الحلقة 58:
عند آدم وإلياس :
هبطو مع بعض جيهتها ، غير شافها من بعيد حب يروح يحضنها حاب يشم ريحتها الي تحرم منها ، حاب يحس بعايلة كيفو كيما أي شخص ، دركا راهي كل عايلتو ،وماراح يخلي حتا حاجة تقيسها . انتبه ل الي قاعدين معاها ، للحظة سها وهو يشوف في هاجر قاعدة جنب ختو وتضحك، شاف معاه إلياس وكأنو يختبر ويشوف في ردة فعلو مين شافها. قدمو ليهم الشي الي خلاهم يتولهو ، مين شافتو جا قفزت لعندو حضنتو بكل نية وكأنها طفلة صغيرة ، الشي الي خلا آدم يغلي ،تمنا يكون في بلاصتو ، شاف معاه شوفة تاع بعد يديك منها ، لكن إلياس جاكرو وفرفشلها شعرها الشي الي خلاها تدمع وتقلو .
وسام : وعلاااش ،فزدتهولي إلياس .
إلياس : معليش نزيد نديرهالك .
ليه ليه ضحكت وراحت بكيتها ، قدم ليها ونحاها من بين دراعو وهو يعدللها في شعرها ويحكي .
آدم : أي حاجة تحتاجيها وسام راني هنا ، راني نعيطلك بتلفون إلياس ، حتا مين نجيبلك واحد خلاف .
هبط لمستواها وتبسم، وهي حايرة فيه لكن داخلها مرتاحة والاحساس الي تحسو كي يكون جنبها احساس آخر . ضحكت وقاتلو .
وسام : داكوغ .
حمحمو قدامهم الشي الي خلاهم ينتبهو .تكلم إلياس .
إلياس : مرسي هيا مرسي هاجر .
شاف مع هاجر لقاها تشوف بنظرات لآدم الي كان مركز مع ختو ، بعد ما توله حكا معاها .
آدم : هاجر راكي مليحة ؟
عملتلو براسها إيه .
آدم : وجاع راسك خف ؟
زادت عملتلو براسها إيه وهي تشوف ليديه الي مزال حاطهم على ظهر وسام . شافت مع هيا بمعنى نروحو ،وهيا قرات عينيها وقالت.
هيا : حنا نروحو برك ، وسام انشالله نزيدو نتلقاو مرة أخرى ونقصرو.
وسام : باباي ،
راحو وخلاوهم وحدهم دورت ليها وقاتلها .
هيا : شكون هذاك ؟ وين يعرفك ؟ وأما وجاع راس؟ ومالكي كليتيه بعينيك .
شافت معاها وعينيها مدمعين . عملتلها حركة بكتافها بمعنى منعرف.
مين شافتها هكاك ذاتها ل غرفة وبقات معاها تهدن فيها وتقرا فواش تكتبلها
هيا : هذا نفسو الشخص الي حكيتيلي عليه ؟ ممم بوقوص ا ختي يقتل بالزين ، تتوالمو .
كتبتلها ف اللوح.
هاجر : مشفتيهش كيفاش يشوف معاها ؟
هيا : منعرف شوفاتو جيهتها حسيتهم بمعنى خلاف .
هاجر : الي هو ؟
هيا : مارانيش عارفه بالتحديد ،لكن نظن أنو شوفات إلياس جيهتها هوما الي فيهم شك، أما آدم مارانيش عارفه حسيتهم شوفات أب لبنتو.
كتبتلها فاللوح وعملتلها بيدها لصدرها.
هاجر : أويلي. مين بنتو راهي قريب قدو وقدنا.
ضحكت على صحبتها وقاتلها.
هيا : يا ختي تعبير مجازي مجازي ، مازالكي حابسة فاللغة العربية ، بالرغم من ذكاءك.
.
_____________
عند إلياس و آدم :
بعد ما راحو هيا وهاجر ، شافو مع بعض شوفات، جبد وسام لجيهتو وهو يخبرها .
إلياس : وسام روحي ل الطاكسي اركبي درك نجي.
ودعت آدم وراحت عملت الي يقولهولها مين شافها ركبت حكمو من الڤاسث تاعو بغش وهو يحكي.
إلياس : بما أنك عارف هاجر فأكيد عارف الشبه الي بينها وبين قيس ،علاااش مخبرتنيش ،متأكد أنك تعمدت الشي هذا وهاذي هي الحاجة الي كان راح يهدرها عاطف وحبستو بكلامك.
نحالو يديه منو وقال .
آدم : لأنو بكل بساطة ذيك البنت فاقدة الذاكرة وقاعدة في دار وبلاصة ماشي تاعها ، وانك تعرف فأكيد راح تربش وتخربطلها كلشي وانا راني نحذر فيك رد بالك تقدم ليها هاجر خط أحمر كيفها كي اختي رد بالك دخلها في حكايات قيس . وبالمناسبة هاك نتا تاني شفتها ومخبرتنيش ، شفت كيفاش مام نتا عندك أسرار .
طلقو وماقال حتا شي ، كلامو كلو صحيح حتا هو عندو أسرار ،وزيد بزيادة راهو عرف منو انها فاقدة الذاكرة وأكيد الدكتور منير ماشي بوها ،تنفس بالجهد وراح ركب فالطاكسي ،شاف مع وسام لقاها نعست ،فتح الظرف الثاني وكيما توقع ، الاختبار متطابق معناها هاجر هي وتين أخت صاحبو قيس الي يحوس عليه . راهو لقا عيلتو ، المالكي. قيس المالكي. مي يبقا السؤال مطروح علاه راهم حاطين في بالهم وتين ميتة . الشي هذا راهو مهبلو . خبا الورقة وديمارا مخلي لغبار وراه.
_________
عند كريمة :
كانت طل من الشباك بعد ما حست روحها بخير ، خبرتو ، ماهيش مرتاحة هنا لازم ترجع ل الدار ، مين قاتلو جا خداها هو من داك السبيطار ، وهي خارجة من الباب لمحت زوج بنات قاعدين ،مقابلينها بظهورهم ، حست بإحساس وفمها هدر كلمة " وتين" ، مين سمعها قالتها ضغط على يديها حتا توجعت وزرب في خطواتو وهي الدموع تحجرو في عينيها مقدرتش لابغا ترجع تتأكد منها ، وصلو ل لقصر ، حبس ودخلها ، مين قفل باب البيت بدا يعيط عليها .
فؤاذ : وكتاااه تحبسي من تخيلاتك هاذي في كل مرة نخرجك فيها اي وحدة تشوفيها تسخايليها بنتك.
كريمة : أما هاذ المرة شي ثاني والله شي ثاني.
فؤاذ : حبسي وتين أنا نحوس عليها ماشي نتي ،
فتح الباب وخرج وهو خابطها ، خلاتو ينطق بصوت عالي وهو الي اكره حاجة عندو هاذ الموضوع.
_______
عند عاطف :
قرر يروح عند آدم لقصرو ، مين وصل فتحولو الباب عارفينو صاحب الوحش ويدو اليمنى ،ومكانتو كيفو ، تقدم لغرفة آدم بعد ما تعدى على أنظارهم الخايفة ، فتحها ودخل ، واحد متجرأ يقلو انو ممنوع يدخل ليها ، قعد فالفوثاي الي جنب النافدة وبقا يستناه يجي ، ميل راسو شويا مين لمح حاجة تحت السرير ، راح ليها جبذها . قراها بصوت عالي وهو يشوف معاها بصدمة .
عاطف: العميل آسر الرحماني ، مكتب التحقيقات الفيديرالي.
