خبايا الزمن

الجزء 1

🥀خبايا الزمن🥀
#-بارت1...
بقلم ✍🍷... Lay Lã & Sarah Sarrita
عندما التقيا.. لم يكن الزمن صالحا الحب 🥀...

سجن النساء

فواحد الحُجرة صغيرة الضلام لي طاغي عليها فقط شوية ديال الضو لي داخل من الفتحة ديال الباب.. الحيوط مقشرين، المكان بارد حدا الحيط كاين واحد السرير من الحديد قديم و مصدي محطوطة فوق منو ناموسية صغيرة بتوبها الابيض لي ولى رمادي من الوسخ والغطا المحطوط تما.. أما الريحة متقدرش تصبر عليها حيت فنفس الحجرة كاينة طواليط.. لي قديمة و ريحة ديما خارجة منها..

فالارض حدا الحيط جالسة واحد الانثى بشعرها الاشقر المخبل حوايجها لي كانو حالتهم يديها زرقين بالبرد جامعة رجليها عندها مركزة فنقطة وحدة عينيها زورق المشفرين تحت عينيها كحل بالهالات فمها بياض بالبرد رجليها ملابسة فيها والو... السكوت هو سيد المكان الحس مكاينس تما...

هازة واحد تصويرة صغيرة فيديها بقات مركزة فيها مدة وبلا متحس نزلات دمعة من عينيها... دمعة حارقة.. دمعة لي سنين وهي مكتبغيش تخرجها كاتمة مشاعرها واحاسيسها ، سرعان ماهزات يديها مسحاتها دغيا مبغاتش تشوف دموعها...! مبغاتش تضعاف..
جمعات شتات نفسها وبخطوات تقال تقدمات جهة السرير حركات الغطا باش تغطا بيه وهي يبان ليها فار داخل تحت السرير.. مدارت حتى رد فعل تخشات تحت الغطا كتحس بعضامها مجمدين من البرد بغات غير غطا سخون تغطا بيه ملقاتوش بغات دفء سنين وهي محرومة منو... غمضات عينيها بتثاقل كتحاول تقلب على الراحة لي مبقاتش كتزورها..

دازو دقائق
بدات كتقرن حواجبها غوبشات الملامح ديالها.. كتحرك راسها يمين شمال.. كلمة وحدة كتردد بين شفايفها" لاا.. لاا مماتش.. لا لا مماتش لااااا" ناضت قافزة من بلاصتها العرق كيتصبب على جبينها عينيها مدمعين كتحس بغصة فقلبها... ممتيقاش لدابا باقي ممتيقاش بلي الأمل الوحيد لي كان عندها مات..! قطعة منها ماتت فداك نهار تدفنات حياتها... شبابها.. قلبها.. احاسيسها.. احلامها.. كلشي مشا فظرف ثانية... غمضات عينيها بألم مدات يديها تحت الوسادة جبدات ديك تصويرة شافت فيها مطولة بعينين مغرغرين نطقات بهمس بين سنانها " توحشتك".

ردات ديك تصويرة لبلاصتها منين سمعات الباب كيتحل هزات عينيها فالباب بانت ليها إمرأة داخلة من الباب بلباسها لي باين ديال الحراس السجن...

الحارسة(بصوت حاد): عندك زيارة نوضي..

هي سمعاتها استغربات حيت هاد السنين كاملة عمر شي حد زارها او طمن عليها.. شكون جا عندها؟ شكون لي تفكرها مور هاد السنين كاملة؟ ابتاسمات ابتسامة مطولة لي غابت عن محياها من نهار دخلات للحبس.. يسحاب ليها نفسو الشخص لي كتسنا فيه سنين و اعوام هادي..