الحلقة 11 :
هروبو من الميتم ما بدل والو في حياتو غير أنو زادو شقا على شقا، قعد يرتاح ياخد فالنفس ، جاه يعيط ويزفر فيه .
👨: راك قااااعد الخدمة لفوق راسنا ونتا قاااعد ، يلاااا زاارب حرك روحك ول والله العظيم ماراك مدي حقك اليوم .
شاف معاه شوفة كلها حقد .
عاطف : رااك قلتها حقي ونديه بسيف عليك .
👨: اييييه ربحنا وليت ترجع فالصرف تاني ، ولد تاع 14 سنة يتحداني أنا يلاااااه وريلي شطارتك كيفاش تدي حقك .
بعد ما كمل كلامو بالتحديد طاح جثة هامدة ، رمش مرات و هو يشوف فيه يسبح في دمو و دور راسو ل الراجل الضخم الي أطلق عليه النار .
👔 : اذا راك باغي حقك ، تلقاه عندنا .
راح وخلاه مصدوم في عمرو ، لثواني نسا وين راه
وشكون هو أما فطنو صوتو كيف رجع قالو .
👔: تبعني بسكات ، الزعيم يحتاجك .
تكلم مع روحو وهو نايض ومتبعو .
عاطف : الزعيم ؟ شكون هذا واش يحتاج مني ، ممم من الافضل نسكت ونتبعو .
_____________
في دار كبيرة معدلة على الشعرة كل حاجة في بلاصتها ، كل ركن فيها يحوي مكتبة وفيها كتب طبية، هذا واش كان يحلم ... كان واقف عند واحد فيهم يقرا فيه بتمعن ، قاطعتو الخادمة بصوتها .
👩: موسيو إلياس ، باباك فالقاعة لكبيرة يستنا فيك .
شاف معاها و رجع لكتاب لبلاصتو بعدما خلا ورقة مطوية فيه تعرفو بالصفحة الي حبس فيها ، وراح جيهة الصالة ، غير ما وصل تم طبطب ودخل ، لقاه قاعد و في يدو ڨارو ينسف فيه وتكلم.
سمير : حوست عليه كيما خبرتني يا ولدي أما والوو وكأنو الأرض بلعتو .
تنهد بعد كلام باباه ورد عليه .
إلياس : مرانيش عارف وين راه و واشمن موصيبة حط روحو فيها .
سمير : معليش وليدي ، مراحش نحبس ونكمل نحوس عليه .
إلياس : حوست عليه ف المستشفيات ؟
سمير : أكيد حتى أني إستعنت بمكانتي ، ولكن دون جدوى ، راك متأكد أنو مخرجش خارج لبلاد ؟ .
إلياس : مارانيش عارف.
بقا يتفكر ف كلامو الي كان بالنسبة ليه فرج أما اليوم الذنب راهو قاتلو .
فلاش باك : 🔷🔷🔷
إلياس : كييييفاش ، أما راهم جاو يتكفلوا بيك نتا على حسب علمي .
قيس : إيه ، أما سمعت الي هو طبيب معروف ، و نتا حلمك تولي طبيب يعني راح يعاونك و رانا كبار يا إلياس ماشي ديما يجو فرص هكذا.
إلياس : راني عارف لكن ..
قيس : أشت ، متقليش لكن ، أنا متخافش عليا راني نقرا مين نوصل 18 سنة نخدم على روحي و نبني مستقبلي ، لكن نتا الي لازم تغتنم هاذ الفرصة . على حسب ما سمعت راجل طيب ، وجاي يتكفل طفل باش ياخد مكانو كطبيب كي يكبر .
قعد يسمع فيه وقلبو ماطاوعوش بزاف كيفاه راح يفضل روحو على صاحبو ، حتا هو معدي بمشاكل وصعاب ماشي خاطر يقرى معناها راهو أفضل منو .
قيس : راني نهدر معاك ، مكالاه تلعب روحك الصاحب المغوار ، خمم فروحك هاذ المرة برك يا صاحبي و خود رايي ، وانشاالله راح نبقاو على تواصل ، حتا نهار نشوفك طبيب و انا كاش مهندس ول .
ضحكو بكلامو وخلاه يقتنع شويا بالفكرة رد عليه .
إلياس : راني موافق ، اما الظاهر أنو فتيحة مركزة عليك، ورايحا تمدك ليهم .
قيس : امممم ايه ، متخافش عندي خطة قرب ليا .
قرب من صاحبو الي يعتبرو خوه وبقا يسمع في الخطة الي راح تغير مستقبلهم لزوج .
نهاية لفلاش باك : 🔷🔷🔷
سمع صوت من بعيد يناديه إليااااس يا إلياااس .فجأة انتبه
سمير : يا ولدي وين رحت .
إلياس : اه اسمحلي يا سي سمير.
شاف معاه نظرة عتاب وقالو .
سمير : مازالنا ف السي سمير .
إلياس : هههه أسمحلي يا بابا ، سهيت ف الماضي شويا .
سمير : معليش يا ولدي ، روح تكمل قرايتك انشاالله نشوفك فالمستقبل أفضل طبيب .
إلياس : انشاالله .
____________
بعد ما تبعو حبس جنب سيارة سودا كلها والرجال برا حارسينها وقالو .
👔 : تفضل .
شاف معاه لدقائق ودخل . مع دخل ل السيارة تصدم من الشخص الي يشوف فيه قدامو ، هدر بصوت متقطع .
عاطف : ن نتاااا ؟
طفا الڨارو في صحن صغير كان حداه وجاوبو .
آدم : إيه أنا ، ودرك رانا لزوج 14 سنة ، نظن درك نقدرو نتعرفو مليح .
مدلو يدو يخمس عليه أما هاذ المرة الي تردد مكانش آدم كيما فالماضي هاذ المرة عاطف هو الي متردد ، ولكن وبدون حيلة خمس معاه .
آدم : علابالي في راسك أسئلة بزاف أما أهم حاجة لازم تعرفها ،أنك الوحيد الي نقدر ندير فيه كونفيونس درك .راح تكون يدي اليمنى في كلش وراح نواجهو هاذ العالم حنا لزوج ، ومن جيهة المال و الظلم متخافش درك راه عندي نفوذ ومال ومع الوقت كل ما نكبرو رايح يزيد ويزيد .حتا نحقق غايتي .
عاطف : نقطع عليك أحلامك بسؤال برك بسيط من هذاك النهار وهو يتعاود في ذهني .
تبسم معاه كان علابالو ومتأكد أنو راح يعاودلو السؤال ، رد عليه بحركة بوجهو المعنى تاعها أنو يتكلم .
عاطف : هذاك المسدس الي قبل عام كان لعبة ول صح ؟
ضحك ضحكة من قلبو وعرف الي هو حافظو وفاهمو حسب مراقبتو ليه هاذ العام قدر يعرف واش نوع الأشخاص هو وجاوبو ،
آدم : بالرغم من أني جاوبتك على هاذ السؤال هذاك الوقت ، أما مكانش مشكل نعاود نجاوبك ، إيه صح .
صدمتو وتوقعو كان في محلو ، قالو بصوت يرجف وهو يشوف فيه يجبد في ڨارو جديد ويشعل فيه .
عاطف: معناها نتا نتا الي قتلتها ؟؟؟
زفر الدخان في كل السيارة و جاوبو .
آدم : إييه أنا الي قتلتها .
