الحلقة 5 :
هزت حوايجها ودعت باباها وجداتها وراحت ل مدرستها ، في طريقها وهي ماشية لمحتو داخل الميتم ينظف ويكنس ،بقات ثواني تشوف معاه وقلبها يوجعها على حالتو وقشو المبلول محبتش تروح بلا بيه بقات برا الميتم تستناه يخلص .
بعد ما خلص أعمالو نفض لغبار الي لسق في قشو و ودع الياس صاحبو وخرج من الباب ، فاجأتو بصوتها .
هاجر : بوووووم .
قيس : يااا يماااا
هاجر : هههههه ياااه راك تتخلع ليه ليه .
شاف فيها ووجهو حمر وزاد دور وجهو ل الميتم مكانش حايب تعرف الي هو عايش هنا .، عرفت واش راه يدور في راسو قطعت عليه تخمامو .
هاجر : مممم هايا نروحو من صباح وانا نستنا فيك تخلص هكذا رايحين نتوخرو ونتعاقبو لزوج .
قيس : وشكون قالك أستنايني .
هاجر : ندير الي نحب ، ايا قدامي عندنا اليوم الاعراب نتعلموه ياااااي شحاال راني متحمسة .
كملو يمشو ناحية مدرستهم
_________
بعد ما غابو عن العين الي مراقبتهم و تتمنا تكون في بلاصتو ، تنهد بالصوت ورجع للأعمال الي بقات ، اغسل أكنس ،طيب ، أمسح ، هاذو كامل وفوقها أقضي ..الخ .
عبا فراشو من فوق السرير وراح جيهة لبلاصة الي مجمعين فيها ، كل واحد يغسل في فراشو ، حبستو بتبسيمتها وقاتلو بصوت خافت وحشمان .
حياة : عاطف .. أ أ
عاطف : مالكي ؟
حياة : هاتو أنا نغسلو .
شاف معاها نظرة إستغراب ، في كل مرة ييأس من الدنيا هاذي تجي هي تهون عليه، عارفها شافتو يراقب في قيس ، علابالها الي هو تاني حايب يقرا وينجح، متقدرش تعاونو صحيح أما مساعدتها ليه يخلي قلبو يرتاح .
عاطف : لالا غير مكالاه .
جاتها الدمعة في عينيها ، حست الي هو نشعها برفضو ، حس عليها ورد قبل ما تبدا تبكي .
عاطف : راني حايب نعڨب الوقت ، تعيشي سمورتي .
جملتو هادي قدرت ترجع فيها الروح وتضحك من قلبها ومع كل ضحكة تبان الفوساث الي في خدها . تبسم على فرحتها وراح يكمل خدمتو .
_________
وصلو ل المدرسة وكالعادة قيس مسلمش من التعليقات و الوشوشة على قشو وحالتو ،أما تبسيمتها خلاه يرتاح مبدئيا ، على الأقل عارف أنو واحد راهو متقبلو ،وهاذ الشي معناها أنو مزال كاين ناس تربي ولادها أنهم يشوفو لجوهر الانسان قبل مظهرو ، تبسم وهو يخمم في والديها وتمنى لوكان جا قادر يعرف شكون والديه وعلاه حياتو غامضة لهاذ الدرجة،، فطن من سرحتو كي ناداتو المعلمة .
المعلمة : قيس ... قيس !!
قيس : ااه ، نعم معلمتي .
المعلمة : وين راك هايم يا ولدي ، عندي ساعة وانا نقلك اطلع تحل هاذ العملية .
شاف مع السبورة وين كان كاين عمليات قسمة و ضرب كبيرة ، بالنسبة ليه هاذ لحوايج تافهين بزاف وقادر يحلهم في دقيقة .تبسم وناض يحل وهو فرحان ، بعد ما خلصهم بسرعة شاف معاهم ومع معلمتو الي بقات دقيقة مصدومة ، كانت باغيا تديلو درس باش يركز أما حلو للعمليات خلاها تحتار خصوصا أنها درك وين قررت تبدا هاذ الدرس، فجأة سمعت تصرفيق من القسم دارت لقات هاجر تصرفق وتضحك ، مين شافها هكذاك ضحك هو تاني ورجع لبلاصتو .
المعلمة : ممتاز ولدي، والديك علموك من قبل فيهم ؟
جملتها خلاتو يرتبك ، شاف فيها وقاللها
قيس : إيه علموني .
تبسمت وكملت درسها .
هاجر : مممم علاه ما نفيتش هاذ الشي ؟ معندكش والديك من وين تعرف تحل ، ممم بلاك راك عبقري ول عالم ول كيما المحقق كونان ،صغرولك جسمك .
شاف معاها باستغراب، ردت عليه
هاجر : مالك تشوف فيا هكذا ؟
قيس : كونان !!!
هاجر : يااااه متقليش متعرفوش، كوميك
حشم وهبط يديه ، اصلا فالميتم ميخلوهمش يتفرجو ، عندهم يوم واحد برك راحة يلعبو في ساحة الميتم .
فهمت عليه ومحبتش تحرجو كتر من هكا. ، قربت لوذنو وهدرت بصوت واطي .
هاجر : امالا كاش نهار تجي عندي ل الدار ونتفرجوه مع بعض ، وزيد بزيادة تخبرني بسرك لكبير .
شاف معاها بتعجب غمزتو وضحكت ، رد عليها بنفس الصوت الواطي .
قيس : واشمن سر ؟ راكي عارفتو ياك الصباح برك وين شفتيني فالميتم.
تبسمت على بلاهتو ، كيفاش هاذ الوقت كامل مفاقش الي هي فايقة بسرو، ردت عليه وعينيها يلمعو .
هاجر : لالا ، راني نحكي على السر الثاني ، ومذابيك تخبرني السبب .
أتصدم و تحجر في بلاصتو خوفو ورعشتو قدرت تحس بيها . زادت قدمت وقالت بصوت عالي هاذ المرة .
هاجر : متخافيش ، سرك في بير .
جا يرد عليها ، جاهم صوت المعلمة .
المعلمة : قيس و هاجر ،لوكان متسكتوش مذابيكم تبدلو لبلايص .
سكتو ضربة خطر وكل واحد فيهم يخمم ، هو يخمم إذا صح كشفت سرو ،وهي تخمم واش السبب الي يخليه يعمل هاذ الشي ويعاني .
