الحلقة 34:
واقف جنب الميتم الي هرب منو قبل سنين ، شاف مع صاحبوا وقال .
عاطف : واشبيك ،علاه جبتنا هنا ؟؟
مجاوبش عليه ودخل طول من الباب ، حايب يعرف حاجة وحدة . يحوس بعينيه على اي حد كبير يساعدو .
________
وهي سارحة فالنافدة فجأة لقات زوج دخلو وباين عليهم انهم يحوسو على حد ، هيبتوا حست بيها من بعيد ، وقفتوا ونظراتو وتروها وخافت تنزل ، لكن استسلمت لأمرها ونزلت عندهم . توجهت ليهم وهي ترعش من كتلة النار الي رايحا ليها ، استغربت من خوفها مع انها ما عملت شي ، مين وصلت جنبهم تكلمت بصوت ممسموع
سارة : تفضلو تحتاجو شي !؟
شافوا معاها لزوج وتكلم آدم .
آدم : ايه إذا تقدري توصليني ل مسؤول في هاذ الميتم .
سارة : حاليا انا هي المسؤولة ! كاين مشكل او شي ؟
آدم : لا ،
جبد لاكاغط تاع الشرطة وتكلم بصوت يدل على مكانتوا .
آدم : اما نحتاجوا بعض المعلومات ،نتمنا تسعدينا .
شاف معاه عاطف مشوكي ، واش المعلومات هاذي الي تخليه يريسكي ويكذب حتا انو جبد كاغط شرطة مزيفة الشي هاذا يمكن يسببلهم مشاكل ، حمحم وهو يقول .
عاطف : معليش تجي دقيقة ؟
شاف معاه شوفة بمعنى اسكت وخليني نخدم خدمتي .
سكت وخلاه . اما سارة بعد ماشافت كرطو ،ردت عليه باحترام .
سارة : أكيد اتفضل ل البيرو .
تبعوها وعاطف ساكت مافاهم شي ،بقا غير يشوف ل الميتم ويذكر أيامو فيه ، حتا وين وصلوا ل البيرو وقعدو ، طلبتلهم قهوة وقالت .
سارة : فواش نقدر نساعدك ؟
شاف معاها عاطف بمعنى مارانيش عارف شوفي معاه ،نقلت نظرها لآدم الي كمل يهدر بثقة .
آدم : نحتاج نطلع على ملف شخص إذا ممكن ، شخص كان هنا لمدة ،
راحت بكرسيها الي بالعجلات ل وحد الدولاب حلتوا وجبدت الأرشيف لكبير ،بحكم انها من مدة كانت تحوس على اي معلومة دلها على قيس زادت جبدتلو بعض الارشيف تاع مياتم أخرى يمكن يحتاجهم . حطتهملو قدامو وحكات .
سارة : هذا أرشيف هاذ الميتم ، وهذو تاع مياتم أخرى إذا حتاجتيهم .
تبسم معاها وشكرها وبدا يفرز فيهم بعينيه ، وصل ل السنة الي حايب يحوس فيها لكن بدون جدوى ، استغرب وهز راسو وهو يحكي معاها .
آدم : ميكونش كاين نقص فيه ؟
__________
عند إلياس :
توجه ل الغرفة يطمن عليها ،لقاها فاطن وتشوف فالسقف ،طبطب غير بالعقل تولهت ليه عدلت قعدتها وهي مهبطة راسها وتخربط في يديها ، تكلم معاها يطمنها .
إلياس : متخافيش جيت برك نطمن عليك .
تبسمتلو ورجعت هبطت راسها ، شاف مع البيجامة كيفاش جاتها سواسوا وكأنها معمولة خصيصا ليها ، حاب يلطف لجو وقال .
إلياس : الپيجامة جاتك شابة ،
ردت عليه وهي تشوف في پيجامتها الي لدرك وين تولهت واش راهي لابسة ، بانت عليها الفرحة وردتلو .
وسام : شكرا .
إلياس : العفو .
عم السكات فالغرفة ،حس انها ماش مرتاحة بوجودو وقرر يخليها حتا تتعود ويمكن تحكيلو هي وحدها ، قال .
إلياس : وسام إذا حتاجتي شي الدار دارك يعني نوضي براحتك وشوفي الي تحتاجيه ، داكوغ ؟
شافت معاه وعملتلو براسها أوكي وهي تتبسم، تنهد وخرج راجع ل الصالة حكم الهاتف ورن لإدارة المشفى يعتذر منهم ويستأذن منهم لأيام ،حتا يشوف المشكلة.
____________
عند هشام :
وصل ل الدار ، ڨارا الطاكسي تاعو وجا خارج منها ، صونا ثلفونو ،للحظة سها في اسمها وتبسم رد عليها .
هشام : ألو .
حياة : مسلخير .
هشام : مساء النور ،واش حوالكي راكي مليحة ؟ صرات حاجة ، محتاجا شي .
تبسمت خلف الهاتف من اهتمامو ليها وجاوبتو .
حياة : مراهش مسموح ليا نعيط لراجلي غير لكان نحتاج حاجة،؟؟
كلامها وكلمة راجلي عملت فيه عمايل، حرك يديه يلعب في لحيتو وهو يعض على شفافو ،
هشام : متزيديش تقولي هكذا .
حياة : علاش،؟؟
هشام : هكذا نقرب العرس ومتفراش .
سكتت مين حست انها زبلتها وقالت تبدل الموضوع .
