الحلقة 35:
حياة : وين راك ؟
هشام : راني حدا الدار هذا وين جيت من الخدمة علاش راكي حابا تشوفيني نقلب الوجهة ؟
ضحكت بالشوي وقاتلو .
حياة : لالا نطمن عليك برك ،ياك خالتي وخالي راهم لاباس .
هشام : الحمدالله توحشوك ،ديما يسقسوني عليك وعلى حوايج خلاف .
حياة : واش هوما هاذ لحوايج ؟
تبسم وقاللها وهو يهضر كيفهم
هشام : وكتاه يا ولدي تزوجوا ، وكتاه يا ولدي تجيبولنا دراري ، ها ولدي راني عييت وغلبت جيبلي عروستي تعاوني .
ضحكت وحشمت في نفس الوقت .
حياة : راهم مهبلينك .
هشام : لالا مادابيا حتا انا ، نتي الي منعرف وكتاه ترضاي علينا .
حياة : مين يجي وقتها انشالله ،
هشام : انشاالله .
حياة : يلا انا نخليك روح تريح وسلملي عليهم بزاف .
هشام : داكوغ اتهلاي في روحك ، يبلغ ،نتي تاني سلميلي على داركم .
حياة : سلام .
____________
عند آدم وعاطف فالميتم :
آدم : ميكونش كاين نقص فيه ؟
عملتلو براسها لالا وهدرت معاه .
سارة : لالا ،كل الاولاد الي يدخلوا هنا مسجلين ،
قرب ليه عاطف وهو يحوس على اسموا ،الي لقاه وقالو .
عاطف: شوفني انا راني هنا .
شافت معاه وقاتلو .
سارة : نتا تاني كنت فهاذ الميتم .
عاطف : ايه
شاف معاها آدم بشوفة وقاللها .
آدم : واش تقصدي بهو تاني .
حركت يديها وجاوبتو وهي تهرب في عينيها .
سارة : صراحة جا واحد تاني من قبل طلب الارشيف ،
آدم : والظاهر من الارشيفات الي راهم حداي انو هو تاني ملقاش الاسم الي يحوس عليه .
شافت معاه مستغربة كيفاش عرف وقالت .
سارة : ايه ،
آدم : قيس ؟
شافوا معاه لزوج هي علامات الصدمة على وجها وعاطف مستغرب علاش يحوس على قيس ،لكن مين تفكرها وتفكر اوجه الشبه بينها وبينو تبسم وحكا معاه
عاطف: معناها مارانيش وحدي الي لاحظت الشبه.
شاف معاه بدون رد ورجع عينيه فيها وقال .
آدم : جاوبيني قيس؟.
سارة : صراحة ايه .
آدم : نقدر نعرف اسم الي يحوس عليه .
جاوبو عاطف بلا ما يرمش ونبرة الثقة في صوتو .
عاطف : اكيد إلياس .
تشوف معاهم مصدومة قدرو يجيبو ويفهمو كلش قبل ما تحكي ،شافتو يشوف معاها يستنا فيها تأكد ول تنفي .
سارة : إيه دكتور إلياس جا قبل ايام يحوس على قيس ولكن ل الاسف مكانش معلومات عليه .
عاطف : دكتور ، مممم حقق حلموا كيما كان حايب ، هذا كامل بسبة قيس ،أكيد يرجع يحوس عليه ناهيك عن الصداقة الي كانت تجمعهم .
آدم : منظنش كان هو اقرب صديق ليه .لدرجة انو مخبروش سرو و وين راح.
شاف معاها وكمل كلاموا .
آدم : معليش تعطيني رقم هاتفوا .
سارة : اكيد دقيقة .
بقات تحوس على رقموا حتا لقاتو ومدتهولو .
سارة : تفضل .
هزو عليها مركاه في تلفونو وبدا يصونيلو ،
__________
عند إلياس :
صونا ثلفونو لمرات ،لكن تجاهلو هاذ المرة محبش يرد على رقم غريب ، معندوش معارف هنا او اشخاص من غير باباه الي تكفل بيه وهو مات ربي يرحموا .
_________
أفأف بالصوت وهو يعاود يرن عليه لكن بدون جدوى .
عاطف : ميردش ؟
آدم : ايه
سارة : ادا مردش نمدلك لادغاس تاعو ؟
آدم : تكوني عملتي فيا مزية .
تبسمت وكتبتهولو في ورقة ، وقف يشوف معاها وقلبو يخبط ماراهوش عارف علاه .تردد لكنوا قرر انو يروح عندو ،حكاية انو مكانش معلومات على قيس لا اسمو لا شي خلات التوسويس يدخلو ،ولازم يستكشف واش جابو لهذاك الميتم .
