خبايا الزمن

الجزء 380

خبايا الزمن 🥀
#بارت-380...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

معتز وصل عليهم و تاجه لعند صفاء لي شافتو و هي تبعد.. رؤوف تاجه لعندها و خنزر فيه..

رؤوف: غير الناس لي قراب من عائلتنا حاضرين نت معندكش الحق تكون هنا..
معتز بغضب: صفاء مراااتي و جيت باش نصلح شنو وقع..

يوسف تاهو تاجه لتماك باش يفك المشكيل و تبعو حتى طارق..

رؤوف: صفاء مبقات تتربطك بيها والو (باحتقار) ديگاج!!
يوسف خنزر فرؤوف و هضر: معتز رجع بليل نحلو المشكيل..
طارق: معتز شنو واقع؟
رؤوف شاف فيه: ياك نتوما صحاب قل ليه يقو**د محدي باقي مكالمي..
طارق بغضب: جا على قبل مراتو شنو غادي تجري عليه و فنهار بحال هادا..
صفاء بحزن: طارق! انا مبقيتش بغاه!! صافي سالينا..
معتز بعصبية: غير كذبات عليك راها جبتها معايا تسمعي منها كلشي و هاكي شوفي!! (مد ليها تيليفون ديال هند) راه خوك لي ضبر كلشي..

صفاء شدات منو تيليفون تتقرا فالميساجات و هي متفاجئة حيت فهمات بلي تيهددها و بلي السباب هي مفهماتهاش بلي خاصها تسكت و متهضرش على اعمالهم المشبوهة..

شاذية هزات راسها بانو ليها مجموعين و معتز تماك و هي دور عند هيثم راسو كان تيشوف فيهم و يديه مزير عليهم..

شاذية: علاش تتشوف فيهم؟ يكما ناوي دير بحال
هيثم قاطعها ببرود: انا حداك دابا! ياك هادشي لي باغة؟ و لكن غير يسالي هادشي منظمنش ليك..
شاذية مبتاسمة عاجبها يكون عنيف هاكا و تيهدد كلشي: علاش؟ شكون فيهم لي غضبك؟
هيثم بحدة: تاشي حد معندو لحق يقيسك من غيري!!
شاذية صدمها حيت صوتو كان عالي: صافي باراكة هضر بشوية واش ناوي تفضحنا؟

هيثم فضل يسكت حسن.. اما سمير شاف كلشي بعينيه و زير على يد طه بدون شعور بقوة الغضب لي حاس فيه..

طه مقبح وجهو: بابا راك ضريتيني!!

رؤيا شافت فسمير لي طلق من طه و بتاسم ليه..

سمير: سمح ليا!
رؤيا: مالك؟

سمير بقا ساكت و عينيه غير عليهم.. صفاء مشات مع معتز مبغاتش الصداع و رؤوف محملهاش تمشي معاه فتبعهم.. و يوسف و طارق رجعو بيناتهم.. لمياء تاهي جات و ناوي تحل سوء الفهم مع رؤيا.. تاجهات لعند رؤيا و سمير من بعدما خلات بنتها عند كمال..

لمياء مدات يديها لسمير: لباراكة فراسك..
سمير صافحها: ممشا مع باس..
لمياء: الله يصبرك ا خويا! (شافت رؤيا) لله يصبرك..
رؤيا: شكرا على المجية ديالك..
لمياء: حنا قراب لبعض ضروري عائلتنا تاهي تشارك..( اية كانت غير ساكتة و تتشوف فختها) رؤيا بغيت نهضر معاك..

لمياء و رؤيا مشاو لبعيد و تبعاتهم اية..

لمياء: تيقولو فالجنازة تيسالي الخصام! شنو بان ليك..
رؤيا: انا معندي تاشي حاجة ضدك ا لمياء راكي عارفة لي كاين..(خنزرات فأية) غير ختك تبعد على خويا!!
اية باحتجاج: انا وياه علاقتنا جدية و تنبغيو بعضياتنا ا رؤيا.. واش تبغي شي حد لي يقول ليك تفرقي على سمير؟؟

لمياء قرصاتها باش تسكت حتى بدات تتحك فبلاصة ديال القرصة و هي مقصحة..

رؤيا بجدية: انا لي تنعرف اي واحد ناوي المعقول تيدق الباب.. فين هو محسن؟ (دارت اشارة ليه) راهو ممسوقش ليك.. فنظري باغي غير يستغلك! و الا نتي كنتي راضية على راسك بهادشي فسوقك هداك..
لمياء: رؤيا! متكونيش بحال هيثم و ديري مع محسن داكشي لي دارو معاك.. تنظن بلي بجوج بيكم عندكم الحق تعيشو حياتكم بدون تحكم شي واحد لي كبير.. محسن طول حياتو بوحدو و ربا راسو براسو فنظرك غادي يسمع ليك و يبعد على ختي؟ الا كانت هي متعلقة فيه فراه حتى خوك متيتفرقش عليها.. و سي عبدالعزيز هضر مع بابا عليهم هادشي ايام.. يعني هو فعلا ناوي المعقول..
رؤيا غير تتشوف: مزيان! الا فعلا هادشي لي باغينو ضبر راسو غير تاشي حد ميتضرر فالأخير هما لي غادي يتزوجو ماشي انا..

لمياء عنقات رؤيا لي حتى هي بادلاتها العناق مبتاسمة و اية غير تتشوف فيهم..

اما برا المقبرة..
صفاء رؤوف و معتز وصلو للطونوبيل ديال معتز لي كانت فيها هند و باين الكدمات لي فوجهها.. رؤوف حرك راسو بلا حول عارف بلي هو لي بزز عليها تجي باش يقاد امورو مع صفاء.. و الدليل هو وجهها لي مزوق..

صفاء بعصبية: هادي شنو تدير هنا؟

#يتبع