الحلقة 76:
راح مخليهم متوجه لعند ختو ، الي خلاها تحت الصدمة مين فاق قدامهم بعد ما حسبوه ميت ، غير ما وصل عندها تلاحت في حضنو وهي تبكي وتضرب فيه لصدرو .
وسام : حسبت مت ، حسبتك مت وخليتني وحدي .
تبسم وهو محضنها وقاللها .
آسر : خلاص ختي ، وفا الكابوس .
نطق حاير هو تاني .
إلياس: مي راني شفتها مين رمات عليك بالرصاص ، و نبضك نبضك كان حابس .
آسر : ههه قصة طويلة ، خطتلها وتين .
إلياس و هيا و وسام : وتين ؟
آسر : ايه، حقا وين راه عاطف،؟؟؟؟
صونا تلفونو ، شاف معاه لقاه حليم ، رد عليه وهو يتبسم.
آسر : ألو حليم خلااص رانا قتلناه .
رد عليه بصوت حزين
حليم : آسر ولدي، عاطف ، عاطف يحتاجك.
آسر : واشبيييه ؟؟؟ واش صرا ؟؟؟
حليم : مرتو ، مرتو توفات وهي تزيد .
غلق التلفون وراح طيارة عندو .
__________
بعد مدة كانو كلهم في جنازة حياة ، يشوفو فيه وهو فوق قبرها يبكي ، الكل يبكي ، صلاح وصليحة ، هيا ،عليمة وعليم ، سميحة ، وتين ، وسام ، حتا من إلياس دمعو عينيه ، يذكر فيها فالميتم كانت هي أكثر وحدة متربية وعاقلة وجامي قاست حد ، هشام الي كان حاكم كوانة حتا من هو مصدوم والدموع في عينيه ، قدمت ليه هيا حضنتو ،تخفف عليها ، ماشي ساهلة يموت حد ،قضيت معاه ايام وذكريات ، مهما عمل معانا وقاسنا ،يظلو ذكرياتو لملاح يجونا ، بنتها الي في حضن صليحة ، تبكي وكأنها عارفة أنو أمها تحت التراب ، قدمت ليه وهي رافدتها وحطتهالو في حجرو وقاتلو .
صليحة : لازم علينا نصبرو يا ولدي ، نصبرو ، شوف مع هاذ الملايكة ، مكانش الي راح يحويها ويعوضها فقذان امها من غيرك.
شاف معاها وتكلم بصوت مبحاح من لبكا .
عاطف: و انا ، انا شكون يحويني ويعوضني ، شكون الي يطفي ناري وجمرتي ، ياااو ظلمتها ظلمتها ومعرفتهاااااش ، كانت قدامي وبين عينيا ويديا وعرفتهااااش ، شحال تمنيت نشوفها تمنيت نتلاقاها وعلاااش نساني ربي فيها علاش .
حطت يديها عليه وتلكمت بصوت حنين .
صليحة : حياة راهي مسامحاتك يا ولدي ، على قد ما تحبك سامحاتك ، نفدلها آخر وصية ليها و اوقف على رجليك .
مسح دموعو وقلبو مكسور . رفد بنتو قربها منو ، ولأول مرة يشوف ملامحها الصغيرة ،
صليحة : عيب تخلي البنت بلا اسم.
عاطف: حياة ، اسمها حياة .
