الحلقة 74:
يسمع في كلامها ومزال ماشي مستوعب ، دمعة هبطت من عينو ، مقدرش لابغا يحرك روحو ، انهار تماما ، كيفاش راحا يقلها انو خوها مات ، كيفاش راح تتحمل وكيفاش راح يتحمل حتا هو ، ساعدوه الرجال وانسحبو من المنطقة . شافت معاهم بحزن والدمعة سالت على خدها ، صونا تلفونها ردت عليه .
فؤاذ: صحيتي بنتي ، هكذا نحبك تاكلي الاخضر واليابس ، ودرك مازالت اختو هههه راني حاب نشوف ردة فعلها مين تشوف جثة خوها.
_______
عند عاطف:
وصل ل المستشفى هبط بسرعة ،وراح يحوس عليها ، لقا باباها صلاح وامها صليحة قاعدين.
عاطف: عمي ، عمتي .
صلاح: اهلا ولدي ، راهي دخلت لغرفة العمليات ، الولادة مبكرة . أدعي يا ولدي.
بقا يروح ويجي ، فرحتو انو واخيرا راح يشوف بنتو ، ومن جيهة خوفو عليها . بعد ساعة خرجت الطبيبة تنادي عليهم ، راحو كلهم تجمعو عليها وهو اولهم والابتسامة في وجهو .
عاطف: مرتي مرتي راهي بخير ؟؟ بنتي ؟
شافت معاه بنظرة ،خوفتهم الكل ، قالت وهي تصبر فيه .
: بنتك بخير ، لكن مرتك .. البقاء لله عظم الله أجركم.
كلامها خلاه واقف ل5 دقايق يستوعب ، صراخ امها وانهيار بوها كملو على مابيه ، يعاود في كلامها الي قالتو ضحك ضحكات وتوجه ل غرفة العمليات وين سمع صراخ بنتو ، كانو الممرضات واقفين قدام جسدها الممدود ، تبسيمة على شفافها خلاتو للحظة يرجع الأمل ، قدم ناحيتها وحكى وهو يتبسم.
عاطف: حياة ، يا حياتي راكي تسمعي فيها هههه راهي جات بنتنا جات أميرة بوها وامها ، حياة جاوبيني تعيشي ، جاوبيني مديريليش هكذا ،
بدا يبكي كي الولد الصغير وهو مكمل يحكي .
عاطف: نوضي نوضي والله وعد مني ما نزيد نقلقك ، نوضي تعيشي علاه راكي ناعسة ، شوفي فيا مازال ما خبرتكش اني نحبك ، شوفي شوفي كيفاش راني خايف عليكي ، هيا نوضي ،بلا متعذبيني ، مانيش قادر على لخسارة .
قدم ليه باباه حليم بعد ما سمع وجا ل المستشفى حط يدو فوق كتفو تكلم .
حليم : عظم الله أجرك ولدي ، ربي يعطيك الصبر .
كلام بوه خلاه يفطن ويشوف الحقيقة قدامو ، طاح على جسدها كي الطفل الصغير وهو يبكي ويشهق ، صوت بكاه مع صوت بكا بنتو الي فقدت أمها في اول ثانية من حياتها .
قدم ليه باباها وهو يبكي ومدلو ورقة ، وهو يقول .
صلاح: وصاتني نمدهالك لوكان تصرالها كاش حاجة .
شاف ليه ماش مصدق ، هز الورقة وحلها وياريتو ما حلها.
{ عاطف ، يا حبي وعشقي وكل حياتي ، حبيتك من اول يوم ، نتا كنت السند ليا والاخ والصديق والصاحب الي عوضني عن الايام السودة والجحيم الي كنت فيه ، سامحني لأني خليتك ورحت ، سامحني لأني خبيت عليك ، سامحني لأني كنت انانية ومقتلكش انو حملي خطير وخيروني بين روحي والي في بطني ، احساس الامومة غلبني ومقدرتش نقتل بنتي ، سامحني يا عمري علابالي راح تلومني بعد ما تقرا هاذ الرسالة ، علابالي شحال تعذبت في صغرك وانا اول وحدة عاذرتك ، علابالي أنو بنتي رايحا تعيش كالملكة وراح تعوضها وتمدلها الحنان الي مديناهش انا ونتا فذاك الميتم ، ايه انا هي حياة ، حياة نفسها ، حياة الي عشنا مع بعض فالميتم ، حياة الي كانت مين تصرالها حاجة تجري تتخبا وراك ونتا بدورك تحميها ، شخصيتك انا اول وحدة تعرفها على هاذي حبيتك حبيتك من قلبي ، يوم لقيتني فالملهى ،كنت جايزة شفتك بعد سنين بالرغم من كلشي هبطت نحوس عليك مالاتياش بنظرات الناس ليا، يوم خليت خطيبي فيوم عرسنا وخيرتك نتا ،ماشي خاطر انا خاينة وطيحتني في حبك في سمانة ، راني نحبك من سنين ،من الي فتحت عينيا ولقيت روحي بين جدران الميتم ، نوصيك يا قلبي على بنتي ، متخليهاش تشتاق حنان امها ، كون ليها كيما كنت نتا ليا في صغري ، كون ليها الام والاب والصديقة والاخ والاخت ، راه اليتم واعر ونتا عارفو ، نحبك ، سامحني وخبر بنتي انها احلى حاجة صرات في حياتي ،خبرها انو امها تموت عليها ، وعلمها الدين والصلاة والقرآن ، بلااك بلاااك تطيح وتخليها وحدها ، كنت راح نقلك اتزوج ، لكن قلبي يوجعني من الفكرة ، ههه نحبك واش ندير ؟ نغير عليك لابغا تحت التراب . سلام يا عاطف }.
حياة .
هبط طايح فاقد الوعي . وهو يرجف ، قدم ليه باباه وهو يتكلم .
حليم : ولدي ؟ عاطف،؟
زحف جيهة جسدها جبدو من السرير الي كانت فيه وحطها في كرنو وبقا يحكي وهو يحرك فيها كيما الدراري الصغار مين ينعسو .
عاطف: نوضي نوضي ماتروحيش يا قلبي نوضي،
طلع راسو لسما وهو حاضنها بالقوة ،ويحكي ويبكي بالصوت .
عاطف: يااا ربي نتوسل لييييييك ياااااربي فطني من هاذ الكابوس ، فطني ،
قدمها ليه يشم في ريحتها وعيط عيطة كلها وجاع.
عاطف : اااااااااااااااه
