيلة وراحت جلست على السرير ،تسطحت وتشم في ريحتو ،حاجة في داخلها تقلها راكي تعرفيه اتقدمي ليه يمكن يعرفك حتا هو وحلي لغز حياتك ، وحاجة أخرى تخليها تحس انو افضل شي تبعد حتا هي .
__________
عند سارة :
بعد ما وصلت ل الميتم تنهدت ودخلت ، راحت ل البيرو وقعدت تشوف لبرا ، الاطفال يلعبوا ويجريو ، تبسمت مين سخايلتو في صغرو كيفهم ، تفكرت نظراتو ليها وقالت مع روحها ،
سارة : علاش مالزمش نفرح لدقيقة ،مين لقيت واحد عاش نفس ظروفي وقادر يتقبلني وزيد قاري وناجح وعايش حياتوا قادر يخرجني من الغرقة الي راني فيها ،جات هي في ثواني دات اهتماموا الكل ،حتا انها مقالتش بسمالله ، عمل خط احمر بينهم . مين كانت تلبسلها وكلشي حستها الي هي بالذات عانات كيفهم ، لولهة حست روحها ظلمتها، هدرت بصوت واطي تسمعوا كان هي .
سارة : اه يا سارة ظروف الدنيا خلات فيك النية السيئة بالناس تسبق النية الحسنة ، بلاك نكون شخص وقح لناس بزاف اما من داخلي حتا انا انسانة عانات وتجرحت وتمرمدت بزاف ، انسانة يمكن ماش من حقها تحلم .
تنهدت وسهات شويا في باب الميتم .
__________
عند إلياس :
بعد ما تأكد الي هي نعست ،راح ل الصالة يتفرج شويا والفضول قاتلو حاب غير يعرف قصتها وشكون هي . ومن واش كانت خايفة .
-----------------
عند عاطف :
بعد ما خرج وصل الباب الدار وطبطب ، ثواني وفتحتلو هي الباب ، شاف معاها وتبسم ، ردتلو التبسيمة وعملتلو بيدها يتفضل . دخل وراح ل الصالة كيما أشرتلو لقاهم مجموعين قاعدين ، سلم عليهم وعاون آدم فالنهوض وجاو خارجين .تكلم آدم مع منير .
آدم : يعطيك الصحة عمي وبالنسبة لحكاية الشرطة وشكون عملي هكذا ماديرهاش في بالك بزاف ،اكيد نرفع قضية .
منير : ايه يا ولدي وتحتاجني في اي وقت عيطلي برك ، حتا نمرو هاجر راني مديتهولك اذا كنت مشغول عيطلها هي .
آدم : شكرا ليك وليها .
توجه معاهم ل الباب وهي بقات تشوف فيه من بعيد ، خرجوا وقفل البال وراهم ، مين قفل الباب هز روحو من كتف عاطف ،
عاطف : مالك ا خويا اتسند عليا .
آدم : نقدر نمشي ونحمل لوجاع اصلا لازم عليا نبرا في ساع .
خلاه براحتو وراح ركب يسوق وهو قاعد جنبوا ، شاف معاه لقاه ساهي وكأنو يفكر في حاكة .
آدم الي يحاول يذكر وين شافها .رجع بذاكرتو ب 18 سنة ل اللور
فلاش باك :
خرج من الميتم يمشي شويا ،شافوا ماشي من بعيد ومعاه طفلة الظاهر انها تقرا معاه ، قدم جيهتهوم يسمع فيهم واش يهدرو .
هاجر : اووك كونان خليه مرة خلاف، اما سسرك راني حابا نعرفو .
قيس : بما انك راكي تهدري عليه بزاف معناها راكي عارفتيه .
هاجر : مممم الحقيقة يااس راني عارفتوا، اما نقصد بهدرتي حابا نعرف السبب.
نهاية لفلاش باك:
حل عينيه بصدمة ،واخيرا ذكرهاا ، حكم يد عاطف بقوة وقاولو بصوت أمر .
آدم : روح ل الميتم رووح .
شاف معاه بتعجب .
عاطف: الميتم ؟
آدم : الميتم الي تلاقينا فيه ،زااارب .
آدم ( آسر) 🔥
