الحلقة 66:
بعد ما عملو عرس كبير ، وبعد ما عقد عليها وخلاص صارت مرتو ، ف الاوراق فقط ،لأنو قاللها وهو يطمن فيها انو بعد أشهر يطلقها ، حرقة في قلبها وهي تشوف في الدار الي كان من المفروض تكون ليه ولحبيبة قلبو حياة ، قال بصوت مهموم وعيان.
هشام : خوذي راحتك هيا ، اختاري اي بيت حايبة تبقاي فيها ، وانا راني رايح نعمل دوش نفطن شويا .
عملتلو براسها ايه ، وراحت جيهة غرفة من بابها المميز عرفت انها الغرفة الاساسية ، دخلت لقات الورد في كل بلاصة ، خانتها دمعة من عينها ،ومن وراها نزلو دموع ، قعدت على ركبتها وبدات تبكي ،
مين راح ل الدوش تذكر أنو نسا قشو ، رجع ل البيت جا يحلها شافها قاعدة وتبكي ، وجعو قلبو عليها اكيد كانت تخطط لأحلام بزاف و اكيد تحب شخص آخر ، راهو قتلها بهاذ القرار ، حس روحو أناني ، حتا وين سمعها تهدر وحدها ،ومع كل كلمة تقولها صدمتو تزيد .
هيا : يا ربي ، يا ربي خليه يعدي هاذ المحنة ، يا ربي متخليهش يضعف وقويه ، عارفه انو يتوجع ، عارفه انها ماشي ساهلة في دقيقة تكون أسعد واحد وبعدها كل أحلامك تتهدم . يا ربي منقدرش نشوفو هكا ، صح نحبو ونعشقو ،لكني كنت نتمنا من كل قلبي ياخد البنت الي حبها ويكون فرحان ، صح تعذبت وتهلكت لكن شوفتو هكذا زادت قتلتني .
وقف لثواني يسمع فكلامها ويستوعب فيه، تكلم بينو وبين روحو .
هشام : يعني تحبني ؟ كيفاش مقدرتش نعرف كيفاش كل تصرفاتها كانت باينة .
تذكر مين كانت تشوفو تطلع حمرة وتهرب ، تحكي وراسها فالأرض ، معاهم الكل شخصيتها غير ومعاه كتلة حشمة واقفة وساكتة. للحظة تبسم وهو يخمم فيها، وفي كلامها، حل الباب بشويا وبقا يشوف مع ملامحها وكانت هاذي اول مرة يدقق مع تفاصيلها الي تخلي أي شخص يتسحر ، تنهد وقفل الباب وهو رايح ل الدوش.
وقفت وقعدت على السرير ، ذكرت هاتفها جبدت وشعلتو ، اكيد تكون هاجر عيطتلها ، حتا هي راهي حابا تحكي وتفرغ قلبها ، مين شعلتو لقات مكالمات من هاجر و من إلياس و من ممرضات خلاف تعرفهم ، ترددت والخوف الي حست بيه خلاها ترعش . تكات على اسمها لكن بدون جدوى مكانش رد ، تكات على اسمو ،وين صونا وجاها الرد .
إلياس : ألو هيا .
هيا : إلياس كاش ما صرا ؟؟
إلياس : شوفي متتخلعيش، وتين ، اه نقصد هاجر هاجر عملت حادث .
هيا : وشنووو.
مخلاتوش يكمل وقفزت كيما راها خارجة ، ناسيا لاغوب الي راهي لابستها وناسية كلشي ، خرج من الدوش لقاها خارجة من البيت وعينيها حمر من لبكا ومتوجهة ل الباب ، عيط عليها لكنها في عالم خلاف مسمعتوش .
هشام : هياا؟؟؟
راح وراها لحق عليها وسحبها لعندو وين تخبطت فيه ، بقات لثواني تشوف مع عينيه وهو تاني، قطع شرودهم مين قال.
هشام : وين راكي رايحا ؟ واش هاذ الحالة ؟ واش صرا.
هيا : لازم لاازم نروح ل السبيطار درك ، تعيش هشام وصلني ل السبيطار تعيش .
هشام : اتهدني ،واش صرا .
جاوبتو وهي تبكي
هيا : صاحبتي ، صاحبتي عملت حادث.
هشام : يلا .
خرجو وركبها فالطاكسي وانطلقو ل السبيطار.
________
قطع على هيا وتكلم.
إلياس : ودرك المشكلة الكبرى وتين .
شاف معاه آسر وقالو .
آسر : وتين ما عندها حتا ذنب غير أنها بنت شخص ميعرفش الرحمة ، راني حاب نشوفها .
إلياس : رانا كامل رايحين نشوفوها حتا من هيا صحبتها راهي جايا ل السبيطار.
وسام : معناها يلا نروحو .
عاطف: نجي معاكم .
ركبو كامل فالطاكسي وديماراو قاصدينها ، أما آسر في راسو حاجة وحدة أنو يحميها حتا هي ، بنت صغيرة عندها ما عانات . بعد نصف ساعة وصلو ل السبيطار ، هبطو كلهم وتوجهو لغرفتها ، مين وصلو لقاو هيا بلاغوب بلونش ودموعها يسيلو ، استعجبو واول وحدة قدمت ليها كانت وسام.
وسام : هيا !
شافت معاها ،تلاحت في حضنها وهي تبكي .
هيا : وساام ، هاجر هاجر .
وسام : متخافيش إلياس قالي أنو راح تفطن وانها عدات مرحلة الخطر ، لكن نتي واش صرا ؟ واش هاذ اللبسة ؟؟
شاف معاه شوفة وتبسم ، رجعلو بدورو التبسيمة ، قدم ليه وهدر .
عاطف: رانا رجعنا تلاقينا ، الظاهر انو عرسك كان اليوم.
شاف معاه من فوق لتحت و دور وجهو جيهة خلاف ، ماراهوش قادر يتقلق كتر من هكا . مين شافو مقلب قدم ليه وزاد قال .
عاطف: حبيت نخبرك انو بما أنك زميل بابا فالشغل ، راك معروض لعرسي ، غدوة .
هشام : بالبراكة عليك.
عاطف: بلاك متجيش كل العرس راهو على جالك.
وغمزو ، استغرب واش راه يقول هذا لكنو محبش يدقق في كلامو، شاف مع هيا لقاها مزالت تبكي في حضن وحدة خلاف وفي كوانة كاين راجل ومرة كبيرة فلعمر حتى هوما يبكو خرج الممرض من الغرفة قاطعهم الكل وهو يقول
: دكتور إلياس ،
إلياس : انعم ؟
: الظاهر انها راحا تفطن .
الكل ناض مسحو دموعهم و حاولو يدخلو ، منعهم و دخل هو اللول ، بعد دقايق خرج وقال ل منير و خديجة يدخلو عندها، بما انها بدات تتحرك دليل على انها رايحا تفطن.
باقي يشوف معاها من الزجاج ويتبسم بحرقة ، كيفاش راح يدير مع هاذ الحب الي راهو في قلبو جيهتها ، حتى من هي حس بإهتمامها وحبها ، خبط بيدو جيهة قلبو وتكلم بصوت واطي .
آسر : مالقيت ما تعشق يا آسر غير بنت عدووك.
