الحلقة 61:
خرجت من دار ماشي دارها ، حاكمة في يدو والزغاريت مالية الدنيا ، شافت معاه بنص عين لقات دمعة تسرسبت على خدو ، حست بوجاع في قلبها ، لهاذ الدرجة راهو متحمل ومكمل العرس غير على جال عايلتو ، بالرغم من انها خداتو ،لكنها ولأول مرة تتمنا أنو العرس مشا مليح وكيما حاب خاطرو وما صرا شي .
واقف بعيد يشوف فيه كيفاش خرجها ، يبعت ف ليميساج خايف تكون خطتو كلها راحت فلهوا ، بقا يستنا حتا وصلو ميساج من عندها ، والي عرف بيه انها ماهيش لعروسة ،وانو عرس ب بنت خالتو ، غير باش يتفادى القيل والقال ، شاف فيه لقاه صامد بالرغم من وجيعتو ، تبسم وقال .
عاطف : نشوفو صمودك مين نعرضك لعرسنا وتشوف لعريس الي بدل راي عروستك في أيام قليلة هههه.
_______
عند وسام :
الي جابلها آدم تلفون وحط حراسة شديدة على دار إلياس ، كانت ديما تحكي مع هاجر و هيا ، وفرحانة بصداقتهم خصوصا انو تعدا أسبوع فقط وراهي مرتاحتلهم . بالتحديد هاجر الي حاولت على قد ماتقدر تعرف شخصيتها ، وبعد ما عرفو اسمها الحقيقي وانها فاقدة الذاكرة ،حاولت تشجعها انها تسترجع ذاكرتها بأي شي .
_________
عند إلياس :
الي مزال لدركا يخمم كيفاش يدير في حكاية وتين وأمها ، مكان قادر يعمل حتا شي خصوصا بعد كلام آدم الي اقنعو ، لذلك قرر أنو ينتظر وتين اذا ترجعلها الذاكرة ويشوف لحكاية كيفاش .
_________
عند آدم :
جابها أيام مينعسش وهو تحت دار إلياس يعس في ختو ، حتا من هاجر هملها ، ساعات يفاكر فيه عاطف والي عرف انو علاقتو ب باباه تحسنت، عيطلو وهدر معاه.
عاطف : الو آدم .الليلة المهمة المنتظرة.
آدم : ايه راني نستنا فيها بفارغ الصبر .
عاطف: واش رايك نلبسو حتا حنا أقنعة ؟
آدم : لا ، راني حايبو يشوف وجهي . باش يتحفرلو في راسو مليح مليح .
________
عند وتين :
بقات تعيط لهيا تقلقت عليها ، تلفونها مقفل ، راهي عارفة انو اليوم عرسو ،خايفة على صحبتها بزاف ، قررت تروح من المستشفى على الاقل تشوف اذا تقدر تشوفها من بعيد . جات خارجة تلاقات باباها ف الطريق .
منير : وين راكي رايحا بنتي ؟
جاوبتو فاللوح.
هاجر : عند هيا بابا ،ماراهيش ترد وتقلقت عليها.
شاف مع الجو الي بدا يغيم ،وقاللها ،يلا ، انا نوصلك، عملتلو براسها لالا وقاتلو ف اللوح.
هاجر : منطولش يا بابا ناخذ سيارتك ونجي.
تبسم معاها من فوق قلبو وخلاها تروح.
ركبت وانطلقت بالسيارة ،وهي تسوق وتشوف مع السما وتتكلم في قلبها .
هاجر : الظاهر لعروسة كانت تلحس الكوكوط ، راهي غير تصب .
حاولت تتصل بيها مرة ثانية ، لكن تلفونها طاح بين رجليها ، عوجت روحها باش تجبدو ، مقدرتش ، زادت شويا وين ولات مشايفاش الطريق الي قدامها وبلا ما تفيق دخلت في طاكسي خلاف وخبط راسها فالزجاج ، وسيارتها اتزحلقت وخبطت فالحيط ، شافت لثواني ضباب وفقدت الوعي.
______-
سمع صوت سيارات الاسعاف و لثاني مرة في حياتو قلبو يتقبض ، راح خارج بزربة وهو يدعي انو هاذ المرة يكون احساسو غالط ، شافو إلياس يجري تبعو .
إلياس : دكتور منير .
دور ليه وعينيه تايهين وهو يقول بصوت خفيف .
منير : هاجر ، بنتي هاجر .
تبعو لوين رايح و وقف معاه ، جات سيارة الاسعاف وكيما كان متوقع ، نفس اللقطة متعاودة ، مين شافها إلياس اتخلع وراح يجري مخلي منير وراه منهار ، قدم ليها وهو يتكلم .
إلياس : هاجر ؟؟ هاااجر .
مجاوبتش عليه ، أمر الممرضين انهم يجهزو غرفة العمليات ، الظاهر أنها خذات ضربة في راسها قوية ، شاف مع منير وقالو وهو يصبر فيه .
إلياس : متخافش راهي بخير .
عاونو يروح لغرفتو وين عطاه دوا يهدنو ، حالتو متسمحش انو يبقا فاطن ، حاول يتصل بهيا لكن دون جدوى ، دخل لغرفة العمليات وين بدا يخدم في خدمتو ويحاول أنو ينقذها .
