الحلقة 51:
قدم ليها والنار شاعلة فيه ، نحا الصورة من يديها ،كمشها وقطعها وهو يشوف مع عينيها ويهدر .
إلياس : آخر مرة تدخلي في حاجة متعنيكيش فاااهمة ، مشكورة عالشي الي عملتيه ،لكن هنا وصااااي ديري روحك ماعرفتيني ما عرفتك ، و وسام خط احمر تقربي منها نمحيك ، وراكي عارفة قصدي .
شافت معاه شوفات وفهمت قصدو وردت عليه.
سارة : اوك ، معناها باي .
إلياس : بالسلامة .
مين راحت جبد المفتاح وحل الباب ،
قطع تفكيرها باب الدار كي تحلت ،راحت تجري عارفاتو هو .
شافت معاه شوفات وتبسمت .
إلياس : كنتي تستناي فيا ؟
عملتلو براسها ايه .ضحك وقال .
إلياس : حتا انا راني جيت بكري بالدمة ،وعندي ليك أخبار .
وسام : الي هوما ؟
إلياس : استناي يا طفلة ندخل ونعدل روحي ونجيك .
___________
عند آدم :
بعد ما قطع اتصالو مع عاطف تحط وقدامو الحاسوب الخاص بيه وبدا خدمتو ، بعد مدة تبسم ، وقال .
آدم : اذا سبب التأجيل ، هو ، راح يكون لتم وأخيرااا وأخيراا راح نتواجهو .
تذكر كلام عاطف ، حكم التلفون وعيطلو .
آدم : اهلا .
حليم : اهلا بولدي آسر .
آدم : معليش نتلقاو ؟
حليم : ممم نظن لكلام ماش تاع تلفون ، اكيد .
آدم : شرفني في داري .
حليم : حاضر ، نص ساعة ونكون عندك.
غلق عليه وبقا لمدة يشوف مع خيالو ، أكيد الشي الي خباه على عاطف كان في مصلحتو ، عاطف من النوع الي يفضح وميعرفش يمثل. بعد نصف ساعة رن جرس الباب ، فكولو الخدم وشاورولو انو يطلع لغرفة الوحش كيما راهم مسمينو . طلع وراح متوجه لغرفتو وكالعادة طرازها الاسود غالب ، دخل بعد ما طبطب وتبسم .
حليم : اهلا بولد صاحبي .
ناض وقف جيهتو وحضنو وهو يطبطب على ظهرو .
حليم : لوكان جا حكيم ،عايش كان راح يفتخر بيك يا ولدي .
تبسم معاه وقال
آدم : سمعت انك تلاقيت بعاطف .
حليم : ايه ، الضابط هشام قبض عليه ، تحسابلو انو من العصابة .
آدم : ياك ما بينتلو شي .
حليم : اكيد ، طلقت سراحو وبس ، مانيش حاب يعرف انو يخدم لجهة مكتب التحقيقات الفيديرالي FBI, وخصوصا انها كانت خطتك . فأكيد نخليك نتا تخبرو بصفتك قائد ل المجموعة المستكلفة في بلادنا .
آدم : ايه، حقيقة جبدت بطاقة البوليسي الخاصة بيا مين حبيت نتأكد من معلومات فالميتم ، لكنو ظنها مزيفة .
حليم : اصلا البطاقة تحمل اسمك الغير حقيقي ، اما بطاقتك الحقيقية راهي تابعة ل FBI ،رد بالك تجبدها، يا ولدي آسر ، لوكان مهربتش فذاك اليوم وجيت عندي وترجيتني انو نخليك تنتقم ، لوكان مندخلكش فهاذ الدومان ونهربك عليه ، والمشكلة دخلت ولدي معاك.
آدم: حقيقة في البداية مكنتش عارف انو ولدك ، وجذبتني شخصيتو ،لكن بعد ما عرفت حبيت يخدم معاي ،لانو الوحيد الي نقدر نوثق فيه ، ولأنو إذا عرف أكيد يفضحني بتصرفاتو ، خليتو يدرب ويواجه حوايج فوق طاقتو وهو مافيبالوش انو كان يدرب في وكر العملاء الخاصين . وهكذا تاني منسببلوش مشكل لوكان نتفضح انا فيوم من الايام ، نتفضح وحدي ونكون وفيت بوعدي ليك .
حليم : وعدك ليا انساه ، عاطف درك انسان يتخاف منو ماشي ينخاف عليه ، بعدتو ليا مين كان صغير ، وحطيتو تحت جناحك باش يعود اكثر قوة ،وهاذ الشي الي لاحظتو ،لكن الآن من الأحسن يعرف الحقيقة ،
آدم : نتم المهمة ، ونخبرو .
حليم : واشمن مهمة ؟
دور الحاسوب و ورالو .
حليم : معناها راهو جاي؟
آدم : ايه.
حليم : بالاك يا ولدي تقتلو تم.
آدم : مارانيش احمق ، صح اني مستني هاذ اللحظة بفارغ الصبر ،لكن مزااال، أول شي نعرف شخصيتو الحقيقية عارف انو راح يلبس القناع لكن أكيد نلقا زلة ليه ، رااح نخلييييه يخااف ونكشف شخصيتي لتم يبدا يرتكب فالأخطاء ،لكن موتو راح يكون أسوء من موت عايلتي .
حليم : هكذا حابك تكووون، بالنسبة لختك حاولت نعرف الاخبار لكن مكان حتا شي ،الظاهر انو مخبيها معاه .
آدم : فالحقيقة ، راهي كاينة حاجة في بالي من هاذ الجيهة ،متقلقش روحك نلقاها نلقاها .
حليم : ولدي آسر ، بعد ما تخلص من هاذ الشي الكل اوعدني انك تبعد على هاذ الشي الكل وتعيش حياة هادية انت و اختك . من صغرك دخلناك في نصهم باش تكون جاسوس كيما باباك وهذا بطلب منك ، خليناك تقتل وتنفذ متطلباتهم غير باش تكسب ثقتهم قتلت الزعيم الي كان بجوار قاتل باباك وستوليت على مكانتو ، لكن الراس لكبير راهو واعر ، رد بالك منو ، جاتنا معلومة انو عندو ولد وراه مخبيه عن كل الأنظار ، من الاحسن تتوله.
آدم : ولد ؟
حليم : ايه ، لذلك انتبه ، راهو بارع فإخفاء شخصيتو وشخصية كل حاجة متعلقة بيه .
____________
عند إلياس و وسام:
بعد ما بدل قشو ودوش خرج ، يشم في ريحة الماكلة ، لقاها تتعافر ف الكوزينة ،تشوف مع الحاجة وتخمم اذا تحطها أول لا ، وكأنها تجرب ماشي طيب ، ضحك وقاللها .
إلياس : بالاكي يا بنت الناس تعمليني فأر تجارب .
شافت معاه مبوزة شواربها كيما الدراري ،صغار قدم قعد فالطابلة وقاللها .
إلياس : يلااه مديلي ناكل راني ميت بالجوع .
وسام : دااكوغ
سرباتلو في صحن وقدمتهولو وقعدت حداه حاطا يديها على خدودها وتستنا في ردة فعلو مين يذوقو ، قدم المغرفة الفمو غير ماكلاها تصدم من الطعم ، مقدرش يكملو جا يعمل ردة فعل لقاها مقابلتو مذبلة عينيها ، بلع اللقمة بسيف وتبسم معاها وهو يتكلم .
إلياس : بزااف بزااف بنينة يعطيكي الصحة .
قفزت من الفرحة وقالت ،
وسام : صحح ؟؟؟ معناها من اليوم الماكلة عليا .
سعل وشرق مين سمع كلامها ، وقال .
إلياس : اه لاللا.
شافت معاه بحزن وقاتلو .
وسام : تسما معجبتكش ؟
تبسم وقاللها .
