الحلقة 8:
جا الصباح وجاب معاه يوم جديد على أبطالنا الكل ، يوم رايح يغير الكثير في حياتهم .
في الميتم :
كان خارج رايح ل المدرسة حبستو بكلامها .
فتيحة : وأخيرا راحا نتهنا منك راهي جايا عايلة هاذ اليومين لازم تعدل روحك بلاك ينوب ربي ويخيروك ونتهنا منك، شاف معاها بنص عين وجاوبها .
قيس : حاضر .
كمل طريقو وهو يخمم كيفاه يخلي هاذ العايلة تتكفل بإلياس ، خاطر هاذي آخر فرصة ليه كل ما يكبرو فالعمر كل ما تقل فرصة التكفل بيهم، خمم مع روحو وهدر بينو وبين روحو .
قيس : أكيد لااازم لاازم نخليهم يتكفلوه باش يولي يقرا ويخرج طبيب كيما راهو حايب ، اما انا فراني نقرا مين نوصل ل 18 سنة نتكل على روحي .
قاطعت تخمامو وخلعتو كالعادة .
هاجر : بووووم .
نڨز من الخلعة وشاف فيها شوفة .
قيس : يا بنتي متعرفيش تجي كي الناس لازم تخلعيني .
هاجر : ههههه ايه لاززم .
قيس : مالكي فرحانة اليوم نشوف فيك !
هاجر : اييييه خاطر اليوم تحكيلي سرك و كي نخلصو نروحو نتفرجو كونان في داري اوووك ؟
شاف في كتلة الفرح الي حده ، لوهلة تمنا يكون في بلاصتها ، رد على سؤالها .
قيس : منجمش ، ميخلونيش فالميتم نتوخر ، اصلا راني نقرا بالسيف ، نعمل غلطة صغيرة منزيدش نقرا .
كملو يحكو وهوما يمشو في طريق المدرسة، ردت على هدرتو الي وجعتها .
هاجر : اووك كونان خليه مرة خلاف ، اما سسرك راني حابا نعرفو .
قيس : بما أنك راكي تهدري عليه بزاف معناها راكي عارفتيه .
هاجر : ممم الحقيقة يااس راني عارفتو ، أما نقصد بهدرتي حابا نعرف السبب .
قيس : هذاك حتا أنا ومانيش عارفو ، مي نحاول نحكيلك بلاك تساعديني مدامك ذكية وكشفتيني .
ضحكت على كلامو وحكمت في يدو وراحت تجري وتجري فيه وراها .. حتا وصلو لباب المدرسة .
_________
من جيهة فالميتم بعد ما شافو خرج وراح يقرا بقا يخمم كيفاش ينفد المهمة تاعو ، جبد المسدس الي مدهولو وبقا يشوف معاه حتا دخل عليه .
عاطف : اووو معناها مرانيش غالط .
آدم : ياااا *** علاه تدخل بلا ما طبطب .
عاطف : هههه عادي أما قلي هذا لعبة ول صح .
آدم : صح .
عاطف : هههههه أمنتك .
__________
كانت متوترة رايحا جايا فالمكتب تاعها .... عيطتلو رد عليها بسرعة .
فتيحة : ألو .. إيه إيه .. أما راني خايفة ميقبلش ، أكيد راحا نحاول بكل جهدي نخليهوم يختاروه ، أنعم أصلا كاين شخص هنا مارانيش مرتاحتلو ،على هاذي لازم نهربو قيس في أسرع وقت .
_________
عند قيس وهاجر بعد ما جات الاستراحة قعدو في بلاصة بعيدة عن الغاشي وبدا يحكيلها، وهي تسمع فيه وتتبسم .. كانت صح... من الاول عرفت كلشي .
قيس : ودركا راني حكيتلك أما يعيشك تبقا بيناتنا .
هاجر : أكييييد ، ودرك يلا للقسم مزالت ساعة ونخرجو ياك تروح معايا ؟
قيس : اه لالا مشكيتش انا نروح نجري .
هاجر : عادي نجري معاك .
قيس : لالا من الاحسن روحي وحدك .
محبتش تزيد عليه خصوصا انو درك وين كان يفضفضلها في قلبو ، تبسمت وردت عليه .
هاجر : اووك ، كيما تبغي .
__________
خلصو قرايتهم وكل واحد شد طريقو اما فجأة راحت تجري ليه عانقتو وقاتلو
هاجر : دير في بالك الي أنا ديما معاك ،أي حاجة تحتاجها خبرني برك باااي .
دور ليها لقاها راحت تجري تبسم ، ساعات عباد ما تربطك بيهم والو يكونو حنان عليك من أشخاص من دمك ولحمك او اشخاص عاشرتيهم .
بعد ما هدرتلو ذوك لكلمات حبست على جنب الطريق وعيطت لباباها تحكي معاه .
هاجر : الو بابا .
منير: اه صغرونتي خرجتي ؟
هاجر : ايه بابا راني في طريقي ل الدار.
منير : اممم اتهلاي في روحك يا بنتي .
هاجر : هههه اوك نتلقاو منبعد .
جا راح يكوپي حبستو بصوتها الدافي .
هاجر : بابا متنساش الي أنا نحبك .
بالرغم من ان كلامها يخلي أي أب يفرح أما هو بدات خلاه يحس ببرودة سرات فجسمو الكل . رد عليها من فوق قلبو .
منير : وأنا تاني نحبك بنتي .
_______
بعد ما قطعت الاتصال مع باباها كملت طريقها ل الدار وهي فرحانة كعادتها و متولهتش ل العينين الي راهي تراقب فيها ... تقدمت شويا نحو الطريق تقطع ، فجأة وبسرعة البرق وفي ثواني لقات روحها طايرة فالسما و طاحت في نص الطريق و الدم عمر المكان و الغاشي يعيط . بعد ما نفد مهمتو وضربها بالطاكسي هرب وخلاها وراه في دموماتها تعوم .
-----------
اتصال واحد من المستشفى خلاه يهبط يجري يشوف الحالة الطارئة الي راهي جايا وقلبو مراهش مطمنو ، يصوني على بنتو تهز مهزتش ،، حاول يطمن روحو بالرغم من انو الحالة الي راهي جايا بنت قد بنتو ، حادث سيارة لفتاة قد بنتو خلاه يجري يكون فالمقدمة على أمل منو أنو ينقدها .
