الحلقة 44:
بعد ما خلص فطورو ،لقاها هبطت موجدة روحها تبسمت معاه وقاتلو .
هيا : صباح الخير .
هشام : صباح النور .
رد عليها وتكلم مع خالتو .
هشام : خالتي راني برا نستنا فيكم ،
خرج ، تبسمت بحرقة مكلفش حالو أصلا يسأل على أحوالها ، شافت معاها ماماها وهدرتلها .
سميحة : يلااه بنتي باش منطولوش على الراجل .
سكتت وتبعت يماها ، قفلو باب دار وراهم وراحو ل الطاكسي ، ركبت ماماها من قدام وهي من لورا . ماشيين هو يحكي مع ماماها وهي ساكتة ، ماراهيش مركزة في حكاياتهم . حتا صونا هاتفو ، شاف مع الاسم تبسم ورد .
هشام : الو حياة .
غير سمعت اسمها غمضت عينيها ودورت وجها ل الثاقة تستنشق لهوا ، كمل هو يحكي معاها والفرحة باينا في وجهو ، وهي لو كان تصيب راهي حبست الطاكسي وخرجت ، مين خلص هدرة معاها ،حكا مع خالتو .
هشام : سامحيني خالتي قاطعتك .
سميحة : لالا يا ولدي برااحتك ، و وكتاه ديرولنا العرس انشاالله ونزهاو .
تبسم معاها وردلها .
هشام : والله يا خالتي انا راني حايب ، مي الظاهر لعروسة راهي تدلل شويا .
ختم كلامو بضحكة قتلتها ، كل حرف قالو وعينيه الي تشوف فيهم من لمراية الي لقدام ، خلاوها تتحطم ، تتهلك في صمت ، حبو ليها عذبها والي زاد على عذابها انها لازم متبينش انهيارها ، ردت برجفة تقطع هدرتهم .
هيا : انشالله عن قريب ، خبرنا باش نكونو واجدين ولد خالتي .
شاف معاها وقاللها .
هشام : اكيد ولعقوبة ليك بنت خالتي .
تبسمت معاه وكملت تشوف مع الطريق تخمم ، حتى لدرك راهي حاملة كي يتزوج واش راح يصرا فيها ، دقايق وكانو جنب الدار .
سميحة : شكرا يا ولدي. ماراكش هابط ؟
هبطت وهي تسمع في ردو .
هشام : لالا خالتي ، عندي خدمة نعملها .
سميحة : ربي يعاونك يا ولدي .
هشام : انشاالله ، ياك متحتاجوا والو ،
سميحة : لالا ولدي ،غير ترجع بالسلامة .
تبسم معاها وعاود ركب وديمارا ،
ردت بينها وبين روحها .
هيا : من سرعتو أكيد راه رايح ليها ،
تنهدت وزادت بصوت خفيف .
هيا : ربي يكمللهم ويصبرني .
___________
عند عاطف :
تحرك في مكانو وقرر ليوم يخرج يدور شويا منبعد يروح عند آدم يطمن عليه ، فرز روحو لبس قشو وخرج .
ماشي فالطريق عادي فجأة جاتو بونية ل وجهو . خلات نارو تغلي شكون هذا الي يتجرأ يضربو .
__________
عند هشام :
وصلهم وراح لخدمتو ، في طريق لمح وجه مألوف ليه ، كمل ماشي بالطاكسي يتفكر وين شافو ، للحظة فرينا بالقاوي وخرج قاصدو ، غير ما وصل ليه غدرو ب بونية لوجهو .شافو مين دور ليه والنار لاهبة في عينيه .
عاطف : يا *** شكوووونك نتاااا باش تضرب *****
هشام : انت ماراكش شافي عليا ، لكن أنا راني شافي مليح عليك .
حكمو من الكول تاعو وهو ضاغط على سنيه ورد عليه .
عاطف: ودرك تقدر تقول اني راح نشفا عليك طول حياتي
ورجعلو البونية ، بداو يتقابضو والناس دايرة بيهم ، حتا مين حكملو يديه لزوج قفل عليه وهو يجر فيه لطونوبيلتو .
عاطف : ههههه يا**** بوليسي يا *** .
ركبو فالطاكسي بالقوة وراح بيه لمركز الشرطة.
________
عند حليم :
كان فالمركز في البيرو ديالو ، سمع صوت صراخ برا خرج يشوف الي كاين ، لقا هشام جاي ومعاه واحد مكبلو من يديه ، مين شاف معاه تصدم ، بقا لدقايق تايه فيه ، الشي الي بعد عليه راهو جاي لعندو . قطع تخمامو مين حكا معاه، وعملو التحية .
هشام : حاضرات راني جبتلك أحد المشتبهين الي شفتهم مين رحت لمهمة خاصة تاع عصابات ،
شاف معاه وزاد شاف مع عاطف الي كان واقف ويضحك ببلاهة ، رد عليه بنبرة حادة وبنبرة الأمر .
حليم : أطلقووو
تشوكا من ردة فعلو .
هشام : لكن ..
حليم : قتلك أطلقوا .
هاذ المرة شاف معاه عاطف ، وطاحت عينو في عينيه ، استغرب حتا هو من ردة فعلو وقال في نفسو ، " زعما يكونو شاريينو ، او انو ادم شراه وحطو هنا " تبسم وقال في نفسو اكيد لحكاية هكذا ، قدم هشام فكلو يديه لزوج وشاف معاه بنص عين رجعلو الشوفة وقرب ليه هدرلو .
عاطف: راااح ندمك ، راح ندمك على عملتك هادي ، غير استناني .
دور وجهو متجاهلهم وجا خارج ، حط يدو على فكو يتحسس فيه وهو يهدر ،
عاطف: الكلب خلا جسمي الكل وراح يضرب وجهي ، بفففف .
وقف واحد لتما سقساه واش يكون ، خبرو بإسموا ، تبسم وشكرو وهو يتكلم .
عاطف: وهكذا قدرنا نعرفو اسمك يا سي هشام ، مزالنا نعرفو نقطة ضعفك ونخلفولك الضربة ضربتين هههه.
