الحلقة 31 :
عند إلياس :
قدم ليها بشويا ، مين جا يحط يدو على شعرها تخبات وهي ترعش ، حس بحزن كبير ، ردة فعلها خلاتوا يعرف الي هي هاربة من حد تكلم معاها بصوت هادي
إلياس : متخافيش ، ماراحين نديرولك والو
رجعت شافت معاه بعينيها الي كلهم حمر ،شي من التعب وشي من لبكا ،
إلياس : شوفي ..
بعد عليها وهو رافع يديه فالسما بمعنى انو مراح يدير والو .مين شافتوا هكذا تعدلت في قعدتها وبينت وجها الكل ، تبسم وكمل يحكي معاها .
إلياس : أنا إلياس ، وهاذي سارة ، لقيتك برا دايخا ترجيتيني نبعدك على لبلاصة ، نفذت أمرك وجبتك هنا ، نتمنى منكونش عديت حدودي .
بعد كلاموا تذكرت الي هي هربت من كابوسها ، شافت مع الغرفة الي راهي فيها ومع يديها ، بعد ثانية بدات تضرب في وجها بيديها كفوف ، باش تعرف إذا راهي تحلم ول لالا ، مين شاف منظرها هكذاك تقدم ليها ،وهو يهدن فيها .
إلياس : اشش اشش ، علاش راكي تضربي في روحك .
شافت معاه ولأول مرة قدر يسمع صوتها مليح .
وسام : و وسام انا .
إلياس : كيفاش مسمعتش مليح سامحيني
وسام : اسمي ، اسمي وسام .
تبسم معاها وقال .
إلياس : عاشت الأسامي ، اسمك بزاف شباب وخارج عليك . اما علاش كنتي تضربي في روحك كفوف .
حطت يدها على وجها بحنية وتوجعت وكأنوا وجاع ضرباتها حست بيهم متأخرين ، ضحك على ردة فعلها وفهمها .نطق بضحكة .
إلياس : ممم مراكيش مأمنة ياك ؟
تبسمت معاه مين فهمها بلا ما تحكي ، حست بإحساس الراحة وهي جنبوا . ناض واقف مقابل سارة ويخاطبهم لزوج .
إلياس : مارانيش حاب نكتر عليكي وسام من الاحسن تبدلي قشك واذا راكي حايبا تدوشي خبري سارة تساعدك ، سارة من فضلك ساعديها وخيرك مننساهش ختي .
مين قاللها كلمة ختي معجبهاش الحالة وشافت في وسام نظرات قاتلة ، لوكان راهي شبعتها ضرب ،نظراتو ليها محملتهاش ،بالرغم من انها عرفتو في مدة قصيرة لكن هي الي شافتو قبل . ردت عليه .
سارة : بلا مزية ، اذا راك باغي نبات هنا عادي جدا .
إلياس : لالا ،من الاحسن تروحي مانيش حاب نعطلك على خدمتك .
حست انو نشعها بكلاموا ، هبطت راسها وجاوبتو .
سارة : اوكي معناها نعاون وسام و نروح انشاالله .
حكم كيس من الاكياس الي شراهم ومدهملها وهو يهدر .
إلياس : راني شريتلها پيجامات خيريلها وحدة تكون مريحة وعاونيها تلبسها .
سارة : اوكي .
دور لوسام وتبسم معاها وهي بدورها ردتلو التبسيمة .
___________
عند حياة :
حياة : أكيد بابا ، طول عمركم جامي خليتوني محتاجة حاجة .
صلاح : اذا وعلاه يا بنتي تبكي وحدك وتعاني وحدك ، خبرينا مالكي يا بنتي رانا حنا تاني نتقلقوا .
هبطت راسها حشمانة و عيانة حايبا تفرغ قلبها اما متقدرش ، قطع تفكيرها مكمل كلامو .
صلاح : يا بنتي إذا عندك مشاكل مع هشام خبريني انا نتصرف ، متخافيش راني ديما في كتفك و ورا ظهرك .
شافت معاه ومسحت دموعها الي هبطو وجاوبتو .
حياة : لالا ، هشام ماعملي حتا شي ،حتا هو مسكين راه ملاحظ حزني . والله يا بابا راني رايحا نطوفا حاسة بخنقة فيا .
صلاح : وعلاش .
شافت معاه وقاتلو .
حياة : ساعات يا بابا عقلك يقلك حاجة وقلبك يقلك حاجة خلاف ، لوكان تتحط في موقف هكذا واش تختار .
شاف معاها وقال .
صلاح : نختار عقلي .
متوقعتش انو يجاوبها هكا
حياة : وعلاش ؟ يمكن جوابك يفيدني .
صلاح : مين تختاري قلبك معناها عقلك راهو رافض الاختيار لأنك حطيتي احتمالين ، وهكذا قلبك راح ينضر بزاف ورايحا تبقاي تعاني ، أما مين تختاري عقلك راح قلبك يبرا يا بنتي وينطاع لأوامر عقلك ، الحب يا بنتي ما عندو وين يوصل ، الحب ميكونش فالقلب ، الحب يكون فالعقل ، مين عقلك يحب شخص يخليك ديما تخمي وديمي تفكري ويسكنوا في قلبك ، الحب هو عقلك و الدار الي يسكنها هو القلب . اذا عقلك قالك انو هاذ الخيار خاطئ راح يخرجو من الدار غصب عليه .
حياة : واذا راهو ساكن مليح لدرجة انو تعشش في القلب وماهوش حايب يرحل .
صلاح : هنا يا بنتي هزي راسك ويديك ل السما وادعي ، ادعي ربي يبينلك طريقك .
تبسمت بعد ما كلمتوا حست براحة كبيرة ،بالرغم من انو ماسألهاش عن التفاصيل الى انو قدر يفهم معاناتها ويواسيها بطريقة حلوة .ناضت بعد ماشكرتوا وقامت رايحا لبيتها تتوضا وتصلي ، قاطعت طريقها امها وهي تقللها .
صليحة : لكن انا عندي راي خلاف .
شافت معاها بضحكة عارفتها كانت تصنت عليهم وجاوبتها .
حياة : الي هو ؟
صليحة : بكل بساطة اذا حصلتي بين القلب والعقل ،طيشيهم لزوج وروحي مثلا ل الكبدة راه كاين اعضاء بزاف فالجسم .
ضحكت من قلبها على هدرتها وباستها من خدها وقاتلها .
حياة : نجرب هههه .
خلاتها مشات لبيتها وهي تشوف معاها بحزن قاطع شرودها وهو يتكلم .
صلاح : الظاهر انها تحب حد خلاف .
صليحة : ايه والمشكلة لكبيرة هشام ، هشام مكانش كيفو وراني متمنيتو هو الصراحة .
صلاح : الي يجيبها ربي،فيها خير متخميش بزاف .
صليحة : انشاالله
