خبايا الزمن

الجزء 295

خبايا الزمن 🥀
#بارت-295...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

طه: ربحتيه!
رؤيا:لا ماشي أنا نتا لي ربحتيه.. و الا سالا لعب نوض تنعس غدا فايقين بكري..
عبدالعزيز: اوا شنو نقول الأم و ولدها تحاميتو.. و لكن مدايزش..
طه تيشوف فعبدالعزيز: لعبو انا وياك هاد الطرح..
رؤيا: طه! بيتك.. يلاه تنعس مخاصكش تبقى فايق لوقت معطل.. (باستفزاز) الا صفاء ولفاتك هادشي فماماك غادي تبدل النظام

طه خنزر فيها..

رؤيا بأمر: يلاه نوض تنعس..
عبدالعزيز مسح ليه على راسو: سمع لماماك! غدا نلعب معاك..

غير سالا هضرتو و غمزو ناض من بلاصتو معصب و رؤيا تابعاه طلع للجناح و سد الباب وراه مزال رؤيا مدخلاتش لعندو بحالا سد ليها على وجهها و هي تنفس بهدوء..

رؤيا: باقي صغير معارفش تهدني أ رؤيا..

حلات الباب و الابتسامة فوجهها و هو جلس شاد الدفتر غير شافها سدو متوقعش تدخل عليه.. خبا الدفتر تحت المخدة و هي بقات تتشوف فيه.. تاجهات و جلسات حداه و شافت فعينيه..

رؤيا بتحذير: التصرف لي درتي عاد دابا مبغيتوش يتعاود..

طه خنزر فيها

رؤيا: و هاد التخنزيرة حيدها
طه: خرجي!

رؤيا قلبها تعصر من المعاملة ديالو معاها..

رؤيا: ماشي أنا لي نستاهل هاد المعاملة.. نت تتقول بلي بسبابي وقع ليك كلشي.. هادشي ماشي صحيح.. آه! عارفة شكون قتل سارة.. و آه! سكت.. و لكن ديك الساعة مكنتش عارفة راسي حاملة.. نهار عرفتها كان داز شهر.. و ديك الساعة فات الحال.. و نهار اعتارفت على راسي، كانو قالوليا بلي ولدك مات! مكان عندي تاشي أمل فالحياة.. هادشي مغاديش تفهمو دابا.. نقدر نكون غلطت حيت درت هاكاك معرفتش ديك الساعة كنت صغيرة ممكملة حتى عشرين عام.. و الحمل لي بالنسبة لأي وحدة داز فرح انا داز عندي قرح.. (عينيها تغرغرو بالدموع) تواحد مافجنبي كلهم عطاوني الظهر و تيقو بلي انا فعلا قتالة.. تاشي حد متيق البراءة ديالي من غيرها جدة الله يرحمها و يغفر ليها.. أما الكل كان متيق.. حتى من هيثم فاش عرف تيقني.. و باباك فاش عرف تيقني، و لكن ديك الساعة فاش كنت محتاجاهم مكانوش.. أنا مصحابنيش خباو على سمير شنو وقع.. ولا ظنيت بلي مو متقولش ليه بلي عيطت ليه فتيليفونو و هي جاوبات.. مقدرت حتى نقولها ليه.. شنو نقول ليه ماماك عارفة و صدعت ليها راسها بتيليفوناتي حتى قالت ليا نسايه.. (بحزن حطات يديها على راسو) أنا متندافعش على شنو درت.. حيت انك تخبي شكون مول الفعلة تيخليك مشارك فالجريمة.. و انا دفعت الثمن عشر سنين من عمري ضاع.. و خمس سنين منهم فالانفرادية، فغرفة وحدة منقدرش نخرج منها ديري فيها كلشي.. الله ينجيك أولدي من تماك!! (عنقاتو و هبطو دموعها) الله ينجيك و يخليك ليا!

باستو على راسو.. و هو يبادلها العناق بقات فيه ملي سمع من عندها هادشي كامل قلبو تزير.. خصوصا ملي تيتفكر داكشي لي عاشو مع شاذية فاش كان مختطف يعني حتى هو يستاهل الحبس.. هبطو دموعو و بدا تيبكي بالجهد و هي تتطبطب عليه..

رؤيا: متخافش! ماماك معاك دابا.. لي قرب ليك غناكلو بسناني..

بعدات عليه و مسحات ليه عينيه.. باستو فجبهتو..

رؤيا: انا هنا معاك! و لي دار ليك شي حاجة قلها ليا! نت ولدي ولد رؤيا علوان.. تاشي قو (كانت غادي تخسر الخضرة و هي تحبس) بغيت نقول تاشي حد مغادي يبعدك عليا دابا.. معتز و صفاء نساهم.. كاينة انا ماماك! و سمير باباك..
طه مسح دموعو: شكون لي قتل؟
رؤيا: شنو فالدفتر؟
طه توثر: والو!
رؤيا: حتى انا والو!

#يتبع