الحلقة 54:
عند هشام :
قفل على حياة وشاف مع هيا من لمرايا ، لقاها مهبطة راسها كالعادة . أما هي كانت تخمم واشبيه ، علاه حتا يزعف لهاذ الدرجة ،قطعت تفكيرها امو كيف حكات معاه .
عليمة : مالك يا ولدي ،حتا من حياة محكيتش معاها كيف ما موالف .
هشام : والله يا يما سقسي لالة الي راهي وراك .
شافت مع سميحة الي بدورها شافت مع هيا وقاتلها .
سميحة : واش درتي هيا ؟
هيا : ما درت والو .
رد بصوت خشين .
هشام : كيفاش مادرتي والو ،علاه تخرجي وحدك وانا وصلتكم ودخلتو قدام عيني ، كيفاش تخرجي منبعد يتبلاوك لوكان مجيتش لتم وشفتو واش ديري ؟
دمعو عينيها وقالت .
هيا : جو التسوق ماشي جوي على بيها خرجت نتنفس شويا .
عليمة : معليش بنتي ،المرة الجايا ابقاي ،معانا ونتا يا هشام علاه قالب خليقتك فيها ،راهم هوما الي خماج الله غالب .
سميحة : كتر خيرك يا هشام .
هشام : اكيد نقلب وجهي راهي كيما ختي تربات حدايا، واقيلا راكم حايبين نضحكلو ونخليه .
عليمة : عندك الحق لكن الطفلة شوفها كيفاش خايفة معندها حتا ذنب .
شاف معاها لقاها تبكي قاللها .
هشام : خلاص هيا ،اسكتي المرة الجايا متخرجيش وحدك .
هيا : انشاالله .
سكتت وكملت تبكي بالسكات ،شي من عياطو عليها ،وشي من كلمتو "ختي" وعندو حق اي حد يدير هكذا لختو ، ماعندها ماراحا تكون بالنسبة ليه ،.
وصلهم ل الدار وطلع معاهم ، مين دخلو لقا باباه ،
عليم : ارواح ولدي نحتاجك .
راح عند باباه وقعد .
هشام : انعم بابا
عليم : باش نبدو نشوفو المعازيم .
هشام : انا معنديش بزاف يعني الي يخدمو معاي والضباط ،فقط ونتا اعرض صحابك .
عليم : ايه خلي منبعد ندير ليسثا مع يماك ،مانيش حاب نكترو بزاف .
عليم : اكيد.
___________
عند آدم و وتين :
بعد ما خلصو ماكلتهم وقعدتهم ، راح يوصلها ل الدار ، ركبت معاه وانطلقو ، وهو يخمم في غدوة النتيجة تخرج تاع ختو ، شافت معاه شافتو غايس خلاتو براحتو وكملت هي تاني تشوف مع الطريق ، حتا وصلو لدارهم ، خرج معاها يودع فيها ،
آدم : بالسلامة ، اتهلاي في روحك .
عملتلو حركة باي بيديها وهي تتبسم ، دخلت ل الدار وقفلت الباب وهو رجع ل الطاكسي ، وصلو ميساج منها تخبرو .
وتين : مرسي بزاف على الخرجة .
تبسم وردلها .
آدم : في أي وقت حبيتي .
خبا تلفون وديمارا ، حايب غبر ينعس برك وينوض باش يجي نهار جديد .
___________
عند إلياس :
بعد ما خلص كلامو مع وسام ، راح لبيتو ينعس وخلاها هي تاني تروح ترتاح ، غدوة بالنسبة ليه نهار كبير ،يعرف بيه زوج حوايج ، شاف مع سقف بيتو وقال ، زعما تكون ختو صح ؟ وعلاش صرا فيها ذاك الشي ؟ نفض الافكار من راسو ،وقرر ينعس ويريح بالو احسن من انو يبقا ليل الكل يستنا فالنهار يطلع .
_________
عند هيا :
مع دخلو راحت ل البيت ، بدلت قشها لبست جبة مستورة وخرجت تعاونهم ف لعشا ، دخل لقاهم مجمعين ف الكوزينة كل وحدة واش تعمل ، شاف معاها لثواني وهبط عينيه ، وخرج رايح لبيتو ، مين خلصو الماكلة دورت ليها امها قاتلها .
سميحة : روحي يا بنتي عيطي ل عمك عليم ، هشام .
ترددت ،اما ملقات وين بيها وراحت عند عليم . طبطبت على الباب ومين جاها الرد دخلت خبرتو ، وردلها انو جاي ، غلقت الباب وتوجهت لبيتو ، طبطبت ، مسمعهاش ، طبطبت مرة ثانية ،جاها ردو .
هشام : ادخل .
طلت من الباب براسها برك لقاتو طارح روحو فالسرير،مين شافها تعدل وقعد.
هيا : قالولك ارواح تتعشا .
جا يرد عليها لقاها ديجا راحت ، ناض بزربة يلحق عليها ، حكمها من يدها وهي تخلعت ، شافت معاه شوفة .
هيا : وشبيك ؟ واش،كاين .؟
هشام : والو حبيت نقلك ديك اللبسة الي تلبسيها برا غير بدليها .
هيا : كيفاش؟
هشام : يعني مين تكوني هنا ونخرجكم انا ماذابيك متلبسيليش ذيك اللبسة .
هيا: مالها لبستي؟
هشام : سقسي روحك ، والجبة هاذي تاني متلبسيهاش مراكيش وحدك فالدار .
راح وخلاها تشوف مع جبتها وهي حايرة ، هي اصلا جامي تلبس لمعري وخيرت جبة مستورة بالدمة ، غمضت عينيها وهبطو دموع منهم وقالت في قلبها .
هيا : اكيد هيا ، راهو يشوف في لباسي مفضوح خاطر حبيبة قلبو متدينة بزاف ، شي عادي .
راحت لحقتهم وقعدت فالطابلة وين جات مقابلتو ، طاحت عينها مع عينيه هبطتهم بزربة وبدات تاكل ،مين خلصو لمت الطابلة وغسلت لماعن وراحت هي تاني ل بيتها .
دخل لبيتو مين خلص لعشا وراح قابل لمراية ويحكي مع روحو.
هشام،: هشام يعني لازم تنطق، اهتم بأمورك وخلاص ، كبيرة وتعرف صلاحها .
تسند على السرير وجاتو حياة في بالو ،لبستها وجلبابها وكيفاش تمشي بحشمة.
_____________
عند وتين :
دخلت لقات جداتها تستنا فيها وتتبسم .ردتلها التبسيمة .
خديجة : مممم الظاهر كاين حكاية راهي دور .
ضحكت وعملتلها لالا .
خديجة : يلا بنتي روحي اغسلي يديك وارواحي تتعشاي .
عملتلها براسها لا ، واشارة فهمت بيها انها كلات لبرا .
خديجة : اذا هكذا روحي يا بنتي تنعسي .
سقسات على باباها .
خديجة : مازالو مجاش ، راهو فالسبيطار .
خلاتها وطلعت ل البيت تحطت على سريرها وهي تخمم فالشي الي ذكرتو ، ذيك الجملة واسمو خلاوها ترعش ، شكون آسر وعلاش راهي خايفة .. بعد دقائق كانت غفات .
_________
عند عاطف:
بعد ماجاب رقمها بأسلوبو ، وبعتلها ميساج ، تكا في سريرو وبقا يخمم ، ساعات تجيه في راسو انو يعديهالو ويخلي الطفلة ، لكن من جيهة اخرى ميقدرش ، تذكرها وهي تشوف معاه ،تبسم . عدل روحو ونعس.
