الحلقة 29 :
عند إلياس :
بعد ماخرج بزربة راح لأقرب مكان يبيعو فيه قش وبدا يشريلها ، شرالها پيجامات لقاهم مناسبين لجسدها النحيف ، وزاد فوقهم لبس تاع برا يشري ويتوقع كيفاش يكون ذوقها ، شاف مع ساعتوا لقا روحو توخر خرج يجري وهو يخمم كيفاش راح يدير معاها، و واش راحا تكون حكايتها .
____________
عند سارة :
قدمت ليها وهي تشوف مع حالتها ، حست بإحساس شفقة اتجاهها ، نحاتلها ثيابها وهي تشوف في جسدها الي كلو كدمات وتورمات ،حتا من ليطراس تاع الابر معبية جسمها الكل، استغربت وتساألت واش نوع هاذ الإبر ، تبسمت بسخرية مين جات في بالها فكرة وتكلمت بصوت خافت .
سارة : اففف الظاهر فيها مدمنة مخدرات او شي مثل هكذا ، لما يجي لازم نقلو موحال نخليها تبقا معاه هنا ،من ثيابها واضح انها معندها شي واكيد رايحا تنصب عليه ، هذا إذا مارماتش روحها على سيارتو بالعاني .
جاها تخمام خلاف انو ممكن تكون فاطنة وعاملة روحها غايبة عن الوعي ، حركتها بيدها بحركات مستفزة وراقبت تنفسها ، لكن بدون جدوى .
سارة : اممم راهي في عالم خلاف .
سمعت الباب تحل تبسمت عرفتوا جا ،اصلا ماهيش عارفة علاش خرج، راحت عندو، حبستو وهي مانعتو انو يدخل شاف معاها بإستغراب عملتلو براسها إشارة تخبرو انو يبعد ، بعد كيما قاتلو وهو فرحان في بالو فطنت ومحبتش دير الحس عليها .هدر معاها وهو يتبسم .
إلياس : واش راهي فاطنة ؟
شافت فرحتو ،و لاحت عينيها ليديه الي حاملين بزاف حوايج ، محبتش تسألوا وجاوبت على سؤالو .
سارة : لالا ،لكن ممكن تكون فاطنة ، يعني مانيش عارفة نخبرك راني حاسة انها مخادعة او شي هكذا ، متكونش رمات روحها عليك بالدمة ؟؟ .
شاف مااها مستغرب تخمامها وقاللها .
إلياس : لا مستحيل ، علاش خممتي هكذا .
سارة : صراحة شفت جسدها كلو كدمات وآثار الابر في كل جسدها وكأنها تضربها بعشوائية . يعني مستحيل تكون عادية فكرت انها ممكن تكون تاع مخدرات ،ويمكن جايا تنصب عليك .
تبسم معاها من فوق قلبو ، شكرها بهدوء على خوفها وقاللها .
إلياس : مرسي سارة ،لكن راني متاكد أنو حكايتها حاجة خلاف .
قاطع كلامهم صوت صراخ جاي من الغرفة الي فيها البنت ، شافوا مع بعض وتحركوا صوبها ، غير ما دخلو فالباب لقاوها تعيط حاكمة كوانة في السرير ومخبيا وجها ، شافت معاهم نظرات ذابلة وقلبتها تضحك .
سارة : ودركا أمنتني ؟
عمل روحو مسمعهاش وراح مقرب ناحيتها .
_________
عند عاطف :
بقا دقائق في سرير. يخمم ، كمية الشبه بينهم مش طبيعية ، احتمال كبير تكون اختوا او من عايلتو ، زعما يكونوا هوما عايلتو وهو ما فيبالوش ؟ شاف مع لادراس الي ف الميساج وكتبها في ورقة وخباها ، هكذا إذا شافوا صدفة او شاف صاحبو إلياس يخبروا . بقا سارح يتفكر فأيام الميتم ، صح كانوا عذاب لكن حلاوة المكان مينكرهاش ، جات في بالو تبسم وقال في قلبوا ،
عاطف : نتمنا تكوني في حياة جديدة وباهية على قد نيتك يا حياة،
رجع راسوا لورا سند على وسادتوا وبدا يخمم فيها يحاول يذكر وجها لكن بدون فائدة تفاصيلها راحوا من بالو ، ماهوش عارف علاش ، يمكن راسو محا تفاصيلها باش ميحنش لذاك المكان او على خاطر كانت بزاف حشامة لدرجة انو مدققش في وجها ابدا ، وبعد مرور الوقت تلاشات من راسو . حكا بصوت واطي مع نفسوا .
عاطف،: زعما لوكان نشوفها نعرفها ؟ بعد مرور هاذ لعوام كامل .
__________
عند آدم :
كانت مهتمة بيه لأقصى درجة ، حتا من السي منير مقصرش معاه ، جايا عندو بعد ما عمرتلو كاس باش يشرب دواه ، ساعدتو ف الجلوس وناولتو حبة وبقات تشرب فيه ، وهو ساهي فيها. كل قوتو وجبرتو قدامها يتلاشاو ، هدر بصوت منخفض موجه كلاموا ليها حاب يعرف واش صرالها و واش جابها لهاذ الدار .
آدم : مانيش عارف علاه شايفك متشبهيش خلاص لباباك ! يمكن تشبهي ل يماك لالا ؟
حس برعشتها ، هربت عينيها منو لكن هو قدر يشوف الدمعات الي خانوها ، شافت جيهة لوحها وبدات تكتبلو .
هاجر : مكنتش عارفة انو هاذ الشي باين ، اول مرة حد يلاحظ
رد عليها وهو اصلا عارف هاذ الشي أما حاب يوصل ل القصة .
آدم : واش يلاحظ ؟
هاجر : أني ماش بنتوا الحقيقية
