خبايا الزمن

الجزء 406

خبايا الزمن 🥀
#بارت-406...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

فقصر البناني،
رؤوف غير تيشرب داكشي لي وقع ليه ليوم فرحو و حزنو فنفس الوقت.. حتى سمع الدقان.. بقى ساكت بدون ميعطيهم الاذن بالدخول لكن الباب تحل و صفاء دخلات قبح ملامحو و ناض لعندها..

رؤوف: شنو بغيتي؟
صفاء شافتو حزين بقى فيها: رؤوف! سمعني انا
رؤوف بحدة: خرجي! خرجي أ صفاء قبلما ندير شي حاجة مغاديش تعجبك..
صفاء بحزن: رؤوف! انا و الله ما ضدك! حاول تفهمني انا باقي مرات معتز.. مستحيل نخونو! و هادشي لي درتي على قبلي عندو معنى كبير بالنسبة ليا.. تنحلف ليك.. و لكن خاصني نطلق منو..
رؤوف غير تيشوف فيها مخنزر: خرجي! سيري عاودي ليه هو هادشي ديالك!

صفاء بقلة حيلة: يوسف خاصو يقبل على مسألة الطلاق!
رؤوف قرب منها: لا! و على هادشي لي وقع ليوم.. انا بنفسي غادي نقتلو..
صفاء بخوف: لا! مبغيتوش يموت بسبابي غير نطلقو.. عفاك! هضر مع يوسف
رؤوف: مخاصوش يبقى عايش! اعتابريه مات..

صفاء يلاه غادي تهضر و هو يسد ليها فمها بواحد القبلة و زاد جرها لعندو كثر و هي تتدفع فيه و تتضرب ليه فصدرو لكن متسوقش ليهت.. رؤوف مبقى تيشوف تاشي حاجة قدامو ولا حاس بالضربات لي تتضربو.. بقى تيقبلها بهمجية حتى تخنقات عاد بعد.. عينيها عامرين بالدموع..

صفاء: واش حماقيتي؟ شنو تدير؟ انا مزوجة!! واش تتفهمي شناهي مزوجة.. معندكش الحق تقرب ليا..
رؤوف غير تيشوف فيها: سكتي! متتعرفيش تسكتي؟ هو مات!
صفاء غير تتشوف فيه: قتلتيه؟
رؤوف: مات! دخليها لراسك.. معتز مات مبقاش عندو وجود
صفاء بدات تتبكي: بسبابي! مات بسبابي..
رؤوف طلق منها: آه! حيت خلاك تعاني، خلاك و مسولش فيه، خلاك و مشا خانك.. (بالغوات) و نتي داااااابااااا باااااقي تتفكرررري فيه..
صفاء بحرقة: مستحيل تفهمني.. انا ماشي بحالكم.. انا ماشي قتالة واش تتفهم؟؟

صفاء خرجات من عندو و هي تتبكي رؤوف هز قرعة ديال الشراب و ضربها مع الحيط..

رؤوف بحقد: غادي يموت.. و انا لي غادي نقتلو بيدي!!

فقصر عبدالعزيز
رؤيا كانت فجردة تتشرب قهوة مع محسن لي تيهضر معاها على عرسو..

محسن: الصراحة بلاش منو داك العرس..
رؤيا: هي متحمسة بزااف!
محسن: وي عرفت.. خصوصا لمياء، هي لي غادي تنظم العرس كامل عنداك غير ديرو لينا شي حاجة ماشي هي هاديك..
رؤيا خنزرات فيه: حمدالله لي لقيتي شي واحد ينوب عليك.. نت اصلا غير غابر متتحضرش گاع حتى من شنو غادي تلبس مزال مشريتيه..
محسن باستهزاء: آية و يلاه غادي تخيط الكسوة بالتصميم لي اختاريتو ليها..
رؤيا مبتاسمة: ماشي انا لي اختاريتو رانيا..
محسن بتعجب: شنو هادشي؟ ولاو دراري الصغار هما لي تيختارو؟
رؤيا: دابا انا عجبني موديل و لمياء واحد اوا وريناهم لرانيا بجوج و هي تحط يديها على تصميم لي اختارت لمياء.. (تنهدات) مكرهتش كن طارق حتى هو حضر!

محسن: حمدلله بعدا بداو تيتأقلمو مع الوضع خصوصا لالة صفية.. هي لي كلاتها ديال بصح..
رؤيا بحزن: ماشي غير هي حتى انا!

بقاو ساكتين مدة.. محسن كسر الصمت..

محسن: سمير! يعني شنو غادي ديرو مزال؟
رؤيا مخنزرة: فاش؟
محسن: عرفت بلي كاين التوثر فعلاقتك بيه.. و لكن ديري الخطوة لولة.. ماشي بالضرورة العرس و عاد الطنطنة كاملة.. تزوجو! (بطنز) تزوجو قبلما توقع حاجة خرا! راه تغمضي عينيك تحليها تلقاي طه تيتزوج و نتوما باقين و يجيو الاحفاد ديالكم يسولوكم علاش متزوجتوش؟

محسن بدا تيموت بالضحك و رؤيا غير مخنزرة فيه.. و ضرباتو لكتفو لكن والو بقى غير تيضحك..

أما فغرفة طه،
كان جالس فالبيرو ديالو تيتنفس بعمق و قدامو النصوص ديال جدة رؤيا.. مكتوبين يلاه قرر يقراهم.. بقا تيشوف مدة..

طه ببراءة: دابا الا قريت شنو غادي نستفاد؟ انا اصلا نسيت الهدف ديالي.. خاصني نلقى القاتل شكون..

تنهد فينما تيبغي يقرا داكشي تيجيه تأنيب الضمير باغي يعرف شكون لي قتل سارة.. فلخر عزم باش يقراه و يفكر فداكشي لاخر من بعد.. هز الورقة لولة..

" 15 اكتوبر
اليوم صافي تقادا ليا الصبر.. بعد تفكير طويل قررت باش نكتب و نريح افكاري.. هما نفسهم لي معذبيني هاد الأيام كلها..

من نهار ماتت بنتي و انا تنعاني.. تنحلم بيها كل نهار، تنشوفها كل يوم، داك الحادث لي وقع عمرو ميمشي من بالي.. ليلى و عبدالعزيز هما أعز ما أملك نقدر نضحي بكلشي على قبلهم..

خوفي من الكتابة هو اني خايفة يطيح الكتاب فيدين الشخص الغالط و الضعف ديالي يبان قدام الأعداء لي تيتسناو من عائلتي غير فجوة باش يهرسوها و يحطموها.. و لكن تفكرت ليلى ملي علمتها اللغة ديال الترميز و عطيتها الشيفرة و هي تتكتب بيها فواحد الكتاب.. داكشي علاش فكرت ندير بحال بنتي.. و اصلا تاشي حد مغادي يقدر يفك الشفرة.. يعني واخا يبقاو اعوام مستحيل الى معندكش الشيفرة..

أنا الكل تيشوفني قوية، و شديدة و لكن انا العكس تماما.. بحال السرطان لي قوي من برا و ضعيف من الداخل.. الكبدة صعيبة بزااف موت ليلى كان فاجعة كبيرة بالنسبة ليا، حاولت نبان قوية قدام عبدالعزيز ولا قدام احفادي.. لكن والو.. مقدرتش! و مستحيل نقدر.. طرف مني مشا!! ليلى مشااااااات.. ليلى بنتي ماااتت.. رؤيا تتشبه ليها بزااف، كل نهار تنخليها حتى تتنعس و تنقرب ليها نبكي حدا راسها نحرك يدي على شعرها المذهب.. حيت عارفة بالنهار خاصني نولي قوية قدامهم.. "

طه حط الورقة قدامو و حاسس بالذنب.. حيت قرا خصوصياتها و فهم بلي دارت الرموز فقط باش تاشي حد ميقرا شنو كتبات.. حيت هي معتاقدة اي واحد يعرف نقط الضعف ديالها غادي يآديها منو..

#يتبع