الحلقة 4:
جا الليل وكل واحد تخبا في سريرو كاين الي فرحان وكاين الي جامي ذاق كلمة فرحة فحياتو وكاين الي نارو شاعلة .كل واحد فيهم يشوف فالدنيا بنظرة أمل نظرة خوف نظرة بقاء . صوت الرعد والبرق الي ملا المكان خلاها تنوض من فراشها خايفة تمشي على صوابع رجليها متوجهة لغرفتها فتحتها بالشوية لقاتها غاطسة فنومها .. بعدت شويا لغطا وتكمشت في حضنها تستبن في ريحتها الي تفكرها بريحة ماماها ، أصلا بالنسبة ليها جداتها هي أمها بعد ما توافات أمها الحقيقة وخلاتها طفلة صغيرة ... للحظات حست بنبضات قلبها تقل ، تخلعت ناضت تتحسس في نفسها .. تنهدت براحة ورجعت لحضنها وهي تتبسم وتخمم في غدوة وفي يومها الجديد مع صديقها الجديد.
في نفس اللحظة صديقها الجديد الي بالنسبة ليه مكان حتا حضن يتخبا فيه من صوت الرعد والبرق ... ناض من بلاصتو وتوجه لكوانة فالبيت لكبيرة الي مليانة ولاد وتكمش في بلاصتو خاايف ومرعوب ... عدا الوقت بالنسبة ليه ليالي ماش ليلة وحدة .
من جهو خلاف غير ما سمع صوتو والرياح تبسم وناض طلع لمكان مكشوف وين يقدر يشوف ويحس بقطرات المطر و ضوء البرق على جسمو وعينيه تنفس يستنشق هوا الجو الي يعشقو ضحكة ضحكة جانبية ورجع لبلاصتو. غدوة نهار كبير ليه راح يبدا في أول مهمة ليه ، بيها قادر يدي بلاصة الزعيم فيوم من الايام و الناس تولي ديرلو ألف حساب وحساب وهذا الي طالبو .
________
طلت الشمس ودخلت أشعتها ضوات الغرفة ناض مدڨدڨ من نومتو ف الأرض قبل ما يفطن مليح باغتتو بماء بارد فوق جسمو الضعيف ، وهي تعيط .
فتيحة : اااااه يا ربيي قداه من مرا نلقااااك متكمش هكذا هنا . نوووض أزرب أفرز البيت و أمشي للأعمال كيفك كي خاوتك .
جاوبها بصوت بردان ويرجف .
قيس : أ أما أنا اليوم عندي قراية وهكذا نتوخر !!
فتيحة : شاااا دخلني في قرايتك أنااا كان المفروض تنوض بكري . يلااا اتحرك أعمال تنظيف وتصليح الميتم أولى .
هبط راسو يشوف مع قشو المبلول و تكلم ببرود.
قيس : حاضر .
ناض بخطوات ثقال جيهة سريرو فتح دولاب صغير من تحتو لقاه فارغ . دور بوجهو ليها وتكلم .
قيس : أما معنديش قش خلاف من غير هذا .
شافت معاه شوفة خوفاتو وتكلمت بحدة .
فتيحة : سلف من عند صاحبك هذاك الياس ول منعرف واش اسمو هو الاخر.
قيس : أما الياس ميلبسش قدي وهو تاني يمكن عندو لبسة وحدة .
ردت عليه بتبسيمة مليانة شر وحقد .
فتيحة : معناها تبقا بيها حتا تشيح عليك وتروح تقرا بيها وتجي .
في هاذي اللحظة بالذات ندم الي رجع يقرى كيفاش راح يقابلهم بنفس اللبسة الي اصلا ضحكو عليها لالا وفوق هذا موسخة وساردة . قطعت تخمامو بخبطة على ظهرو وتكلمت .
فتيحة : يلااا يلاااا للخدمة .
________
من جيهة أخرى ناضت على لمسات حنينة في خدها وتلعب بشعرها تبسمت وفتحت عينيها لقاتها جداتها، قالت بصوت مبحوح من النعاس .
هاجر : صباااح الخير يماا .
خديجة : صباح الخير بنتي .نعستي مليح ؟
هاجر : ايه حمدالله . مممم سامحيني يمكن مخليتكش تنعسي مليح ، دار البرق والرعد وأنا نخاف منهم بزاااف .
خديجة : ياا عمري على بنتي الخوافة .. ياو راني نعست أحلى نعسة في حياتي كيفاش لا وصغرونتي في حضني .
ضحكت وباستها على خدها شافت فالساعة الي جنب سرير جداتها وحلت عينيها بصدمة وهي تعيط .
هاجر : ياااا يماااا توخرت ياااااااه اليوم يزعطوني ومن زهري الكلب نتزعط من الابتدائي .
خديجة : بعقلك يا بنتي راها ساعتي زايدة بنص ساعة متخافيش .
هاجر : اوووف ريحتيني ايمالا نروح ناكل و نصدر روحي باباااي .
هبطت ل الصالة لقات باباها كالعادة قاعد يفطر تبسم معاها وحط صبعو على خذو يطلب في بوستو ، تقدمت ليه بكل حب وباستو بوسة مرصوصة على خدو وقالت .
هاجر : صباح الخير لأجمل أب فالدنيا .
منير : صباح النور بنتي نعستي مليح .
جاوبتو وهي تشرب فالكاس حليب الي قدامها .
هاجر : امممممم
منير : يلا أقعدي خلصي متبقايش واقفة تشربي ممليحش .
هاجر : توصلني اليوم تاني يااااك ؟
منير : لالا بنتي سامحيني اليوم عندي خدمة بكري .
هاجر : ممممم معليش نروح وحدي .
