الحلقة 48:
عند أدم و إلياس :
مدلو شعرات من راسو ، وخباهم ، تكلم .
آدم : مين تخرج النتائج خبرني .
إلياس : أكيد ، تحبني نهدرلها ؟
آدم : لا ، من الافضل حتا لوكان تظهر ختي ، متخبرهاش .
إلياس : علاش ؟
آدم : راح نكون خطر ليها . هذا الي نقدر نقولهولك .
ودعو وجا خارج ، توقف ثواني جنب القلادة الي محطوطة على طاولة ، شاف معاها و كمل طريقو . مع خرج بعت ميساج لوتين .
____________
عند وتين (هاجر ) :
وصلها ميساج فتحتو .
{نقدرو نتلقاو اليوم ؟ }
ردتلو بحسرة .
{للأسف لالا ، راني رايحا ل السبيطار نخدم }
رد عليها
{معليش المرة الجايا }
ردت
{انشالله} .
قفلت ثلفونها وراحت صوب المستشفى .
_____________
عند هيا :
بعد ما هدا الوضع فالدار ،راحت لخدمتها ، وهي في طريقها حبست حدا لبحر ، قدمت ليه ،وبدات تحكي بصوت عالي .
هيا : رايحااا ننسااااك .رايحااا ننساااك ونخرجك من حياتي ومن بالي .
تعمرو الدموع في عينيها ورجعت تبكي بالشهقة ، قطعت بكاها مين حضنتها من لورا بالقوة تهذن فيها ، من رجفتها عرفتها أنها هاجر . دورت ليها وبدات تحكي .
هيا : خلاص يا هاجر ، خلاص عرسو السمانة الجايا .
دمعو عينين هاجر وملقات ماتعمل غير انها تحضنها وتخليها تفرغ قلبها .
__________
عند كريمة وفؤاد .
سهيلة : سيدي ، حرارتها ارتفعت بزاف ولازم علينا ناخذوها ل المستشفى .
فؤاذ : داكوغ ، اهدري ل رجال يدوها وروحي معاها نتيا ، وبالاكم .
سهيلة : حاضر .
راحت وجدتها ووجدت واش تحتاج ، عاونتها وصلتها لالطاكسي وانطلقو بيها ل السبيطار ، غير ما دخلت الكل جا يجري، عندها عارفينها شخصية مهمة ، عملولها غرفة خاصة وخبروهم انو الطبيبة جايا .
__________
عند إلياس :
بعد ما راح آدم ،خلاه في حيرة من امرو ، انو تكون اختو هادي اخر حاجة جات في بالو ، شاف مع الشعرة الي خباها في صاشي صغير ، (هذاك الي كيما تاع الأدلة زعما ) ، وقال مع روحو .
إلياس : نظن حان الوقت اني نروح ل السبيطار .
عدل روحو لبس قشو ودعها و وصاها انها متحل الباب لحتا حد من غيرو هي . جاوبتو ب اوك وراح وهو مطمن .
في طريقو لمح زوج بنات قاعدين جنب لبحر والظاهر فيهم مراهمش ملاح ،ركز مع وحدة فيهم للحظة حس بإحساس مألوف ، كيما انك تشوف شخص مألوف ليك ،حب يتوقف يشوف مالهم لكن مع شاف الساعة كمل طريقو .
________
عند وتين وهيا :
عملتلها براسها ل الساعة بمعنى انهم تأخرو ، وبعد ما هدات هيا ، راحو ل السبيطار . مع دخلو حسو بحركة كبيرة فيه نطقت هيا .
هيا : الظاهر انو في شخصية مشهورة او معروفة اليوم .
جات ترد عليها باللوح ،فجأة تحطت يد على يدها وجبدتها ، مع جبدتها طاح اللوح من يدها وطاحت عينها في عينو وهو تحت تأثير الصدمة ، كمية الشبه الي بينهم متأكد انو شبه تاع توأم ماشي مجرد شبه بين ناس، خصوصا انو قلادة الي عندو تبينلو حوايج بزاف . شاف معاها بصوت يرجف ومبحاح .
إلياس : نقدر نقدر نعرف اسمك مدموازال ؟
شافت مع يديه الي وجعوها ومع يدو مقدرتش تنحي ول تهدر معاه ، تدخلت هيا ونحاتلو يدو وهي تهدر .
هيا : واش هاذ التصرف .
إلياس : من فضلكم جاوبوني على السؤال .
هيا : اسمها هاجر ، هاجر سراجي .
شاف معاها مستغرب علاش تهدر في بلاصتها ، هبطت ل لوحتها وكتبت فيها وهو مازالو يشوف ومصدوم .
هاجر : سامحني ، فاقدة ل النطق ، معاك الدكتورة هاجر سراجي .
قال مع روحو .
إلياس : لكن ، لكن لازم يكون اسمها وتين ، معقول يكون الشبه لهاذ الدرجة ، تكلم يرقع فالموضوع .
إلياس : اه سامحيني مدموازال ، شبهتك لوحدة نعرفها .
شافت معاه وتبسمت وعملتلو براسها عادي ، مدلها يدو وقاللها.
إلياس : وانا الدكتور الياس ، والحقيقة سمعت عليك بزاف مين كنت برا لبلاد .
تبسمت وجاوبتو في لوحها .
هاجر : شكرا ،
جات الممرضة قطعت كلامهم وقالت .
: دكتورة هاجر ، كاينة مريضة جات دركا ، لازم تطلعي تشوفيها .
جاوبتها فاللوح .
هاجر : واش اعراضها ؟
: اعياء ، دوخة ،وحرارة جد مرتفعة .
جات ترد رد هو في بلاصتها .
إلياس : خليني انا نطلع ليها ، وهاذ الشي اعتبريه تصحيح ل الغلطة الي صرات .
تبسمت معاه و وافقت ، اصلا ماراهيش حابا تخلي هيا وحدها والظاهر انو هاذ المريضة رايحين يحطو عليها اهتمامهم . خلاهم وطلع .
________
