الحلقة 12 :
عند وسام :
مرت أيام وهي تتصرف على طبيعتها كيما وصاتها سهام ، تستنا فنتيجة على أحر من الجمر ، قاعدة تخمم كيفاش الطرق برا ، كيفاش الشجر وكيفاه الناس العاديين عايشين . كل هذا حلمها أنها تكون كيفها كيف أي بنت ، هوما أحلامهم لعبة وهي حلمها تتحرر من لقفص ، تخمم فالحلم الي جاها البارح وتتبسم وهي تقول مع روحها .
وسام : مممم زعما لوكان جا عندي خويا راح يحامي عليا ؟ راح يخرجني منا ؟
فرحت بمجرد التخمام والحلم هذاك خلى فيها أثر كبير ، قطعت سهوتها مين دخلت و وجها شاحب تخمم كيفاش تقوللها لخبر الي أكيد راح يكون كيف السكين بالنسبة ليها . شافت معاها ببراءة تستنا فيها تنطق و تهنيها من هاذ العذاب الي راهي فيه ، أما كلماتها الي هدرتهوم عكس واش كانت حابة تسمع .
سهام : سامحيني يا وسام ، مقبلوش خروجك ،مفهمتش علاااش كيييفاه يخليوك هنا وهوما شافوك تتعاملي مليح وعلى طبيعتك .
بقات دقائق تشوف معاها بعينين كلها خيبة ، طيحت المشط الي كان بين يديها و سقطت هي معاه ، مين شافتها داخت راحت ليها تجري وتبكي تفطن فيها وتطلب السماح ، عارفة أنها زرعت فيها أمل كبير وآحلام ما ينجم حد ينحيهم من راسها . على هاذي قررت بينها وبين روحها أنها خلاص تهربها وتتهنا .
___________
في جيهة خلاف دخل عليه بعد ما ستأذن يخبرو بالجديد .
: سيدي رفضنا ملفها كيما راك باغي .
شاف معاه بضحك وردلو .
💀: أحسنتم ، نسحقها تبقا في مستشفى المجانين طول حياتها متخرجش منو .و ردو بالكم عليها هاذ ليااام ، و ذكرني بإسم هاديك الطبيبة الي دفعت الملف تاعها .
: اا الطبيبة سهام .
💀: تتطرد من هذاك المستشفى مفهوم ! منحب حتا غلطة ول تعرفوا واش راح يصرا .
: حاضر سيدي .
---------------
بعد ما فطنتها بسيف و خلاتها تستوعب شويا ، بالرغم من أنها شافت دموع في عينيها إلا أنها تشجعت وقاتلها .
سهام : واش رايك نهربك من هاذ المشفى يا وسام .
شافت معاه بذبلان وردت عليها .
وسام : تكوني عملتيلي خير ، مننساهولكش طول حياتي .
سهام : معناها صدري روحك اليوم لازم نهربك .
وسام : معندي واش نصدر ، إذا راكي حايبا درك بعد نهربو .
سهام : لالا أصبري تقل الحركة شويا ونهربو ، نتلقاو بعد نص ساعة عند الباب تاع الغرفة 3 اوك ؟
وسام : اووك ، مرسي سهام خيرك مننساهش .
سهام : هاذي قوليهالي كي نخرجو انشاالله .
وسام : انشاالله .
هوما يحكو ويخططو وهو يضحك يسمع في خطتهم من جهاز تنصت زارعو في غرفتها و هاذ المرة قرر يخليهم يهربو ويحسو بالأمان والفوز ، مين تشوف الدنيا يحكمها يرجعها لنفس لبلاصة ... ضحك ضحكة شريرة وعيط لرجالو يخبرهم .
💀: بعد نص ساعة رايحين يهربو ، قريوهم لامان و تبعوهم مليح ، بلاكو يغيبو عن ناظركم .
: حاااضر سيدي .
💀: كاين حاجة أخرى ، الطبيبة الي راهي معاها نحتاجها مقتولة ب أبشع طريقة قدام عينيها .
: حااااضر .
كوپا عليهم وهو يتبسم بشر ويهدر مع روحو
💀: ماراكيش مجنونة ، أما ليوم نخليك تجني ، وخلي خوك منبعد ينقذك من روحك ههههه .
_______
دخلت لغرفة كلها دباديب و ألعاب ، فتحت لخزانة لقات ألبسة من كل الألوان ، كل لبسة وصباطها ، كانت غرفة أحلام أي بنت في عمرها ، طبطب فالباب و دخل .
منير : عجباتك ؟
شافت من جيهتها لقاتو راحت ليه وكتبت فيه جملتها .
هاجر : إيه ، بزااف شكراا .
منير: فرحتيني ، مكنتش عارف ذوقك على هاذي جبت ذوق بنتي هاجر ربي يرحمها ، المرة الجاية ناخذ برايك في كل خطوة تخصك ، اليوم حبيت نعملك مفاجأة برك .
شافت معاه وعملتلو براسها لالا وهي تضحك وتكتب .
هاجر : الظاهر أنا وهاجر ربي يرحمها عندنا بزاف أشياء مشتركين .
ضحك و فرح رد عليها .
منير : انشالله يا هاجر تتعودي على القعدة معانا ، يشهد علينا ربي حبيناك بزاف أنا وجداتك . و بعد مدة رايح نسجلك فالمدرسة، نشوفو مستواك .
كملت تكتب وتوريلو .
هاجر : انشالله ، رايحا تكون نفس مدرسة هاجر ؟
منير : لالا يا بنتي نسجلك في مدرسة قريبة ل السبيطار الي نخدم فيه هكذا نديك ونجيبك ،موافقة .
هاجر : ايه .
