الحلقة 7 :
وصل لباب الدار جا يحلها جاه اتصال .
منير : ألو وي رشيد .
رشيد : اهلا بالعزيز ، عديت عليك فالمستشفى ملقيتكش ،ماش من عوايدك تروح بلا متفاكر فيا .
منير : ايه والله عندك الحق ،سامحني خويا ليام هاذو برك مارانيش حاس روحي مليح .
رشيد : حاجة باينة يا منير ، من الخدمة وتعبها ، ياك هاجر راهي بخير ولميمة .
منير : ايه الحمدالله لقيتني درك وين دخلت لباب الدار.
رشيد : ايمالا انا نخليك العزيز متنساش تسالي على الحاجة خديجة و هجورة .
منير: يبلغ اخويا وإذا تفوت تتغدا معانا يكون خير وخير .
رشيد : خليها مرة خلاف انشاالله .
منير : انشاالله خويا براحتك ، اتفضل وقت ما تحب .
رد عليك وكوپا ، دخل شم ريحة الماكلة فالدار بقا يعيط عليها حتا طلت عليه من لفوق .
هاجر : باااابااا توحشتك .
قفزت عليه باستو على خدو ،وهو تاني بربشلها شعرها كيما المعتاد وقاللها .
منير : واش هاذ الريحة لبنينة اممممم واقيلا نخليك تولي طباخة كيما راكي باغية .
فرحت من هدرتو بزاااف وهزت عليه حوايجو وهي تشرح وتحكي واش دارت أطباق اليوم ، وكانو كلهم أطباقو المفضلة ، تبسم لإهتمامها بيه ، فكرتو فالمرحومة زوجتو .
هاجر : بابا يا بااابا راك تسمع فيا.
منير : اا ايه بنتي أكيد
___________
حاكم كوانة فالميتم ويهدر ف الهاتف .
: عندك سمانة في يدك تنفد مهمتك ،نسحقها ميتة أي غلط اديرو اعتبر نفسك ميت .
قفل في وجهو الخط بدون رد ، الشي الي خلاه يغلي ، دور بعينيه لقاه جاي جيهتو أفأف وقال في قلبو .
آدم : ففف درك هذا ميخطينيش .
عاطف : اهلا السي لمشنف .
شاف معاه بشوفة ورد عليه .
آدم : واش راك حايب مني ، كل دقيقة تجي عندي .
عاطف : ااا والو ، رتاحتلك برك .
آدم : هههه أنا آخر واحد لازم ترتاحلو .
عاطف : أما نظن رانا في نفس العمر ، انا 13 سنة .
شاف معاه بنص عين وقال .
آدم : إذا جاي تتصاحب معاي سير في طريقك مارانيش تاع صحبة يا ولد الناس ، قادر تخلصها غالية .
شاف معاه عاطف بتحدي وجاوبو .
عاطف : ل الدرجة هاذي ؟
آدم : وأكثر ... إذا راك باغي تعيش أبعد مني .
ناض نفض روحو وراح ، قابلهم جالسين ويحكيو قرب ليهم يسمع في حكايتهم .
إلياس : وي صاحبي واش رايك نهربو من هاذ الميتم .
قيس : و وين نروحو ، لوكان نخرجو ندخلو الطريق العوجة وانا ماناويش.
إلياس : أنا راني حايب نولي طبيب . نتا راك تقرا احتمال كبير تنجح وتبني حياتك ،اما انا لوكان منهربش نفضها لعمر 18 جاهل .
قيس : راح تولي أحسن طبيب راني واثق .
إلياس : انشاالله صاحبي واقيلا راهم جايين جماعة يتكفلوا ولد هاذ السمانة سمعت فتيحة تهدر .
قيس : اممم انشاالله يكونو جماعة ملاح يتكفلوك نتا ويخرجوك من الغرقة .
إلياس : انشالله واحد فينا يا صاحبي .
بقا يشوف ويسمع في حوارهم وهاذ المرة اتأكد من الحاجة الي دور في بالو .
___________
في بلاصة كلها باردة قاعدة في وسط البيت مخبية وجها برجليها وشعرها الي نصو طويل ونصو قصير ،صوتها العذب يتعاود صداه فالغرفة ، كل ما تزيد وتيرة غناها تزيد تحرك في جسمها ، دخلت طبيبة ، طلعت راسها فيها عينيها الي كلهم محوقين جسدها الضعيف و عيونها الذابلين ، شافت مع يدين الطبيبة لقاتها حاملة ابرة كبيرة في يدها ومتوجهة لجيهتها . ناضت بسرعة خايفة بالرغم الي قوتها متلاشية أما قدرت تهرب وتخرج من الباب ، تجري ف الممر و البيبان تتخابط و الناس تعيط و كاين الي يضحك و كاين الي يغني ويشجع فيها ، انطلقت أصوات في كل المبنى خلات جسمها يرعش بعد دقائق كانت محاصرة من خمس طبة تحاماو فيها وعطاوها الإبرة الي كانت بالنسبة ليهم راحة ، خاصة أنها متعبتهم أما بالنسبة ليها عذاااب ، بعد ما مشا مفعولها في جسمها الصغير رجعوها لبيتها الي تعتبر زنزانة ، حطوها في سريرها وربطوها من يديها ورجليها بإحكام ، حطولها أغنية و خرجو وخلاوها في هلوساتها .
