الحلقة 64:
شافو معاه لزوج ونطقو بصوت واحد .
آسر و عاطف : وتين ؟
تردد للحظة وفتح القلادة ، ورالهم صورة التوأم الي فيها ولكتيبة الي من لور ، قيس وتين . ،
عاطف: معناها هاجر هي وتين ، وعندها خوها توأم اسمو قيس ، لكن علاش كانت متنكرة فالميتم ، راسي راهو يوجع.
ضحك بصوت خلاهم يشوفو معاه.
آسر : يلزم نعرف شكون هوما ، الشي الي علابالي بيه أنهم لزوج ولادو .
عاطف: ولادو ؟ ولاد ذاك الي جينا على جالو ؟؟؟ معناها قيس اه نقصد وتين ، بنت الشخص الي قتل والديك وعذب أختك ؟؟؟
مين سمع كلاموا دهش ، ورد وهو يخاطب آدم .
إلياس : عذب أختو ؟ وسام تقصد ؟؟ قتل والديك معناها والدين وسام ؟؟؟ .
قدم ليه وجبد بطاقتو يوريهالو .
آسر : معاك رئيس عملاء مكتب التحقيقات الفدرالي ، آسر الرحماني ، أخ وسام الرحماني ، إبن وبنت حكيم الرحماني، ضابط الشرطة المقتول هو وزوجتو على يد المافيا . ودرك أي حاجة تعرفها نحتاجك تقولها .
الصدمة الي كان فيها ،مخلاتوش اصلا يخمم ، تكلم بصوت واطي وهو يقدم ليه .
إلياس : وسام ، معناها تعذيب وسام الكل كان على يد المالكي .
آسر : المالكي ؟
إلياس : وتين ، إسمهم قيس و وتين المالكي، أبناء رجل الأعمال فؤاذ المالكي .
جبد الورقة تاع الاختبار ومدهالو ليدو. وهو مكمل يحكي .
إلياس :جات أمها ل المستشفى ، ولاحظت نفس القلادة عندها ، مين سقسيتها خبرتني انها أم قيس ، ونفات وجود وتين ، بالرغم من انو اي حد ممكن يعرف الشبه الي بينها وبين قيس ، لهذا عملت اختبار بدون علمها وخرجت نتيجتو مع اختبارك نتا و اختك ، وكانو لزوج متطابقين ، معناها كريمة زوجة فؤاذ المالكي هي أمها.
خطف منو الورقة وبقا يشوف وهو يتبسم بقهر ، الطفلة الي حبها تكون بنت عدوو الي وأخيرا عرف شخصيتو . شاف معاه وتكلم .
آسر : قلت انها نفات وجود وتين ؟
إلياس: ايه، ذكرت أنها ميتة من سنين. وحقيقة كان حزنها واضح.
آسر : وعلاه منفاتش وجود قيس ؟؟
عاطف : واش تقصد ؟
آسر : حسب علمي ، كان قيس (وتين ) في الميتم يتم معاملتو معاملة خاصة ، يعني حرصو على أنو يروح ل المدرسة .
إلياس : ايه حتا أنو ،بعد ما سمعوا بوجود عايلة جايا تتكفل بيه كان هو أول اختيار تخمم فيه فتيحة .
آسر : وعلاش متكفلوش بيه ؟.
تبسم وجاوبو.
إلياس : لأنو قيس ، نقصد وتين وضعت خطة ،خلات العايلة تتكفل بيا انا في مكانها .
آسر : وهذا سبب الضرب الي خداتو من عند فتيحة مين رحت نقتلها .
شاف فيه بدهشة وقالو .
إلياس : تقتلها ؟؟؟ أنت الي قتلتها ؟؟
آسر : ايه ، كان لازم ندخل في نصهم وهي كانت فالمافيا ، خانت الزعيم وراحت في صف أب وتين الي منبعد علات مكانتو ، والظاهر أنو أمرها انها تقدم قيس الي هي وتين ل العايلة ، لكن خطة وتين خلاتها تبربش كلشي ومن غشها عاقبتها بالضرب المبرح ، وأكيد من دون علم باباها.
لولهة تألم ، وقال .
إلياس : معناها فقدان ذاكرتها كان بسبابي ، الصدمة من الضرب الي خداتو ،اثر عليها الشي الي خلا عقلها يقرر انو ينسى كلشي.
آسر : بسبابنا حنا لزوج ، مين دخلت نقتل فتيحة وتين شافتني و سمعت اسمي آسر الرحماني ، كان لازم عليا نخلص عليها .
شافو معاه لزوج بدهشة.
عاطف: وشنو ؟
آسر : قدمت ليها وخنقتها فقدت الوعي ومن صدمتي توقعت أنها ماتت ، عبيتها لمكان طريق خالية ورميتها فيه .
عاطف: وين لقاها أبها الحالي ،الدكتور منير وتكفل بيها .
آسر : في بلاصة بنتو المتوفية هاجر .
شاف معاه وقال .
إلياس : هاجر ؟؟
آسر : انعم ، صديقة قيس ، نقصد صديقة وتين الي عرفت سرها من أول لحظة ، وسمعتهم مرة فالطريق يحكيو فيه.
إلياس : هاجر الي توفات بحادث سير ؟
آسر : حادث سير مدبر .
إلياس : معناها موت هاجر كان بسبب أنها اكتشفت أنو قيس بنت ؟
آسر : ايه هكذا الظاهر ، ونظن السي فؤاذ خلص عليها باش متكشفش لباباها شي ، لوكان كشفت انو قيس هو بنت أكيد منير يشك ويروح ل الميتم ويخبر البوليس الي يتحرا في شخصية وتين .
عاطف: لكن السؤال المهم علاش تتنكر طفلة في زي ولد .
تسمع في كلامهم ومصدومة ، من تركيزهم متولهوش ليها قاطعتهم بصوتها .
وسام : لوكان يكون عندك بنت ونتا من مافيا ، واش احسن طريقة انك تخبيها من الي يحبو يلقاو نقاط ضعفك.
عاطف: تخبيها في هيئة طفل .
شافو معاها الكل والصدمة في وجوهم ،
إلياس : و وسام من وكتاه ونتي هنا .
شافت مع آسر الي بقا حتا هو يشوف مع عينيها .
وسام : من جملتو ، آسر الرحماني ، اخ وسام الرحماني ، ولد وبنت حكيم الرحماني ...
قدم ليها وحكا .
آسر : وسام ، سامحيني يا ختي .
بعدت عليهم وتكلمت .
وسام : وكتاه كنتو حابين تخبروني بالحقيقة .
إلياس : حقيقة أنا مقدرتش ،خوك ماحبش.
آسر : محبيتش نزيد عليك ، حبيت نقتلو ونخلص الدنيا منو من بعدها نجي ليك ونخبرك كلشي .
هدرت وعينيها شاعلين نار .
وسام : آخر مرة تخمم ف الانتقام وحدك ، الشي الي عشتو خلاني نتوقع اي شي ومنخاف من حتا شي ، وكيما راك قوي حتا انا راني قوية ويمكن أكثر منك ، معناها رجلي على رجلك .
قدم ليها وتبسم وجبدها لحضنو وهو يملس على شعرها ، حتا هي حاوطتو بيديها وبدات تبكي.
