الحلقة 69 :
إلياس : كيفاش مكانش ؟؟ وين راحت .
هيا : مانيش عارفة حوست السبيطار كامل ، ماراهيش هنا.
إلياس : صحا راني جاي.
قفل من عندها وعيط ل آسر .
آسر : وي؟
إلياس: وتين .
آسر: واشبيها؟؟
إلياس : مراهيش فالسبيطار.
آسر: وشنووو.
قفل عليه وراح بزربة راجع ل السبيطار ، غير ما وصل لقا هيا حاطة يديها على راسها ، دقايق و وصل إلياس تاني ،
آسر: كيفاش مراهيش هنا.
هيا: نضت نبدل قشي ،رجعت لقيتها مكانش.
آسر : كيفاااااش تخليها وحدهاا علااااه خليناكي هنا حنا.
كالماه إلياس ، لكن الجنون طلعولو ، قرب ليه بزربة بعد ما شافهم وسمع هدرتهم وقال وهو موجه لكلام ليه.
هشام: آخر مرة .. آخر مرة تعيط عليها راك فاهم.
بعد عليه ،وين تمالك روحو ،رايح جاي يخمم وين ممكن تروح ، لدارهم ؟ ماهوش عارف وماقادرش يتأكد ، عيط لمنير ، الي جاوبو على طول.
منير : وي ولدي آدم كاش ما صرا؟؟؟
آسر : حبيت نسقسيك عمي ،هاجر مجاتش عندكم ؟
ناض من قعدتو وجاوبو وهو يرعش.
منير : عندنا؟؟؟ علاش وين راهي.
آسر: هذا الي رانا حابين نعرفوه، ملقيناهاش فالسبيطار.
غلق عليه وراح ل المستشفى هو تاني ، غير ما وصل لقاهم تم والغرفة فارغة . حكم في راسو حتى هو وقعد فالارض فاشل، قدم ليه آسر الي قرر يحكيلو كلشي.
آسر: عمي معليش تجي معاي دقيقة نحتاجك في أمر مهم.
منير : اوك ، تفضل لمكتبي.
مشا معاه مخليهم وراه ، إلياس الي ما فاهم شي ، و هشام الي راح عند هيا يحكي.
هشام: راكي مليحة ؟
عملتلو براسها ايه، تبسم وقاللها.
هشام: ماديريش في بالك ، ماشي نتيا السبة ،
هيا: لوكان مغبتش عليها ،ميصراش هكذا.
هشام: ونتي متبدلي قشك ما ترتاحي؟ نحي هاذ الفكرة من راسك، ودرك نلقاوها .
هيا: انشالله.
حكمها من يديها يكركر فيها، شافت معاه بمعنى وين مديني، قرا عينيها وقاللها.
هشام: لدارنا ، ماراكيش حايبا ترتاحي؟
كلمة دارنا خلات شي فيها يريح. تبسمت وكملت معاه، بعد ما ودعت إلياس و وصاتو أي شي يصرا يخبرها ، غير ما وصلو ل الطاكسي ،شاف معاها وقال.
هشام: وهذا إلياس ديما يحكي معاك ؟
هيا: كيفاش؟؟
هشام : نقصي هدرة معاه.
استغربت وقاتلو.
هيا: نهدر معاه غير على الخدمة.
هشام: ايه نقصي راكي على اسمي درك، منسحقكش تهدري بزاف لابغا بسباب الخدمة.
هبطت راسها وشافت مع الطريق، غير سهات شويا غفات بلا متحس ، شافها كيفاه ناعسة وشعرها طايح على وجها ، تبسم وقرب يدو مبعدهولها .
_________
عند منير:
منير: ك كيفاش؟؟؟؟ واش راك تقول يا ولدي.
آسر : كيما سمعت عمي هاذي هي الحقيقة.
حكم في راسو ماشي مصدق ،انو قيس صديق بنتو الي حوس عليه بزاف كان قدامو ، وانو هاجر بنتو ماتت بسباب هاذ الشي ، جاوه الدموع في عينيه محملش الفكرة. قطع صدمتو مين قالو.
آسر : مانيش حايبك تدي عليها نظرة ماش مليحة ، حتا هي ضحية ، واكثر وحدة عانات وبنتك ربي يرحمها كانت بزاف تحبها.
منير : الي قتل بنتي ، نتمنى أنو يتحاسب.
آسر : مديرش في بالك ، حنا والشرطة رانا مكثفين كلشي وانشالله نحكموه وياخذ عقابو ، وراح نقتلو بيديا.
تبسم معاه وقالو.
منير : متلوثش يديك بيه، عمرو الانتقام ما طفا الجمرة الي فينا ، خليه يرشى فالحبوسات.
عملو براسو حاضر ، بالرغم من انو قاعد يخمم في كيفاش يقتلو ، ولوكان يقتللها باباها واش تكون ردة فعلها ؟ و وين راهي ؟
________
عند وتين :
واقفة فوق قبرها وتبكي ، أيامهم الكل جاو في راسها ، كيفاش عاملتها وكيفاش تقبلتها وصاحبتها ، هدرت بصوت يرجف شي من البرد الي خرب جسمها وشي من وجاعها ،
وتين : سامحيني ، سامحيني يا هاجر .
هبطت على ركبتها ، هزت حفنة من التراب وتشم فيه ، وتبكي ،
وتين: علاش لازم تموتو علاش ، مكفانيش قيس خويا وروحي مات بسبابي ، تزيديني نتيا؟ راني نهبل هكذا ، علاش ماشي انا الي في بلاصتو وبلاصتك علاش؟
نعست قدام قبرها ودموعها مالية وجها.
__________
عند وسام:
الي وصلها إلياس وراح ، شافت مع روحها ف لمراية وهي تضحك ، تشوف مع تفاصيلها وتقول.
وسام : راهو قال اني نشبهلك يا ماما ، ديما كنت حايبة نعرفك شكون نتي ،وعلاش خليتيني ،ظلمتك ، ظلمتكم في راسي ، والحقيقة كانت شي تاني ، نزلت دمعة من عينها وهي تتفكر واش جوزت الكل في هذاك المكان ، تكلمت وهي تشوف مع روحها .
وسام : كيفاش كانت رايحا تكون حياتي ؟ طفولتي ؟ لوكان مصراش الي صرا .
شافت مع السما ودعات ربي وشكرتو ، على الأقل دركا راهو عندها خوها ، سند ليها ، مين تخاف تروح تتخبا ورا ظهرو ، ومتأكدة 100% أنو يحرق الدنيا على جالها . صونا تلفونها الي لقاتو إلياس ، تبسمت من قلبها حتا هو أجمل حاجة صرات معاها ، ردت عليه .
وسام : وين راك ؟ وين رحت ؟
إلياس : متخافيش راني جاي ، دقايق ونكون فالدار ، كاش ما درتي عشا ،راني ميت بالجوع.
تبسمت وقاتلو .
وسام : لا ، مين ذقت ماكلتي حلفت منزيدش نطيب غير لوكان تعلمت ، مانيش حابا نقتلك .
إلياس : ههههه نوغمال أنا راني قابل نموت ونتي علاه.
وسام : بعيد الشر عليك.
إلياس : مممم راني جاي.
كوپات عليه ، وفكرة أنها تخسر واحد فيهم دمرها ، تفكرت الشي الي يستنا فيهم وخدمة خوها رعشت ، دخلت لرقمو وعيطتلو ، وحتا منو هو ريپوندا بسرعة.
آسر: وي وسام بيكي حاجة ؟
وسام: حبيت نطمن عليك برك.
آسر : يا عمري على ختي الصغيرة الي تخاف عليا .
تبسمت وهبطت راسها. عرفها حشمت منو
آسر: راني بخير ، راجع ل الدار نريح .
وسام : آسر ، أوعدني خويا .
آسر : وعد .
وسام : مقلت حتا شي عدا.
آسر : وعد على كلشي ،نتي أطلبي برك وانا نفد.
ضحكت وقاتلو .
