الحلقة 42 :
جالسة جنب الثاقة وغايسة ف السما والنجوم ، كان البرد داخل وهي ول على بالها ، مزالها تخمم فيه وفي لقاءها بيه وكيفاش معرفهاش ، حركت راسها بمعنى لا يا حياة وعدتي ولازم توفي بوعدك، قفلت الثاقة وقدمت لكراس كاتبة فيه كل الدروس الي تقدم فيهم لتلاميذها وبدات تقرا وتراجع ف القصص ، تستعين بشيوخ وطريقة سردهم ، صحيح الي هي مدينة وحافظة قرآن لكنها ديما تحس روحها ناقصة وتحب تعرف أكثر وأكثر ، شافت مع :
قصّة إدريس عليه السلام وبدات تقرا بصوت عالي : إدريس -عليه السلام- أحد الأنبياء الذين ذكرهم الله -تعالى- في كتابه العزيز، وقد سبق نبيّ الله نوح -عليه السلام- وقِيل: بل كان بعده، وكان إدريس -عليه السلام- أوّل من كتب بالقلم، وأوّل من خاط الثياب، ولَبِسَها، كما كان عنده عِلَمٌ بالفلك، والنجوم، والحساب، وقد اتّسم -عليه السلام- بصفاتٍ وأخلاق كريمةٍ، كالصبر، والصلاح؛ ولذلك نال منزلةً عظيمةً عند الله -سبحانه-، قال الله -تعالى- فيه : (وَإِسْمَاعِيلَ وَإِدْرِيسَ وَذَا الْكِفْلِ كُلٌّ مِّنَ الصَّابِرِينَ*وَأَدْخَلْنَاهُمْ فِي رَحْمَتِنَا إِنَّهُم مِّنَ الصَّالِحِينَ)،[٥]
وقد ذكر النبيّ محمد -عليه الصلاة والسلام- في قصّة المعراج أنّه رأى إدريس -عليه السلام- في السماء الرابعة؛ ممّا يدلّ على مكانته ومنزلته الرفيعة عند ربّه.
كملت تقرا ، حتا عيات شافت مع الساعة وراحت تنعس .
_____________
عند عاطف :
بعد ما وصلوا لقصرو ،راح هو ل الدار الي عاملينها غير ليهم مين يحبو يرتاحو من هاذ الاجواء والدنيا ، وصل فتح الباب ودخل ، راح جيهة الكوزينة ، حل الباب تاع لفريجيدار هز قرعة شراب كانت فيه وبدا يشرب ، كل ما يحس بوجاع في قلبو يزيد يشرب . حبس مين حس بروحو خلاص ماهوش قادر ، تذكرها وهي واقفة على باب الملهى بجلبابها الطويل ، تبسم ودخل ينعس .
____________
عند الياس و وسام :
تأكد من أنها نعست ، راح غطاها وبقا يشوف معاها ، تحرك في حواجبها وتهدي بكلام ممفهومش ،ضحك عليها ، خلاها وخرج ل الصالة ، وقف يشوف مع القلادة ويقول .
إلياس : وين راك يا صاحبي وين .
___________
عند كريمة :
جالسة على كرسيها حاسة بالدنيا تدور وراسها يوجع ، نادات ل الخادمة ، جاتها .
: انعم مدام .
كريمة : تقدري تجيبيلي دوا تاع الراس راني حاستو راح يطرطق .
: حاضر مدام ثواني ويكون عندك .
راحت ورجعتلها بالدوا وكاس ما شربتو وقاتلها .
كريمة : فؤاد لدرك مجاش ؟
: ايه ، مراهوش هنا .
كريمة : مين يجي خبريني .
: حاضر .
___________
: سيدي وزعنا الملصقات في كل الشوارع كيما أمرتنا .
💀: مليح ، اي اتصال يجيكم اتحقو منو ،
غلق عليه وقال مع نفسو .
💀: ودرك وريلنا شطارتك يا بنت رحماني ،وين رايحا تتخباي .
دخل مفتاح فالباب ودخل ، مع دخل ستقبلتو خادمة وقاتلو .
: سيدي ، المدام خبرتني مع تجي نقلك ، الظاهرة انها مريضة .
فؤاذ : ممم اوك ، شكرا .
طلع فالدروج بتأني وهيبة ، قابلو كادر كبير فيه صورة 💀 تعداه وراح صوب غرفتها ، طبطب وحل الباب .
فؤاد : خبروني انك تحتاجيني .
كريمة : ايه ، كاش أخبار على وتين ؟ .
خزر فيها خزرة وقال .
فؤاد : قداش من مرة قتلك متذكريش اسمها هكذا ، اي واحد قادر يسمعك .
كريمة : سمحلي ، اما جاوبني .
فؤاذ : لا ، مكان حتا خبر .
كريمة : شفت هاذو كلو من أعمالك و المافيا الي راك فيها ضيعتلي ولادي .
حكمها من فكها بقوة ضاغط عليها وقال
فؤاد : ، إيااااااكي ثم إياكي تحصلي فيا مشاكلك ، خبرتك من الاول بخدمتي وخطورتها وأنهم راح يكونو فريسة سهلة لأعدائي ، ونتي رحتي حملتي وخالفتي أوامري ، والنتيجة ؟ راهي قدامك خليتي يكون ل فؤاد سراجي نقطة ضعف ، بالرغم من أني ماكاشفش شخصيتي ، لكن بسبابك عملت هاذ الشي ، لوكان جيتي تحبيهم متجيبيهمش لهاذ الدنيا ل بوهم فيها الراس لكبير تاع المافيا .
طلق فكها ، طلع يدو لجبهتها يتحسس في حرارتها ، تصدم ، حرارتها بزاف مرتفعة ، والي زاد خوفو داخت بين يديه . عيط بزربة ل الخدم الي جاو يجرو ،وعيط لطبيب ،يجي فورا ل الدار
