الحلقة 3 :
عند هاجر ومنير :
بعد ما ركبو انطلقو صوب دارهم فتحت الكارو وخرجت راسها وتضحك بفرح ، شاف مع بنتو استغرب فرحتها من بعد تفكر حكاية البنت لجديدة ضحك و قاللها .
منير : سبب الضحك هذا والفرح واقيلا تحقت الأمنية .
دخلت راسها من الكارو وشافت معاه وعملتلو إشارة أسكت ، شاف معاها مفهمش واش تقصد . مخلاتوش يخمم وقالاتلو .
هاجر : ايه جا ماش جات ، أما هههه هايل هايل .
منير : مالكي يا بنت راكي مخوفتني .
هاجر : والو بابا ياك تعرفني نحب الغموض والمغامرات .
منير : ايه أما واش دخل هاذي في هاذي .
هاجر : سر ، ههههه .
تبسم وخلاها براحتها .. ساعات تفاجؤو بتخمامها و عقلها لكبير وأفكارها المشاغبة وصلو لباب دارهم و هبطو راحت تجري سبقتو وفتحت الباب لقاتها في وجها تستنا فيها .
هاجر : يمااااا خديجة يااااي .
قفزت تجري لحضنها كانت متوحشتها بزااااف، ضحكت عليها وخربطتلها شعرها وقالت .
خديجة : ايه يا بنتي شاراكي تاكلي راكي سمنتي شووفي شوووفي مانيش قادرة نعبيك .
دخل لقا أمو هازة هاجر في يديها و الفرحة ماش سايعتها حياها وقاللها .
منير : ايه شفتي يا الحاجة راهي غير تبلع وتبلع .
دورت هاجر لباباها وشافت معاه شوفة ضحكاتو وهدرت بدلال .
هاجر : وااشنوو لالا يماا متصدقيهش كليت غير شويا بزااف ماكلة .
خديجة : هههه شويا بزاف برك ؟
هاجر : ايه بزاف وحدة برك
خديجة : هههه وكي تاكلي بزاف شا تقولي .
هاجر : هههه نقول كليت بزاااف بزاااف .
خديجة : هههه نتي غير كولي باش تكبري وتوليلي كيما باباك طبيبة .
منير : لالا يما هااجر تولي الشي الي راهي حايباتو .
شاف معاها وتبسم بثقة، ردت عليهم .
هاجر : ايييه أكيد راني حايبة نولي طباااخة .
شاف معاها ومع أمو الي حاكمة الضحكة بصدمة وقال .
منير : ااا بنتي شا قالت يماك اه وي وي بنتي تولي طبيبة انشاالله.
خديجة : هههه إذا خليتها تقرر فالعمر هذا راك راح تخسر .
منير : الحمدالله اقتنعت ، من دركا نوجدلها بلاصتها هههه .
شافت معاهم وسمطتهم وراحت للمطبخ هزت أدوات الطبخ وضحكت وقالت بينها وبين روحها .
هااجر : مممم يا هاجر رايحا تولي أحسن طباخة فالبلاد
---------
في غابة موحشة صوت الذيابة يتسمع و الرياح كان قاعد في بلاصتو يتنفس بالجهد الي عندو ، لوشام الي مالي يديه الصغار ، الكدمات الزرقا الي في جسمو كاين منهم الجديد ولقديم فمو المجروح و حالتو الي تبكي لحجر ، بالرغم من كل هاذ الشي عينيه كالصقر تحرق أي واحد يشوف معاه، يشوف لنقطة بعيدة ف البيت الباردة الي راهو فيها ويتبسم بشر ،فجأة حل الباب ودخل وهو هاز حديدة يكركر فيها على أمل يخاف منو .
حامد : مازالك مخشن راسك ؟ مديتلك مهمة وحدة مقادرش تعملها . ؟؟ املا صدر روحك للمهمة الجاية .
شاف معاه نظرة خلاتو يترعد في بلاصتو ، طفل صغير بعمر 13 سنة قدر يخلي الزعيم يرعش ،رد عليه بصوت خشين أكبر من عمرو .
: مارانيش قابل .
صدمو بالاجابة توقع بعد هاذ التعذيب والضرب الي خذاه راح يقبل أي حاجة يقولهالو . توقف لفترة يخمم في حاجة كيفاه ينوض البركان الي داخلو أما وفي نص تخمامو قالو .
: قابل بحاجة وحدة .
شاف معاه حامد بحيرة وقال .
حامد : الي هي ؟
: يكون فالمهمة قتل .
بقا ربع ساعة يشوف فييه وفي عينيه يدور ويجي فالبيت صحيح هو كان حاب منو ينفذلو مهام مي ماش المهام الي يختصو فيها لكبار ، معرفش إذا يقدر يريسكي ول لا . أخيرا وبعد تفكير قالو .
حامد : وانا قابل أما تغلط غلطة تموت .
ضحك ضحكة تعاودت في البيت وفي أذهان الزعيم
: موافق .
_________
عند قيس:
بعد ما برد قلبو من لبكا شاف لبرا لصا لبنات دايرين ويلعبو ألعاب خاصة بيهم . قرر يخرج يلعب هو تاني أصلا عندهم هاذ النهار برك المسموح بيه . هز روحو وهبط لتحت ڨابلهم يتفرج فيهم ويتبسم .
شافو من بعيد يشوف مع لبنات ويتبسم جا يجري ليه وضربو بقوة لظهرو .
قيس : اخخخخ يا ظهري
إلياس : ياااااا رخيس كي نقلك ايا تلعب معانا متبغيش ودركا راك تڨابر فلبنات واقيلاا راهي خاطفتلك قلبك وحدة .
قيس : إلياس يرحم باباك أخطيني .
إلياس : أولا ، معنديش بابا ، ثانيا مارانيش خاطيك حتا تخبرني واش تعلمت اليوم فالمدرسة .
شاف معاه شوفة وقالو.
قيس : والو حصة تعارف برك .
إلياس : مممم متنساش راك وعدتني أي حاجة تقراها تعلمهالي مانيش حاب نخرج جاهل .
قيس : ايه متخافش ، انا لدرك مفهمتش كيفاش قبلو طلبي أني نقرا ونتوما عندكم مدة تحاولو ومحبولكمش .
إلياس : معليش كل واحد ومكتوبو خو المهم خلينا من لقرايا وخبرني شكون فيهم عجبتك .
قيس : حتا وحدة . راني نخمم في حياتنا وحياة لبنات .
إلياس : واش الفرق ؟
قيس : هوما كي يخرجو من الميتم على الاقل يروحو يزوجو يضمنو بلاصة ، أو يخدموهم في بلاصة بسبة زينهم مي حنا يا صاحبي الدود ياكلنا .
إلياس : اواه لالا ، حياة لبنات صعيبة علينا ،وين رايحين يباتو وياكلو والذياب لبرا تستنا فيهم ، الحمدالله الي جيت ولد .
شاف مع صاحبو الي قنعو بكلامو شويا. وقالو
قيس : لوكان فيوم نتفرقو انا ونتا متنساش تحوس عليا .
إلياس : أكيد صاحبي كونك هاني مي هاذ القاعدة تنطبق علينا لزوج .
تبسم معاه وقالو أوكي وكملو يتفرجو وكل واحد تايه في حياتو الي من صغرهم يخمو فيها بقنطة .
