الحلقة 17 :
واقفة في وسطهم بجلابتها الغوز و هي حشمانة تستنا ف النتيجة تتقال ، كانت طول حياتها تتمنى تفوز بهاذ الجائزة ، الي رايحا ترفع مقامها ومقام والديها ، صحيح أنها تأخرت شويا في حفظوا لكن كان الهدف تاعها تعلم التجويد والحفظ والتفسير ، حتا من الصفحات حفظتهم ، كانت حابة تكون مميزة ، قاطع تفكيرها كي لفظ اسمها ، شافت معاه بخوف و رعشة ، تبسم معاها وقاللها
🧔: مبرووك عليك الجائزة الأولى لحفظ القرآن وتفسيره بتقدير ممتاز .
الكل بدا يصفقلها ووقفوا تكريما ليها ، دموعها تسرسبو على خدها مين شافتهم لزوج يبكو ، قدرت تعرف الي هي خلاتهم يفتخرو وميندموش انهم تكفلوها، شافت قدامهم لقاتو واقف بشموخ يشوف معاها ويتبسم تبسيمة كلها حب وثقة ، هو الوحيد الي كان واثق منها ومشجعها لآخر دقيقة ، ردتلو التبسيمة وتقدمت تاخد جائزتها ، كانت جائزة عبارة عن مبلغ مالي ضخم تبرعت بيه لبناء مدرسة قرآنية تكون فالمستوى ، حتا أنها تطوعت باش درس فيها ، مدولها كلمة تقولها للجمهور الي يشوف فيها . بقات لحظات تتأمل وتكلمت .
حياة : بسم الله الرحمان الرحيم ، أول شي نشكر أي واحد جا لهاذ الحفلة وشاف هاذ المسابقة الرائعة ، الي بالنسبة ليا من أجمل الأشياء الي عملتهم في حياتي ، ثاني شي نشكر زميلاتي على المنافسة الرائعة ،صحيح اني تحصلت على المرتبة الأولى أما تعلمت منهم بزاف حوايج وهاذو هوما اهداف هاذ المسابقات ، الحمدلله بعد فضل ربي عليا قدرت نحقق حلمي وحلم والديا الي بقاو معايا لآخر لحظة ، وبالطبع مننساش خطيبي الي شجعني و وثق فيا، والديا الي تكفلوني من مكان موحش ومظلم نتمنا تكون هاذ الجائزة هدية ليكم على تعبكم معايا ، بالرغم من انو كفالتكم بيا وحدها رفعت مقامكم فأجر كافل اليتيم أن يحظى بالقرب من الرسول في الجنّة؛ فقد قال -عليه السلام-: (أنا وكافِلُ اليَتِيمِ في الجَنَّةِ هَكَذا وقالَ بإصْبَعَيْهِ السَّبَّابَةِ والوُسْطَى)،[١٨] مين كنت صغيرة كنت نقول علاه يا ربي حطيتني فميتم ومنعرف والو من غير اسمي ، وكي كبرت فهمت بلي " وَعَسَى أَن تَكْرَهُوا شَيْئًا وَهُوَ خَيْرٌ لَّكُمْ وَعَسَى أَن تُحِبُّوا شَيْئًا وَهُوَ شَرٌّ لَّكُمْ وَاللَّهُ يَعْلَمُ وَأَنتُمْ لَا تَعْلَمُونَ" سورة البقرة آية:٢١٦ ، لازم تعرفوا أنو مهما قسات عليكم هاذ الدنيا ومهما خبطتكم مرات بزاف وفشلتكم أكيد لسبب ربي عالم بيه ، ربي كي يشتاق لعبادو ودعاءهم يبتليهم بمصيبة تخليهم يرجعو ليه ، وانا نقول وندعي كل يوم من يوم تكفلوا بيا لدرك ، شكرا يا ربي بزاف الي خيرتني انا وبتليتني بأبشع شي فالدنيا الي هو اليتم وعوضتني بأجمل شي فالدنيا الي هوما بابا صلاح وماما صليحة . نحبكم بزاف . وشكرا
بعد ما كملت كلامها كل القاعة تصرفق وتوجهت لوالديها تهنأهم وتباركلهم في هاذ الجوهرة .
_______________
عند عاطف وآدم :
كان يشوف ويشمئز من هاذ المناظر وهاد الدنيا ، كمية الفسوق الي يشوف فيها خلاتو قريب يرجع، شاف مع صاحبو الي الظاهر انو مستمتع بهاذ الأجواء وهاذي هي نقطة الاختلاف بيناتهم، تكلم معاه بصوت قاوي
آدم : لوين جبتني يا صاحبي .
عاطف : يهديك ربي يا آسر اسكت واستمتع .
حكمو من قمجتو وهو خانقو ، ضغط على سنيه وتكلم بصوت يخوف .
آدم : شحااال من مرة قتلك متقولش اسمي الحقيقي برا .
ضربو على يدو بإشارة أنو خلاص راهو قريب يخنقوا . لولهة جات بين عينيه وهو يخنق فيها ، دور راسو ورخف يدو بدون شعور .
عاطف : يااا جدك ، علاش تخنق فيا راااك قريب قتلتني .
آدم : تستاهل ، باش تتربى .
بعد عليه لثواني وراح قعد في بلاصة فارغة ويخمم علاش راهي تجيه بزاف في مناموا و لهاذ الدرجة تدهورت حالتو بسبابها و ول يسخايلها مام فالواقع . زفر بقوة وهو يكلم روحو .
آدم : علااش يا آسر قتلتها علاااش، علاش راك تخمم فيها بعدما قتلتها ، شكون هي و واش سرها. مستحيل نعرف هاذ الشي درك مستحيل .
__________
ركن سيارتو حدا الميتم كالعادة ونزل منو .
إلياس : مممم الظاهر تغير بزاف .
شافت معاه من بعيد ومع سيارتو ولبستوا ، عدلت من روحها وراحت ناحيتوا .
سارة : احم احم ، تحتاج مساعدة ؟؟
دور وجهو شاف معاها ورد .
إلياس : ايه من فضلك ، نقدر ندخل .
سارة : أكيد اتفضل ، الدار دارك .
على مقولتها تبسم وقاللها .
إلياس : هي الحقيقة الدار داري صح ههه .
تعجبت من ردو اما مهتمتش بزاف، تقدمت معاه لباب الميتم ودخلوا .، شاف مع الساحة الي مزالت كيما راها و دخل ،
إلياس : مين شفتوا من برا توقعتو يكون مبدل ، اما من الداخل راهو هو هو .
سارة : الظاهر انك متبرع قديم ، يعني موالف تساعد لولاد و من هيئتك نقدر نعرف الي كنت بعيد على لبلاد .
إلياس : ههه ايه نقطة اني كنت بعيد عن لبلاد راكي صح فيها ، اما بالنسبة ل النقطة الثانية لالا ، راني كنت هنا كيتيم ، ماشي كمتبرع .
وختم كلامو بغمزة.
سارة : اه ، سامحني متوقعتش يعني من الهيئة تبان شخص راقي .
إلياس : وعلاش الي راهم هنا ماش راقيين ؟ ول ماش من حقهم يكونو راقيين .
سارة : لالا متفهمنيش غالط ، حتا انا راني بنت ميتم ،وجيت نخدم في هاذا لأني صراحة نرتاح بين الاشخاص الي كيفي ، اما الي نقصدو هو نجاحك .
سارة 👇👇
