الحلقة 30 :
( كل كلام هاجر تكتبو في لوحتها )
رد على كلامها .
آدم : ممم سامحيني مكنتش علابالي .
هاجر : لا عادي ، فالحقيقة هو تكفل بيا بعد ما لقاني مرمية فالطريق .
وجعوا قلبو مين بدات تحكي .
آدم : الطريق .؟
هاجر : ايه لقاني مضروبة ومخنوقة ،داني ل الطبيب ودخلت في غيبوبة لمدة عام ، مين فطنت كنت فاقدة الذاكرة و النطق ، وحتا لدرك مقدرت نتفكر والو ،كيما راك تشوف.
كل كلمة قالتها دخلت لقلبو كيف الموس ، لحظات وكان يتفكر في ذاك النهار .
فلاش باك :
قدم ليها لقاها كلها مضروبة لدرجة انها مقادراش تنوض تهرب منو ، شاف معاها بيأس وخنقة أكثر منها ، كمية الخوف الي فيها قدر يعرف الي هي 100% شافتوا وسمعتوا ، هدر بصوت مخنوق .
آدم : علاااش ،علااش شفتيني علاااش سمعتيني علاااش
قدم بيديه حطهم على رقبتها ، شافت معاه لثواني تترجا فيه لكنوا ضغط ،غمض عينيه وباقي يضغط على رقبتها وهي تتخبط ، دموعوا نزلو على خدوا سخونين ، وقت الي حبست تفرفيط عرف الي هو خلاص كمل عليها ، وهكذا يكون قتل زوج رواح فاليوم هذا ، وحدة تستاهل و وحدة معندها حتا ذنب .
نهاية لفلاش باك :
حركتوا بيديها ، شاف معاها وعينيه ذابلين وعيانين كمش ملامحوا ، واخيرا فطن من تفكيرو ، رد على ملامح وجها
آدم : سامحيني .
شافت معاه وتبسمت وكتبت .
هاجر : بالعكس نرتاح مين نحكي .. سامحني نتا إذا قلقتك.
تبسم من فوق قلبوا وقرر يبعد عليها ، إذا مبعدش راح يغرق فيها كتر وراح يكون الماضي عقبة فوجهوا ، طلب منها تجيبلو هاتفو نفذت الشي هذا ، حكموا وكتب ميساج لعاطف بالسيف ،باش يجي ياخذوا .
___________
عند حياة :
بعد ما وصلها ل الدار ،بدلت قشها صلات صلاتها وراحت تشوف واش راهم يعملوا ، عندها شحال مقعدتش معاهم ،توحشت حكاياتهم وضحكاتهم وغيرتهم عليها. لمحتها فالكوزينة طيب وتغسل ف لماعن راحت ليها على صوابع رجليها وحضنتها من اللور ،
صليحة : يا بنتي وقتاه تبطلي هاذ العادة ديما تخلعيني .
حياة : هههه سامحيني ماما ،هاتي عليك نعاونك هاتي .
شافت معاها شوفات وقاتلها .
صليحة : لااا غير متعوليش. هاذي راهي متعتي وراكي عارفة اني نتمتع بالخدمة ،نتي راكي تخرجي وتشوفي وتخدمي وانا هاذي هي خدمتي .
باستها على خدها وقاتلها .
حياة : مي راكي كبرتي يا ماما وانا لازم عليا نعاونك .
صليحة : بووه بووه وين راكي تشوفي فيا كبيرة امخلوقة ، شوفيني شوفيني
دارت توريلها وهي تهدر .
صليحة : شوفي الزين و لاطاي خموس عليا .
ضحكت عليها ورجعت حضنتها تستبن في حنانها ، دخل ل الباب وهو يشوف فيهم ويتبسم ، صح الي هوما راهم 3 فالدار اما بوجودها يحس انهم عايلة كبيرة . قطع عليهم حضنهم وهو يقول .
صلاح : بنتي معليش نهدر معاكي دقيقة .
حياة : اكيد بابا ها راني جايا .اسبقني ل الصالون درك نديرلك قهيوة ونجي .
فرح من اهتمامها ورد عليها برضا .
صلاح : حاضر يا بنتي ،
راح عمل كيما هدرتلو وبقا يستنا فيها تجي ،بعد دقايق جات وهي معبية سنيوة فيها قهيوة وقاطو مستفتهم بإهتمام . هز عليها قهيوتو وشكرها ، قعد قداموا وقاتلو .
حياة : ايه يا بابا تفضل .
صلاح : يا بنتي ياك راكي عارفة معزتك عندنا
___________
عند كريمة :
بعد ما خلصت نسيجوا ،رفعتو وتشوف فيه بإبتسام ورضا ،كان عبارة عن جيلي زهري منسوج وفيه حبات فراولة حتا هوما منسوجين بعناية شكلوا طالع كيوت وظريف، عندها شهر وهي تعمل عليه بكل حب ، تكلمت وحدها بصوت واطي .
كريمة : رايحا نلقاك يا بنتي ونلبسهولك بيديا ، سامحيني يا وتين ،
طبطبت عليها ودخلت ، شافت فالجيلي الزهري المنسوج وكانت سمعت جزء من كلامها شافت فيها بحزن وتكلمت .
سهيلة : يا كريمة يهديك ربي ،خلي الطفلة ترتاح في قبرها وعلاش هاذ الشي الي راكي تعملي فيه لروحك .
شافت معاها بتبسيمة وقاتلها .
كريمة : راني عارفة ، أما على الاقل خلوني نسخايل بنتي وندللها حتا لوكان راهي تحت التراب .
تنهدت بقلة حيلة وخلاتها براحتها .
سهيلة : جيت نخبرك انو دقايق برك ويكون لعشا جاهز .
كريمة : اوك درك شويا نهبط .
بعد ماخرجت وخلاتها ، شافت للحظات مع الجيلي وتكلمت .
كريمة : اتحملي يابنتي وين ماكنتي ، رايحا نلقاك يا وتين
