الحلقة 16 :
بعد 17 سنة .
واقفة في غرفة العمليات مع طبيب التخدير ، وبدات فالعملية تاعها متناسية تماما نظرات الكل ليها من خلف الزجاج ، اتقانها لخدمتها خلا الكل يحترمها خصوصا أنها تعمل كلش بنفسها ... مشكلة النطق مزالت هي هي الي خلاها متقدرش تعتمد على ممرضين في غرفة العمليات ، وحتا ذاكرتها ما استرجعت والو منها ، لحظات برك يجوها تتفكر حوايج مقدرو يوصلوها لوالو، فكت جسد المريض بكل هدوء والغاشي متعجب أول مرة يشوفو الشائعة الي دور عليها وتأكدو انها حقيقية ، هي الوحيدة الي تقدر تفك جسد المريض بدون نزيف دم . كلهم قامو يصفقولها ، وهي متجاهلتهم ، متحبش تكون محط الأنظار ، صحيح الي الكل ظلموها كي جات و بداو يوشوشو ورا ظهرها كيفاش وحدة ما تتكلمش ولات جراحة يعتمد عليها ، وحصلو فالواسطة الي عندها خصوصا انها بنت مدير المستشفى منير سراجي ، الي تولى منصب المدير بعدما توفى السي رشيد وخلالو كل أملاكو أمانة فرقبتو . الا انها قدرت تنفي هاذ الشي وتثبث وجودها وتكون الأحسن والأفضل بينهم الكل .
زفرت بعدما خلصت العملية الي دامت 12 سا ، شافت مع طبيب التخدير تبسمت معاه وخرجت، بعد ما تأكدت من نجاحها ، خرجت جيهة غرفة تبديل الملابس غيرت ملابسها وراحت صوب البيرو تاع باباها، طبطبت كي جاها الرد دخلت راسها وهي تضحك .
منير : تفضلي مدموازال هاجر سراجي .
تبسمت معاه ودخلت . راحت باستو من راسو وقعدت جنبو .
صبلها شويا قهوة وهو يتكلم .
منير : شحال من مرة قتلك متعييليش روحك وخلي العمليا لكبار ليا .
جبدت نفس اللوح الي مدهولها قبل 17 سنة وكتبت فيه جملتها .
هاجر : لالا ، أنا هنا جيت نريحك بابا و انا قادرة على شقايا .
منير : مممم اما انا منحبش نظارتهم ليك ، هكذا راحا تخلقي تنافس كبير وقادرين يحقدو عليك .
هاجر : مممم هاذ الشي هدرو لروحك ، انا خرجت ليك اصلا ، راك حايب نبقا في نفس المستوى منطورش ؟
منير : لالا بالعكس وزيد بشكون نفتخر انا مين نخرج من هاذ المكتب ، اما راني خايف عليكي وليتي تسهري بزاف والنوم ميجيكش من كثرة الكوابيس .
شافت معاه بحنية وقاتلو .
هاجر : عادي بابا والفت .
____________
جاي من برا لبلاد فرحااان وأخيرا وبعد غياب طويل رجع لبلادو وين تربى وزاد ، استنشق لهوا مليح جبد القلادة الي معلقها في رقبتو وتبسم وهو يهدر وحدو .
إلياس : راني حققت حلمي يا قيس وهاذ الشي كامل بفضلك نتا ، مزال نلقاك برك ونوريلك الطابلية تاع الطبة كيفاش تجيني شابة و لبنات يدوخو من زيني هههه .
فلاش باك : 🔷🔷🔷
قيس : خطتي هي كالآتي ، نهربهم ههه
إلياس : كيفاش تهربهم .
قيس : عادي درك زعما فتيحة تلعب روحها مليحة معايا وتلبسني مليح وكلش رايحين نعملو العكس انت تلبس اللبسة الي تمدهالي و انا نبهدل روحي ونعمل روحي بهلول وهكذا ماياخذنيش ، ونتا ماذابيك تعمل حالك ذكي بزاف وتوظف لحوايج الي قريتك فيهم .
إلياس : هههه حاضر ، أما كون تنجح خطتك رايح تواجه مشكلة معاها .
قيس : انت المهم روح و خليك مني .
نهاية لفلاش باك .🔷🔷🔷
تنهد وقال مع روحو
إلياس : هااا راني جيت يا المهندس قيس. نتمنا ما طولتش بزاف عليك .
_____________
كيفاش هذااا على واش راك ناوي آدم .
آدم : كيما سمعت نزدمولهم لمخبأهم
عاطف : أما ما نعرفو والو عليهم البرا صحيح اننا جبنا معلومات لكن ماش كلش هاذي اسمها مخاطرة ، وانا بصراحة مرانيش حايب يزيد جسمي يتخرب بالرصاص .
طلع تريكوه وهو يحكي
عاطف : اصلا مبقاتش بلاصة سليمة تدخل فيها الرصاصة بسلام .
ضحك على صاحبوا وقالو .
آدم : سامحني لكن هاذ المهمة لازم تتنفد .
عاطف : إذا لازم تتنفد أدرسها مليح وخلينا منزربوش رواحنا في كل مرة. قداه من مرة قتلك ماهيش قصة تحكم السلاح وتقتل راهي قصة خطط .
آدم : مممم و واش راهي خطتك هاذ المرة .
ضحك وشاف ل لمرايا الي جنبو ودارلو بيدو باش يشوف معاها هو تاني .
عاطف : هههه الظاهر جا الوقت الي نستعملو سلاحنا الخفي .
نطق بإستغراب وهو مزال يشوف مع لمرايا .
آدم : الي هو ؟
عاطف : جمالنا هههه
ضربو ب بونية على كرشو وناض .
عاطف : عارف عارف انو جسمك مخليه ل الزوجة الكريمة ، لكن ل الضرورة احكام .
جبد ڨارو ينسف فيه وهاذ المرة خلاه يكمل كلامو .
عاطف : راح نخليو الجنس اللطيف هو الي يخبرنا بتفاصيلهم ، يعني قداه راهم ، قداه مساحة مخبأهم ، اسلحتهم ، كلشي ومن الاحسن اذا قدرنا نقرصنوا هواتفهم .
آدم : قصدك نقرصن .
عاطف : هههه انا ونتا واحد يا صاحبي .
آدم : و وين نلقاو هاذ الجنس اللطيف .
قدم ليه وغمزلو وهو يهدر .
عاطف : لحسن حظك درت شويا تحريات وعرفت انهم يتجمعو في بار اسمو **** .
آدم : اوك أما اتوله تسكر وتنسا لواش جايين .
عاطف : حاااضر ، يعني رشفة صغيرة ماراحا تغير والو أما من عيوني .
آدم : معناها هاذ الليلة نروحو تم .
عاطف : أواه خويا ، الشخص المهم يجي غدوة و نظن أنك انتا الي راح تعجبها .
آدم: خلصنا برك غدوة انشاالله، نكونو حداه .
عاطف : اوك
___________
