الحلقة 49 :
عند عاطف :
يقدم ليها بخطوات ،
عاطف: السلام عليكم .
ردت عليه وهي دور ومع دورتها شافتو وتحلو عينيها ، استجمعت روحها وردت والرجفة باينة من صوتها.
حياة : وعليكم السلام .
شاف ردة فعلها ولثاني مرة تحيرو .
عاطف: نظن أنو هاذي ثاني مرة نتلقاو .
تبسمت على جنب وقالت .
حياة : سامحني ، منقدرش نحكي معاك .
جات رايحا حبسها بكلاموا .
عاطف: وعلاه ؟ ماشي كنتي فالملهى هاذيك الليلة ،
دورت ليه وعينيها تعباو دموع ، للحظة حب يتراجع لكن ضربتو خلاتو يزيد يحكي .
عاطف: متفهمينيش بالغالط يا بنت الناس ، أنا من نهار شفتك ونتي في بالي ، متنحيتيش لدقيقة .
كلامو خلا قلبها يضرب بالقاوي ، خلاها تطير من الفرحة داخلها ،لكن تفكرت هشام وتفكرت كلشي و واش راهي دير ، جاوبت عليه بصوت حاد .
حياة : راني مخطوبة يا الاخ ، من الاحسن تروح ومتشوفش وراك.
قدم ليها شوي ،الشي الي خلاها تبعد ، لاحظ توترها وحشمتها وراسها الي ف الارض ،للحظة تذكر حياة الطفلة الصغيرة الي حبتو فالميتم ، تبسم ورد عليها.
عاطف: راكي قلتيها ،مخطوبة ماشي متزوجة ، وانا تاني جاي نخطب ،من الافضل تصدري روحك .
شافت معاه والصدمة في عينيها ،اخر واحد توقعت انو يجي هو ،اخر واحد توقعت انو يهدر هاذ لكلام هو ، للحظة بدات تسخايل في حياتهم ، نفضت الافكار في راسها وقالت .
حياة : عرسي السمانة الجاية من الافضل متخربهوليش .
عاطف: معليش ديريها خطبتنا السمانة الجاية، راكي سكنتي فيا من أول نظرة ومراحش نخلي حتا حد ياخدك غيري أنا ، يلا باي.
راح وخلاها مشوكيا في عمرها ، كمية البرد الي حستو لما راح خلاتها ترجف ، احساس فوق طاقتها ، تحطت حدا الاختيار الي كانت خايفة منو ، حب حياتها او خطيبها .
___________
عند إلياس :
بعد ما بعد عليهم ، بقا يخمم كيفاش كمية الشبه الي بينو وبينها واسمها ماشي كيما مذكور فالقلادة ، جبد القلادة من صدرو وشاف معاها ، "قيس وتين " معناها عندو توأمتو وراهو لقاها ، لكن الاسم ماشي كيف كيف ، تبسم وقال ،
إلياس: لازم نعرف حكايتها باش نعرف وين راه قيس، وسام راحا تفرح بزاف بهاذ التطور فلحكاية ، واكيد رايحا تقول عرفني عليها .
وصل ل الباب تاع المريضة الي كان يحرسها رجل ، منهم ومن فخامة القسم عرف انو المريضة شخصية مهمة ، ورالهم أوراقو وخبرهم انو الطبيب المسؤول ، خلاوه يدخل بعد ما عملو اتصالاتهم وسجلو دخولو ، دخل لقا امرأة نايمة فالسرير وتشوف مع السقف ، حمحم ،الشي الي خلاها تشوف معاه وتتبسم ، ردلها التبسيمة وقال .
إلياس: انا دكتور إلياس المكلف بيك .
كريمة : أهلا بيك ولدي ،
قدم ليها يتحسس حرارتها ويشوف في عينيها ، قاس نبضها وتكلم .
إلياس : الظاهر انكي تحملي روحك اكثر من طاقتها .
كريمة : الله غالب يا ولدي، الدنيا تخليك تهز جبال فوق كتفك .
إلياس : معليش ، كاش نهار هاذ الجبال يروحو يا مدام ، المهم انك متفشليش وتبقاي ديما هازتهم حتا يحلها ربي ، ادعي ربي وحدو يحلك مشاكلك .
تبسمت لكلاموا الي ريحها وقالت .
كريمة : كلامك وحدو ريحني يا ولدي ،
إلياس : مانيش عارف الى واش جوزتي يا خالتي، لكن مكانش شخص فهاذ الدنيا معداش بمحن وصعوبات . المهم اننا منفشلوش ونبقاو نواجهوا . ألوغ بلاكي تخليهم يأثروا على صحتك .
كريمة : انشاالله ، ياك مابيا والو .
إلياس : لالا ، كلشي تمام ،لكن اكيد ناخدو ليزاناليز هكذا باش نحيو الشك ، يمكن يكون عندك نقص فكاش ڤيثامينا نعوضوهم انشاالله ،
كريمة : انشالله .
طلعت يديها لزوج وجبدت قلادها وقالت .
كريمة : انشالله كلشي يتحل .
بقا لثواني مصدوم ،يشوف فالقلادة الي راهي عندها ، لاحظتو وقاطعت تفكيرو .
كريمة : ولدي راك بخير ؟
حس بدوخة جاتو ، الصدمات الي قاعد يتلقاهم بزاف عليه ، تردد وجاوبها .
إلياس : قلادتك ، من من وين جبتيها .
تبسمت معاه و جاوبتو وهي تشوف معاها .
كريمة : هاذي قلادة عايلتي ،
كمش يديه ،ضغط على سنيه وهو يحاول يستوعب كلامها ، جبد القلادة من صدرو حتا هو وقدم ليها ومدهالها .. شافت فيه وفي يدو ، تحلو عينيها وتعمرو بالدموع ،ناضت من سريرها بسرعة وتكلمت بصوت يرجف ،
كريمة : من من ويين جبتها ؟
نحاتها من يدو وبقات تشوف فيها ،حلتها قابلتها صورتهم ،تبسمت بقهرة وشافت معاه تستناه يجابوها .
إلياس : فالحقيقة ، انا صاحب قيس ، وهاذي قلادتو مين كنا صغار خبيناها ، قيس اختفى وقلادتو مزالها معايا .
قربت ليه وحضنتو وهي تحكي .
كريمة : إذا أنت إلياس الولد الصغير ، صاحب قيس ،
شاف معاها مستغرب ، وقال .
إلياس : تعرفيني ؟
كريمة : أكيد ، نعرف كلشي عليك وعلى الميتم الكل وعلى ...
شافت لثواني مع القلادة كانت راحا تقول حاجة لكن بدلت كلامها .
كريمة : على ولدي قيس، لكنو اختفى ،بلعتو الارض ولدرك راني هايمة نحوس عليه وهاذ سباب حالتي يا ولدي .
للحظة تفكر الطفلة الي شافها لتحت وشبهها لقيس .
إلياس : لكن القلادة فيها زوج ولاد ، قيس و مكتوب وتين زادة .
مع سمعت كلامو كشب لحمها وحكات بصوت حزين .
كريمة : وتين ، وتين بنتي ماتت .
