خبايا الزمن

الجزء 378

خبايا الزمن 🥀
#بارت-378...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

طه بقى تيشوف و دماغو خدام ماشي غير هو حتى طارق لي متأكد بلي شي حاجة ماشي حتال تم و قرر انو هو لي يلقى القاتل و هاكا غادي يقدر يصلح علاقتو برؤيا، سمير و هيثم و فنفس الوقت غادي تكون سارة مرتاحة فقبرها.. معارفش بلي رؤيا و سمير عارفين شكون القاتل و ساكتين.. و معارفش بلي حتى من هيثم عارف بلي رؤيا عارفة.. هيثم غير مع آخر الأحداث اجل انو يكتاشف شكون القاتل، اما مستحيل ينسى..

طارق: علاش عندي احساس بلي شي حدث ناقص؟

نمشيو عند معتز
كانت هند فالكرسي مكتفة و وجهها عامر بالكدمات، و الدم كارم فجبهتها.. مغمضة عينيها و بعض الأنين تيخرج منها.. أما معتز خرج من الحمام مدوش و تيشوف فيها بحقد هز واحد السطل عمرو بالما و خواه عليها حتى حلات عينيها بخوف و هي غير تتبكي..

معتز بغضب: نتي مزال مشفتي والو.. بسبابك احلامي تحطمو.. خسرت كلشي.. (خدا واحد الكرسي و جلس فيه مقابل معاها) عرفتي شنو درت باش نكون فهاد المستوى؟ عرفتي شنو عانيت باش نوصل لشنو فيه دابا؟ و مورا هادشي كااااامل نخرج بوااالو؟ كلشي يضيع مني؟ (بصوت مقهور) ماتو والديا و انا صغير تاشي حد معقل عليا.. عرفتي كيفاش ماتو؟ (علا صوتو) ماتو مقتولين.. "البيگدو" قتلوهم حيت جدي قتل اكبر واحد فعائلة "الدحماني".. خرج قرار من الطاولة بلي عائلتي كلها خاصها تموت.. كلها حتى انا.. لكن الحاج البناني وقف ضد اني نموت.. حرمني من عائلتي كلها قال ليهم بلي الولد صغير معندو ذنب و الا غلط شي نهار غادي نعاقبوه ديك الساعة و مغاديش نرحمو حتى ولادو الا عندو.. (بقى ساكت مدة تيشوف بعيد عاد نطق) كنا ثلاثة ديال الصحاب متنتفارقوش.. انا، سمير و طارق.. هما عندهم كلشي و انا معندي والو.. كانت عندي غير شفقة من عائلاتهم.. قريت و تمسكت بقرايتي، كونت راسي براسي و درت مشفى طلعتو بوحدي و بدون معاونة من تاااااشي حد.. (بحزن) ولى عندي داكشي لي تنتمناه.. من غير العائلة.. خفت نأسس عائلة مع اي وحدة و شي نهار يموت الحاج و يطبقو عليا حكم الاعدام.. (بأسى) بغيت غير نأمن راسي.. واش معنديش الحق؟ نلقى شي حل لي يخليني ناعس بدون خوف؟ بلاما نسول راسي كلا نهار واش ليوم هو اخر نهار بحياتي؟ يكما درت شي غلط لي يخلي "البيگدو" يعاقبني؟ كنت عايش غير فالخوف.. الخوف من المستقبل.. (هبطات ليه دمعة و مسحها دغية) بغيت غير نرتاح و نحط راسي على المخدة بالي هاني متنفكرش فالموت ولا الاعدام.. غير قولي ليا واش ماشي من حقي؟ (هند تتشوف قيه و هي مصدومة من شنو تتسمع معتز هبطات ليه دمعة) كانو جوج طرق.. يا ايما نتزوج برؤيا ولا نتزوج بوحدة من عائلة البناني.. حيت بجوجهم اعضاء ف"البيگدو".. هاكا غادي نكون جزء من عائلة لي هي عضو ف"البيگدو" و بالتالي مستحيل يطبقو عليا هاداك الحكم لي ولى بالنسبة ليا كابوس.. و ماشي غير هادشي غادي نكون قوي حتى الا غلطت فحق شي حد مغادي توقع ليا والو.. حيت ورايا "البيگدو" (بداو تيهبطو الدموع).. سلسبيل ولا شاذية مستحيل يشوفو فيا الشوفة.. لحقاش وحدة متتحملش عائلتها و لخرا هارب ليها غير تتقتل.. فأسهل وحدة هي صفاء.. صفاء تتقرا مكانتش فالمغرب.. و انا نحط رؤيا هي الهدف ديالي.. (بحرقة) و انا تنتقرب من رؤيا طحت فشباك الحب!! بغيت من قلبي و لكن ماشي رؤيا لي بغيت و انما سارة.. (بدا تيبكي و تيشهق) و فقدتهااااا!! (بقى مدة و هو تيبكي و تيتنخصص حتى تهد) عرفتي شنو هي تكون المسؤوووول على موت الشخص الوحييييد لي بغيتيه من قلبك؟؟ قاااسحة بزاااف( بدا تيمسح دموعو) عرفتي شنو آخر حاجة قالتها ليا؟

**فلاش باك
أحداث من الجزء 213

سارة: و نزيدك معلومة خرا لي غتزيد تصدمك و تقلل من الفرص ديالك فتحقيق الحلم ديالك.. "رؤيا حاملة من سمير و تصور الا ولدات ولد" (بسخرية) و لكن تقدر تحبسها فشي بلاصة حتى تولد و تاخد ولدها و علاش لا😊 و تزوج بصفاء حبيبة القلب و تربيوه!! ههههههه و الله حتى فكرة!!

نهاية لفلاش باك **

معتز بغضب: انا فقط طبقت الوصية ديالها!! دخلت رؤيا للحبس خديت ولدها و تزوجت بصفاء.. قلت الا درت بوصيتها غادي تكون مرتاحة فقبرها.. لكن دابا لا!! (بحزن كبير) مكنتش عارف بلي حتى هي تتبغيني!! كن عرفت بلي سارة حتى هي تتبغيني ( بقا ساكت مدة) هادا هو السر لي تاشي حد مخاصو يعرف.. مخاصهمش يعرفو بلي انا لي قتلت سارة.. مخاصهمش يعرفو بلي بسبابي رؤيا دخلات للحبس.. مخاصهمش يعرفو

#يتبع