الحلقة 23 :
في بيت كبير وين كانت مرا جالسة في كرسي و تنسج ف لخيوط الي قدامها كل عقدة تعملها تحب تعمل عقدة ثانية أعقد منها ، بالنسبة ليها حياتها كالخيط الي تنسج فيه كل ما مر عليهم الوقت كل ما زادو تشبثو في بعض واستحالة انو يتفك . فجأة وهي ساهية في تخمامها غفلة على قطها الي راه يلعب جنبها سحب الخيط ومع كل خطوة يخطوها العقد تتحل ، تبسمت نص تبسيمة وقالت تخاطب الخادمة الي جنبها .
كريمة : زعما يجي نهار والمشاكل الي في حياتي يتحلو وبلمسة من شخص واحد ؟
شافت معاها بحزن وجاوبت وكأنها تواسي فيها .
سهيلة : انشاالله يا كريمة انتي أدعي برك ، أكيد ربي راح يرجعلك ولدك قيس بخير.
تبسمت لكلام الخادمة الي معتبرتها صاحبتها الوحيدة ، اصلا معندهاش قرار في حياتها ما تقدر تخرج ماتقدر تتعرف على عباد ، محبوسة في قصر وهو يتحكم فيها ، حتا من أولادها تحرمت منهم ، ردت عليها بصوت مبحاح .
كريمة : أما ولدي مااات مااات ولدي .
على جملتها الأخيرة دخل وهو يردد بصوووووت عالي .
فؤاد : كرييييييييمة .
صوتو خلا سهيلة تنوض تجري للمطبخ و كل الخدم يتمركز في بلاصتو ، أما هي فعرفت واش هدرت وتكلمت بصوت .
كريمة : الي نقصدو نعرف الي ولدي مات ، مكالاه نبقاو نحوسو عليه .
شاف معاها بشوي رضا وجاوبها .
فؤاد : متخافيش انشاالله نلقاوه .
تبسمت من فوق قلبها وجبدت سنسلة من صدرها فيها حرف { و } فتحتها وبقات تشوف مع الصورة الي فيها وتتبسم ، ناضت من مكانها وراحت جيهة غرفتها دخلت ،شافت فالدولاب الي جنبها وجبدت قلادة خلاف أما هاذ المرة فيها صورة توأم ومن وراها مكتوب قيس ، وتين . باست الصورة وهبطو دموعها وتذكرت الي عندها شحال مراحتش ل القبر . خرجت من غرفتها تحوس عليه ، لقاتو جالس وبينو الخدم ، هدرت بصوت عالي وهي تشوف مع عينيه .
كريمة : من فضلك خليني نروح لمقبرة العايلة .
شاف مع الخدم الي كانو كلهم مشغولين وشاف معاها ورد عليها .
فؤاد : روحي أما مطوليش ، اتولهي على روحك وعلى لسانك .
تبسمت من فوق قلبها وهزت روحها وخرجت من داك لقفص قاصدة الجبانة، كان مستنيها الشوفور برا فتحلها الباب ركبت وديمارا. عارف وجهتها بلا ما تخبرو. بعد دقائق كانت قدام مقبرة العائلة ، دخلت متجاهلة القبور الكل وعينها في قبر صغير في آخر الجبانة محطوط عليه الورد الأحمر ، وقفت حداه وعينيها بلشو ينزلو الدموع ، قرات بصوت عالي الإسم الي مكتوب على لقبر وهي تبكي وتتحسر ، { وتين المالكي } . هبطت على ركبتها تبكي وتهز في تراب لقبر تشم فيه وتحكي . سامحيني يا بنتي ، سامحيني يا وتين ، سامحني يا قيس سامحني يا ولدي .
_______________
عند عاطف :
بعد ما هربت منو، بقا لدقائق يشوف في خيالها ، حاجة فيها خلاتو يتزعزع أما مبينلهاش خصوصا انو ميعرفهاش، قلبو يوجع ،احساس مفهموش ، تعجب منها ،مخلاتوش لابغا يرد وهربت ، دخل ل الملهى ، حوس الدنيا كاملة عليه وملقاهش بقا يرن كيف كيف ،استسلم ورجع ل الدار ، تنهد ودخل ينعس وقلبو ممطمنوش
. جا الصباح بزربة ، نوضتو أشعة الشمس الي دخلت لغرفتو ، تحرك في بلاصتو عدة مرات .. ناض مخلوع وراح لغرفة آدم ملقاهش ، زاد دخلو الشك وبقا يعيط ويعاود . لا رد . قرر يدخل يدوش ويبدل قشو ويروح يحوس عليه .
خرج من الدوش وهو لاف فوطة على نص جسمو ، عضلاتو باينين وقطرات الماء تسيح من شعرو ، فرفش شعرو بحركة من يدو وتوجه ل لمراية يشوف في حالو ، تبسم تبسيمة كلها قهر وتعب وهو يشوف في جسمو الي مليان وشام . وعلامات الرصاص الي متوزع عليه . زفر بالقاوي وراح جيهة خزانتو ، جبد ثيابو بيد و اليد لخرا ماسك بيها هاتفو يحاول يكلمو . أما بدون جدوى ، أفأف وقال مع روحو .
عاطف : وييييين رااااه هذااا وييييين ، انشاالله ميكونش صرالو حاجة .
___________
عند حياة الي عڨبتها ليلة كاملة تبكي ، راحت عندو برجليها ومعرفهاش ،ضحكت ضحكات خذلان وحست بالذنب انها خرجت بدون علم والديها وخطيبها . حتا من تخمامها فيه خلاها تحس انها تخونو. لكنو شعور أقوى منها ناضت استغفرت وصلاة صلاتها ورتلت شويا قرآن ، بعد ما خلصت دوشت وخرجت لبست ثيابها، قابلت لمرايا كل شويا تشوف مع روحها تروح وتجي تحفظ في ملامحها تشوف مع زينها الي مخبيتو تحت حجابها لعريض ، سموريتها و الي زايد محليها الفوساث الي على خدها زادت فيها النص ، تبسمت برضا على حالها وقالت بصوت واطي .
حياة : أكيد مراحش يعرفك يا حياة، العوام يغيرو العبد وزيد من فوقها ميتوقعش نكون مسلمة على عكسو هو .
تبسمت تبسيمة حزينة . تمنات لوكان تربا في عايلة مسلمة ومحافظة على عاداتها كيما عايلتها . تمنات لوكان يرجع بيها الوقت وتقابلو وتحكيلو على دينها وعلى المغزى من العبادة والطاعة . أما درك مستحيل تقدر تحكي معاه حرف .
