خبايا الزمن

الجزء 424 الى الجزء 430

خبايا الزمن 🥀
#بارت-424...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

طه غير تيشوف فيها قلبو تقبض و هبط راسو للأرض و هو فقمة الحزن لكن قرر يبعد على عائلتو باش ميآديهمش.. طلعوه لونبيلونص و بدا تيبكي.. ماشي غير هو حتى سمير لي قلبو مقصوم بين ولدو لي مشا يتعالج و حبيبة قلبو لي تتعاني قدامو.. غير تحركات لونبيلونص طلق منها و هي تمشي تابعاهم تتجري وراها بكل قوتها باش تلحق على ولدها لي شاف كلشي و غير تيبكي.. طه حاسس بذنب كبير و تيلوم راسو بلي بسبابو عائلتو تتعاني..

رؤيا تتشوف لونبيلونص تتبعد منها كثر و كثر و سرعتها قليلة بزااف مقارنة معاها حتى تهدات و طاحت فالأرض على ركابيها تتبكي بحرقة و تتغوت.. غير كلمة ولدي لي تتخرج منها..

رؤيا بحرقة: طه!!!!! ولدييييي

هاد النهار كان صعيب عليهم خصوصا رؤيا لي حسات بنفس الحاجة لمرة خرا "فقدان ابنها".. سمير حاول يبان قوي قدام رؤيا و لكن مقدرش انهار حتى هو خصوصا ملي شافها فديك الحالة لي تتصعب على اي واحد.. ولدو لي تيضيع منو و دابا غادي يعيش واحد المدة فمصحة نفسية.. هاد القرار بالضبط صعيب بزااف على اي ام و اب انو ياخدو.. تحط ولدك لي باقي صغير تماك تبقى تشوفو باذن الطبيب، الاحساس ديال ولدك، واش يقدر يعيش بعيد عليهم؟ اصلا حياتو كاملا بعيد عليهم شنو الفرق ؟ واخا هكاك مكانش عايش فمصحة نفسية، مكانش تياخذ ادوية لي قاصحة على طفل فسنو.. كان كلشي مختالف تماما.. دابا بحال والو يبقى غير ناعس ليل و نهار بمفعول الادوية لي غادي تخليه غير مهدن..

داز نهار و تبعو ايام و أيام تبعوها اسابيع و الأسابيع تبعوها شهورا و توالات الفصول حتى داز عام كامل..

عام لي وقعو فيه بزااف ديال الحوايج.. و الحمد لله عام لي ممات فيه تاشي حد.. عام لي فيه بزاف ديال عقود الزواج.. اولهم سمير و رؤيا، من مورا ما طه دخل للمصحة نفسية، قررو يديرو غير عقد زواج عند العدول بدونما يحتافلو.. بدون تاشي حاجة، علاش لي غيحتافلو ولدهم بعيد؟ كيفاش غادي يحتافلو و قلبهم مع ولدهم؟

الشهورا لولين كانو تيشوفوه غير فاش تينعس.. حتى داز ست شهور عاد ولاو تيخليوه يجلس معاهم كثر و كثر.. طه طلب منهم غير حاجة وحدة.. يجيبو ليه الشكارتو لي فيها البيسي.. بعد اذن الطبيب لباو ليه طلبو و خلاوها ليه..

اما رؤوف و صفاء علاقتهم طورات بزااف لدرجة قررو يتزوجو و فعلا دارو عقد زواج فقط بدون عرس و طنطنة..

اما هيثم و شاذية فمورا ديك النهار و علاقتهم متوثرة بزااف و لي زاد التوثر كثر هو اجتماع الطاولة..