خبايا الزمن

الجزء 396

خبايا الزمن 🥀
#بارت-396...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

وصل الليل،
سمير هو آخر واحد يدخل عند طارق.. كان ناعس، سمير غرغرو عينيه..

سمير: انا نسيت كلشي! نسيت بلي خبيتي عليا شنو وقع لرؤيا! انا عارف بلي حتى نت تعذبتي.. (بتوعد) مغاديش نسكت! خصوصا الا..

سمير مقدرش ينطق كلمة الموت من فمو..

سمير: نوض باقين محتاجينك! شوف والديك كيف رجعو.. شفتي ختك غادي تزوج.. محسن خطبها منك قبيلة.. نوض متخليناش ا طارق.. و طه! كونان غادي تمشي و تخليه؟

طارق هبطات ليه دمعة من عينيه.. سمير حتى هو بدا تيبكي..

سمير: نوض ا طارق الله يخليك! نوض.. حضر لعرس ختك! نوض باش تحضر لعرس خوك.. و اخيرا رؤيا وافقات تزوج بيا.. واش مباغيش تحضر؟

سمير مسح عينيه، شد فيد طارق..

سمير: طارق! كن قوي عفاك..

مع كمل الجملة ديالو صوت ديال الألات تبدل تيتسمع غير طييييييييط.. سمير تخلع و خرج يعيط للطبيب، فنفس الوقت، الممرضة مشات تتجري و تبعوها بزااف ديال الممرضات و جا طبيب معاهم.. تيتفرجو فيه من الجاجة و الطبيب تيحاول يعتقو.. صوت البكاء تعالى تماك و احساس الخوف تزاد..

كانو من اكفس اللحظات على الجميع لي تماك.. اما صفية مامات طارق فقدات الوعي ديالها حتى داوها للغرفة.. دقائق فقط و خرج عندهم الطبيب و ملامح الحزن فوجهو طه بلع ريقو ملي شاف الفرملية غطات طارق بليزار بيض.. ماشي غير هو لي شافها اغلب لي كانو ممتيقينش تيتسناو الطبيب يكدب شنو شافو لكن مع الأسف..

الطبيب: درنا كلما فيدينا! الله يرحمو..
سمير غير تيشوف ممتيقش شنو تيسمع.. اية بدات تتغوت ممتيقاش.. و محسن حضنها عندو و هي تتبكي..

اية: لاااااا! لاااا! خوووووياااااا! بغييييت خوووويا جبدو لياا خوووياااا..

اما باه، فبدا تيبكي جات عندهم لمياء لي كانت مع مها لي فقدات الوعي..

لمياء متيقة و ممتيقاش: مالكم؟ علاش تتبكيو؟ طارق قوي! غادي ينقزها.. و دابا تشوفو..
رؤيا: لمياء!
كمال بحزن: حبيبة سمعيني..
لمياء تتحرك راسها بلا: عفاك!! طارق باقي صغير.. انا كبر منو، ميمكنش مستحيل..
اية بحرقة: رااااه ماااااات ماااااات..
لمياء: اااااااااااااااه! سكتووووووووووو مماااااتش..

محسن طلق من آية و تاجه عند طه خرجو من تماك.. باش ميتأثرش.. لكن كان فات الفوت حيت فعلا تأثر كل مرة واحد أخر تيموت.. يلاه جداتو كملات ثلثيام و دابا طارق مات..

اما لفوق آية معانقة مع باها و تيبكيو لمياء هبلات بالبكا و كانت تتضرب فراسها حتى عطاوها مهدئ..

خبر موت طارق دغية انتاشر و الصحافة هجمات قدام باب المشفى باش يكونو فقلب الحدث..

فدار سارة
شاذية دقات، حل ليها هيثم بالجهالة..

هيثم بعصبية: شنو جاية ديري؟
شاذية: صاحبك مات!
هيثم بحالا صرفقاتو: وقتاش؟

شاذية مدات ليه تيليفون خداه من عندها و شاف واحد المذيعة تتعلن خبر موتو.. عطاها تيليفون و تاجه لطونوبيلتو ركب فيها و كسيرا و حتى هي تبعاتو ركبات فطونوبيلتها تابعاه..

بعد مرور اسبوع
كان اسبوع شاق بالنسبة للكل، موت طارق أثرات فالجميع من غير شاذية.. و لكن هي تأثرات بحالة هيثم.. من داك النهار هو حزين فينما تتقرب منو تيصدها.. واخا هكاك مخلاتوش ولو مرة وحدة.. جرا عليها بزااف ديال المرات.. تتبقى قدام الباب تتسنى و هو لداخل.. علاش تتصرف هاكا معرفاتش لي عارفاه هو خاصها تكون هانية و مرتاحة! و تتحس بالراحة غير معاه بغا ولا كره عمرها غادي تخليه..

طه دخل فحالة سكون، محامل يهضر مع حد، رؤيا و سمير حتى هما تأثرو.. محسن مخلاش آية وقف فجنبها فهاد المحنة.. اما لمياء هملات بنتها، غير تتبكي بزز تتاكل كان عزيز عليها طارق بزااف، هو خوها الصغير و خوها الوحيد.. ر شكون هادا لي مكانش عزيز عليه طارق الحنون لي دغسة تيدخل للخاطر.. اما والديه فكانت قاصحة عليهم خصوصا مو لي السكار غير طايح ليها! كان عزيز عليها بزااف.. هو مومو دعينيها دابا فعداد الموتى..

عبدالعزيز دخل عند رؤيا لجناحها..

عبدالعزيز: مبقاتش عاجباني حالة ديال ولدك!
رؤيا: عرفت.. حتى انا معاجبانيش.. (بدات تتبكي) خايفة نخسرو حتى هو ا خالي.. سمير تيعرف واحد الطبيب كان متبع معاه طه.. غادي يكمل معاه دابا..
عبدالعزيز: الموت علينا حق! اي حاجة من عند الله مرحبا بيها ا بنتي..
رؤيا: انا تنحس بحالا كلشي ضدي..
عبدالعزيز: ارتاحي ا بنتي حيدي هاد الأفكار من راسك..

ناض من بلاصتو.. خرج و خلاها تتبكي تكات فوق السرير معنقة المخدة.. بدا تيرن تيليفون كان محسن.. خلاتو مجاوباتش.. و كملات البكاء ديالها.. أما طه، كان فجناحو جالس فكرسي و تيخطط فواحد الورقة هادي هي الطريقة الوحيدة باش ينسى الهم.. طول الأسبوع و هو تيحل لغر كتاب الجدة.. مغادي يقراه حتى يساليه كامل.. كل نهار تيحل شوية.. بدون ميقرا ولا سطر واحد بغى حتى يسالي عاد يبدا القرايا..

#يتبع