الحلقة 43:
بعد ما جا الطبيب وطمن عليها ، قالو .
: لازمها راحة ، نظن انها تحت ضغط ، كبير ومن الافضل إذا ما هبطتش حرارتها في يونين تاخدها ل المستشفى ،
فؤاد : حاضر ، شكرا . تفضل معاي نوريلك الطريق .
خرج معاه حتا وصلو ل برا شكرو مرة ثانية ورجع عندها ، قعد جنبها على حافة السرير وتكلم بصوت ضعيف .
فؤاد : سامحيني.
باسها من راسها وغطاها ، جا خارج شاف القلادة فوق دولابها ، حكمها وحلها ، لقا صورتهم ،تبسم وقال بصوت خفيف .
فؤاذ : سامحوني نتوما تاني .
رجعها لبلاصتها وخرج .
_________
عند هيا :
جا الصباح تحركت في سريرها ، حتا فطنت ،ناضت عملت روتينها عدلت روحها وهبطت تفطر ، لقات أمها عاملة لفطور وحاطتو على الطاولة .
هيا : يعطيك الصحة ماما .
سميحة : ايه يا بنتي كولي ، باش درك يجي هشام يوصلنا لدار خالتك .
كانت تاكل مين سمعت اسموا شرقت، راحت ليها خبطتها على ظهرها بضربات خفاف وناولتها الماء ،
سميحة : كولي ب لعقل يا بنتي مالكي تقول ضايعة .
جات ترد عليها سمعت صوت الباب يدقدق .
سميحة : هذا ما يكون غير هشام .
راحت جيهة الباب وحلتلو .
هشام : صباح الخير خالتي .
سميحة : صباح الخير يا ولدي ، تفضل تفضل .
هشام : لالا ،راني هنا نستنا فيكم .
سميحة : والله ما صرات يا ولدي ادخل تفطر معانا .
مين سمعت كلامها هربت تجري لبيتها محايباش يشوفها ،
دخل مع خالتو متوجه يفطر معاهم ، مين دخلو لقاو الطابلة كيما راها وهيا مكانش .
سميحة : يا يما مالها هاذ البنت هذا وين كانت تحلق تقول جامي كلات .
حكم الضحكة على جيهة ، عارفها هربت مين سمعت بيه دخل ، من بكري تهرب منو . قعد فوق الطابلة وبدا يفطر غير على وج خالتو وهي ما خلات والو غير وكلتهولو .
__________
عند إلياس :
ناض الصباح صدر فطورها وداهولها ، لقاها فاطنة وغايسة ، شافت معاه تبسمت .
إلياس : يلا افطري باش درك نخرجو نديك ل لبلاصة الي خبرتك عليها ،فرحت وناضت غاطسة ف لفطور الي حداها .
مين خلصت خيرلها لبسة تلبسها وخرج خلاها تلبس ، راح حتا هو لبس وعدل روحو وهو فرحان ، لقاها عدلت روحها هي تاني شاف معاها للحظة تاه في زينها ، فاق من سرحتو وحكا وهو يهرب في عينيه .
إلياس : يلا تبعيني ،
خرجو من باب الدار وركبو فالطونوبيل وديماراو ، مين مشاو شوي لقاو الملصقات وصورها في كل مكان ، حبس بالطاكسي وخرج يتأكد ، حتا منها هي خرجت ، مين شافت صورتها وكلشي تعمرو عينيها بالدموع ، أما هو فصدمتو كانت دوبل تاعها ، شاف معاها وشاف مع التصويرة وقال
إلياس : صح هاذ الشي ؟
جاوبتو براسها بمعنى ايه وهي تشهق .لدرك وين عرف آثار الابر والكدمات الي فيها من واش ، حس بموس ودخل في قلبو ، كيفاش مجنونة وهو يشوف فيها شخص عادي ، كيفاش يكتبو انها خطيرة عن المجتمع وهي كتلة من البراءة والخوف واقفة حداه ، حس برعشتها ،تبسم من فوق قلبو وقدم ليها وقاللها .
إلياس : يلاه نرجعو ل الطاكسي ، ياك قتلك عندنا بلاصة نروحولها .
رجعت معاه وهي تخمم في نظراتو ليها وفي واش راح يدير ، أكيد يخليها او يعيطلهم ويجو يديوها يرجعوها لنفس المكان ، شافت معاه ومع لبلاصة الي قربو يوصلو ليها ، وقررت في نفسها .
اما بالنسبة ل إلياس الي عقب طول الطريق يخمم في معاناتها و وجاعها وفي كمية الحزن الي عاشتو ، كبس على قبضتو وحلف أنو يوقف في وجه أي حد يقرب ليها ، وراح يبدا بالملصقات ڨاع ينحيهم ،يا لوكان يدور لبلاد كاملة . وصلو وهبطو ،حس بيها مش على بعضها ،بالرغم من انو المكان مليح والجو مليح لكن نظراتها خلاتو يخاف ، نطق يمحي السكون الي صرا .
إلياس : تبقاي هنا ، نروح نحوس على حطب ونجيك .
وسام : اوك .
غير ما راح شافت ل الجبل الي قدامها وراحت ليه ، وصلت عندو وبدات تتسلق كل مرة تمشي خطوة وتضحك حالفة اليوم تنهي هاذ العذاب الي راهي فيه ، حتا مين تحب تكون أنانية وتبقا معاه اكيد يقتلوه كيما قتلو سهام من قبل .
رجع ل لبلاصة الي خلاها فيها ملقاهاش ، طلق من يديه الحطب الي جمعو ويديه يرعشو ، شاف من ومن لمح خيالها فوق جبل تتسلق فيه ، بلا ما يخمم راح يجري ليها . لحق عليها على الحافة رافعة يديها وتضحك .
إلياس : وسام وسام تعيشي
شافت معاه بحرقة وقالت .
وسام : ا انا مجنونة ، مانيش حايبتك تموت بسبتي ، ا انا خاطيني هوما هوما الي ردوني هكذا ، محال نخليهم يأذوك محال ،
إلياس : لا ، شوفي فيا شوفي حالتي ،واش راح يصرالي إذا قفزتي من تم ؟ راني ندخل لذاك المستشفى عادي ، تعيشي ارواحي
وسام : لا مجنونة انا مجنونة .
إلياس : لوكان تحصري وتجي نحكيلك حكايتي ، نحكيلك لغز الي عندي عوام نحل فيه ، ارواحي نبينلك الي نتي ماش مجنونة ، ارواحي وخلينا نحلوه مع بعض وتشوفي بلي نتي انسانة عادية .
كلاموا خلاها ترجع لخطوات ، مين شافها بعدت على الحافة راح جبدها من يدها ليه وحضنها بقوة .
إلياس : نوعدك ، ابقاي معايا برك ونوعدك واحد ما يمس شعرة منك .
