خبايا الزمن

الجزء 373

خبايا الزمن 🥀
#بارت-373...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

رؤيا: طه! حبس
طه مخنزر فيها: علاش مبغيتيش تزوجي بيه؟ ياك تتبغيه و هو تيبغيك و انا ولدكم.. يعني حنا دابا اسرة مشتتة و الا متزوجتوش فلي تيرفض هو السباب فشتات العائلة
رؤيا بقلق: ولدي راه كاينين شي وحوايج نت مزال مفاهمهمش..
طه باقي مخنزر: يلاه هانا تنسمعك فسري ليا شنو السبب لي يخليك ترفضي؟ ياك قلتي ليا تتبغيه؟

رؤيا بقات ساكتة و هو يخرج دارت شافت فسمير بعصبية..

رؤيا: هادشي لي بغيتي؟
سمير ببرود: لا! هادشي لي نتي باغة..

نهبطو لتحت
هيثم جا للقصر باش يعزيهم و فنفس الوقت ياخد معاه رؤيا حيت متأكد بلي غادي تكون هنايا.. الناس بدات تتنعت فيه حيت عارفين شنو وقع و بلي ختو عندها ولد من سمير بدون زواج.. واش فعلا راضي على شنو دارت ختو؟ واش عندو عادي لدرجة جاي برجليه يعزي؟ جميع هاد الهضرة سمعها بودنيه و مصبر راسو بزز باش مينوضش الصداع تاجه لعندو يوسف..

يوسف: مرحبا بيك!
هيثم: جيت نعزي ناخد ختي و ولدها و غنرجع فحالي..
يوسف: معرفتش يعني سمير ناعس حيت عيان شوية طه كان مع سي عبدالعزيز جا معاه.. اما رؤيا، من البارح و هي مع سمير.. يعني مفارقاتوش ولا لحظة!

يوسف ختمها بابتسامة تيستفزو بيها.. هيثم بلع ريقو تيشوف فيه..

هيثم: مزيان! عزيت قبيلة رؤوف و لبارح شاذية باقي غير سمير

يوسف غير سمع شاذية بقى تيشوف فيه حيت كلهم مانو تيقلبو عليها..

يوسف بشك: نت فين شفتيها؟
هيثم باستفزاز: شاذية من البارح و هي معايا مفارقاتنيش ولا لحظة..

هيثم طبطب على كتاف يوسف و تاجه لدروج فاتجاه جناح سمير تلاقى مع طه..

هيثم: شنو تدير هنا ؟
طه هز كتافو: كنت مع بابا و ماما..
هيثم: و علاش مقلق؟ واش توحشتي جداتك؟
طه: آه! توحشتها.. و بزااف.. و لكن لي مقلقني هي ماما!
هيثم قبح وجهو: مالها ماماك؟
طه بحزن: مبغاتش تتزوج ببابا
هيثم بعصبية: شنو تتقول؟
طه: قلت ليها باش تزوج ببابا و
هيثم قاطعو: هادشي مستحيل يوقع غير حيدو من بالك
طه مخنزر: علاش؟
هيثم بحقد: حيت باك قليل الحيا!! و ختي معندها بلاصة حداه
طه بغضب: بابا ماشي هاكاك!! مستحيل يكون هكاك.. بابا و ماما تيبغيو بعضياتهم و غادي يتزوجو بزز منك..

طه مشا تيجري و عينيه عامرين بالدموع.. اما هيثم تعصب بزااف و صدرو تيطلع و يهبط مستحيل يخلي ختو تتزوج بسمير هادشي مستحيل يكون!! بدا تيحل الأجنحة حتى وصل لجناح سمير حل بعنف كان هو جالس على السرير و رؤيا واقفة حدا الحيط بعيدة عليه بأمتار.. فكرة انهم بحدهم ممعاهم حد جهلاتو ديال بصح لدرجة قصد سمير بعصبية و شنق عليه.. أما سمير الغضب عمى ليه عينيها دفع هيثم بالجهد و عطاه لكمة قوية تيبرد جنونو.. رؤيا غير شافتهم شهقات و تاجهات لعندهم..

هيثم مرضاش بزق الدم لي فداخل فمو و هو يهجم على سمير و بداو تيدابزو دقة فيا و دقة فيك.. رؤيا حاولات تفكهم لكن تدفعات و طاحت ناضت خرجات من الجناح بانت ليها شاذية لي سمعات الصداع و دخلات للجناح.. و حتى رجالها لي فنفس الطابق دخلو باش يفكوهم..

شاذية: سمير!! حبس..

يوسف دخل و شد سمير مزيان و حتى عبدالعزيز ملي سمع شنو وقع حبس هيثم..

عبدالعزيز: حبسو هادشي!! راكم بعقلكم.. و هادي جنازة..
سمير بغضب: هو لي تهجم عليا!!

شاذية شافت فهيثم بتخنزيرة معجبهاش الحال.. و رؤيا غير مخلوعة..

هيثم بحقد: عارفك شنو باغي دير!! (علا صوتو) ختي مغاديش توصلها مزااال واش تتفهم..
يوسف: هيثم! ختك غادي تاخد قراراتها بوحدها و هادي حياتهم تاشي حد معندو الحق يدخل و متنساش بلي بيناتهم ولد..
عبدالعزيز بجدية: يوسف عندو الحق! طه هو لي غادي يضيع بيناتهم خصوصا ملي غيكبر..
سميربغضب: رؤيا! بقا بعيد عليها.. كيفما كنتي بعيد هاد السنين كلها.. (بالغوات) عطيها بالتيساااااااع
هيثم بغضب: رؤيااااا!! ختي و مستحيل نخليك تقرب منها..

شاذية بغضب: صافي باراكة!!! حبسو هادشي..

كلشي شاف فشاذية اول مرة تغوت موالفة غير تتبتاسم و تتستفز الكل بافعالها و اقوالها..

شاذية: ليوم ماما تدفنات!! و نتوما تتدابزو؟ راعيو للجنازة..

#يتبع