الحلقة 62 :
خلص عمليتو وتبسم ، أنقذ حياتها ، خرجها من الغرفة وين لقا مرة كبيرة تبكي ، مين شافتو جات تجري .
خديجة : يا عمري على بنتي ، طمني يا ولدي طمني تعيش .
إلياس : الحمدالله قدرنا نجتازو مرحلة الخطر ، درك نستناوها تفطن وانشالله ما يكون غير الخير .
قدمت ليه باستلو يديه وشكراتو .
خديجة : ربي،يحفظك يا ولدي ،
على كلامها قابلو واقف ، ويشوف معاه شوفات ، تبسم معاه وقالو .
إلياس : متخافش السي منير ، راهي نجحت العملية وهاجر بخير .
تبسم معاه وطاح على ركبتو يبكي ويحمد في ربي ، شافها جنبو ، وقف وراح ليها باسلها راسها بكل حنية وهو يهدر .
منير : على سلامتك يا بنتي ، على سلامتك يا روحي نتي .
استأذن منهم أنو ياخذها ل البيت وين يشوفو حالتها وإذا تستيقظ وقت ما يروح التخدير منها .
بعد عليهم و ل المرة الالف حاول يتصل ب هيا لكن والو ، اتصل بوسام خبرها والي حلفت عليه انو يجي يذيها لعندها وصوت بكاها خربلو ودنيه ، حاول انو يطمنها لكن إلحاحها خلاه يروح يجيبها لعندها. في طريقو تفكر آدم ، عيطلو لكنو قطع في وجهو الخط ، زاد عاود عيطلو وكيف كيف قص في وجهو ، تنهد وراح مكمل ل الدار.
_________
عند آدم و عاطف :
بعد ما لتقاو ف لقصر وجدو روحهم وراحو صوب الإجتماع الي كانو حتا هوما معروضين ليه بصفة أنو آدم داخل ف المافيا وصارت عندو مكانة فيها ، بقاو في هاذيك الصالة الي كانت كلها شخصيات ، الي يقهقه بالضحك والي يشرب فالشراب والي قاعد وبينو ألف وحدة ، إشمئز منهم و لدقيقة جاتو في راسو أنو يجبد مسدسو ويخلص عليهم الكل ، تنهد و السكوت عم الصالة مين هبط بكل هيبة ف الدروج ، قناعو الي مرسوم عليه جمجمة ، خلا الكل ساكت ، آدم الي عمل دبزة بيدو يطفي نارو الي شاعلة فيه ، يدعي في ربي أنو يتحمل وميهجمش عليه ويقتلو ، قدم عاطف لوذنو وهو يقول .
عاطف : هذا هو الهدف ؟
عملو براسو إيه بلا ما يتكلم ، تبعو بعينيه وين قعد وسط رجال كانو لتم ، عدل الڤاسث تاعو و مشا صوبو ، كان راح يجي عاطف معاه لكنو منعو .. يمشي بخطوات ثقيلة ، الكل يوشوش وهو يشوف معاه حتا من هو عندو إسم وسطهم " الوحش " وصل لعندهم مد يدو ليه وتكلم .
آدم : شرف كبير ليا أني نلقاك هنا .
شاف معاه من تحت القناع وعوج راسو ، ملامحو جد معروفة بقا يتفكر وين شافو ، وقف وخمس عليه حتا هو .
فؤاذ : نقدر نعرف شكون نتا .
آدم : معاك الوحش .
تبسم وجاوبو .
فؤاذ : وأخيرا لقيتك ، سمعت عليك بزاف وعلى شجاعتك و الاعمال الي درتهم و وحشيتك ، شحال يعجبوني الأشخاص الي كيما نتا .
تبسم معاه نص تبسيمة وقدم ليه وهو يشوف في عينيه .
آدم : ولوكان تعرفني شكون أنا صح ،راح نزيد نعجبك كتر .
كمش حواجبو تحت القناع مفهمش كلامو ، جاوبو بصوت خشين .
فؤاذ : شكون نتا .
زاد قدم ليه وبصوت يسمعو غير هو قالو .
آدم : آسر .. آسر الرحماني ، ولد حكيم الرحماني .
شاف صدمتو في عينيه ، ورجوعو ل الخلف خلاه يحس بخوفو ، حل قمجتو يحب يسترجع النفس ، ومين حلها بانت قلادتو ، والي شافها آدم وبقا يدقق فيها ، وهو مصدوم وكلام حليم يدور في راسو ، بقا لدقائق يخمم حتا هو ، وختم كلامو معاه .
آسر : دير في بالك أني راح نحرقك ، بيك بعايلتك كيما حرقتلي عايلتي ، و اه تذكرت ختي الي كانت عندك راهي عندي هههه وبالاك تحاول تمسها عينيك نخرجهملك .
راح وخلاه مصدوم في كتلة النار الي حداه ، آخر شي توقعو أنو آسر الولد الصغير الي كسرلو راسو ب بكاه هذاك النهار راح يجي يواجهو ، و ختو الي خباها عليه والي مخليها كرهينة عندو ،راهي عندو درك . خبط الطابلة الي كانت حداه وين تكسرو لحوايج الي فوقها وتبسم تحت القناع بشر وهو يكلم نفسو .
فؤاذ : نشوفوك يا ولد حكيم وين توصل .
__________
