الحلقة 36 :
عند هشام :
بعد ما غلقت الخط تبسم وارتاح اخيرا رجعت تحكي معاه كيما موالفة حكا مع روحو .
هشام : يمكن كانت مضغوطة هاذ ليام وانا توسوست .
خرج من سيارتو وقفل الباب وراه ، وتوجه ل الدار ، طبطب وستنا دقائق فتحتلو الباب
عليمة : ولدي
حضنتوا وهي تبوس فيه وتشم فريحتو .
عليمة : علااش يا ولدي وين راك غايب هكذا ما تقول عندي يما تتوحشني ما تقول شي .
تبسم معاها ورد على كلامها .
هشام : ومن غير يما انا شكون نتوحش وشكون تتوحشني .
شافت معاه شوفات لوم وكمل يحكي .
هشام : ودركا متخلينيش ندخل، راني ميت من البرد .
حصرتلو بزربة باش يدخل وهي تدفي فيه بيديها لزوج ، قفلت الباب وراها وتبعتوا ، وصل ل باب الصالة لقا باباه حاكم جوغنال يقرا فيه .
هشام : سلام عليكم بابا .
عليم : وعليكم السلام ولدي ، تفضل ،يعلم ربي شحال توحشناك .
قعد حداه و عليمة راحت تجيبلو قهوتو ومخليتهم يحكو براحتهم .
هشام : والله يا بابا راك عارف الخدمة ما راهيش تفض .
عليم : ايه ،معليش المهم وقت تتزوج لازم تنقص شويا ، مجاياش تغيب على مرتك ،
هشام : لقيتني نخمم فهاذ الحاجة.
عليم : واشنو هي .
هشام : يمكن نغير القسم الي راني فيه ، صراحة شويا خطير وانا مانيش باغي نتسبب في مشكلة ليكم ولحياة و ولادي فالمستقبل.
عليم : مثلا مشكلة واش ؟
هشام : والله يا بابا مين تتعامل مع أشخاص مجرمين وخطرين تولي تعمل لروحك الف حساب.
عليم : دير الي يريحك يا ولدي وهز راسك راك تحافظ على أمن الدولة والشي هذا يخليني نفخر بيك.
_______________
عند آدم وعاطف :
بعد ما هز عليها لادراس تاع دارو شكرها وجا رايح ، شاف مع عاطف الي لقاه ساهي في هذاك الارشيف ، تكلم باستغراب .
آدم : عاطف!
عاطف : انعم ؟
آدم : يلا ؟
تردد لثواني وهو يشوف مع الارشيف اذا يسقسي عليها ول لالا ، علابالو انو الارشيف يسجلو فيه كلش معناها اذا تكفلو بيها و واشمن عايلة ولادراس وكل المعلومات راح تكون فيه ، تبسم بحرقة وتراجع ،مراهوش حاب يفزدلها حياتها ويدخل فيها خصوصا انو متقدمش في حياتو وبالعكس دخل في دائرة خطيرة ،قادرة تأثر عليها مستقبلا . ناض بحزن وكأنوا عارف انو راح يندم طول حياتو على هاذ الشي ، وتبع آدم الي خرج برا ديراكث بالرغم من جرحوا لكنو تقاوا وماشي عادي ولا كأنو مضروب . وصل ل السيارة وركب شاف مع آدم الي كان يتعافر مع السبتة تاع السيارة ، قدم ليه ودارهالو .
عاطف:هههه نوغمالمون هاذ اللقطة نديرها لمرتي ماشي ليك .
آدم : هههه مرتك الي كنت ساهي تخمم فيها ل داخل ومتجرأتش تسأل عليها .
تنهد وقالو .
عاطف : خاطينا الحب ا صاحبي .
آدم : امشي امشي ل لادراس الي مدتهالنا .
_________
عند هاجر :
شافت في مكانو الفارغ وتبسمت، شافت مع روحها ف لمرايا عدلت شعرها ، شافت مع الدولاب وراحت ليه جبدت لمقص رجعت قابلت لمراية وبدات تنقص في شعرها من الاطراف ، قصت شويا من الغرة وتبسمت برضا على روحها ، راحت جيهة خزانتها لبسة لبستها وراحت تجري خارجة لخدمتها ، بسبة انو الطبيب الجديد الي المفروض يجي اعتذر ومراحش يجي تسقات فيها هي تاخذ مكانو ، مين وصلت ل باب الدار تذكرت الي هي نساتوا ، رجعت تجري لبيتها شافت معاه بحزن حكمتوا ودخلتو في ساكها ، بدون لوحها راح يصعاب عليها كلش . عاودت هبطت لقات باباها جا من برا باستوا .
منير : راكي رايحا .
عملتلو اشارة ايه بوجها .
منير : يلا نوصلك .
شافت معاه بتأنيب .
منير : نوصلك في طريقي راني راح نجيب جداتك .
نڨزت من الفرحة وقفزت تحضن فيه واخيرا جداتها جاياا شحااال توحشتها وتوحشت ماكلتها ، رجعلها النشاط والفرحة بانت في وجها تبسمت معاه وعملتلو بيدها 👌
