خبايا الزمن

الجزء 388

خبايا الزمن 🥀
#بارت-388...🍷
بقلمي ✍🍷... Sarah sarrita
عندما التقيا... لم يكن الزمن صالحا للحب 🥀

لكن فيناهو معتز؟ معتز فالكوميسارية من ورا داكشي لي وقع تيحققو معاه باش يشوفو الادعاءات ديال هند واش صحيحة ولا لا.. عرضوها على طبيب لي عطاها شهادة طبية و بلي الكدمات نتيجة ضرب ماشي حادث.. هند عاودات للبوليس كلشي.. جميع داكشي لي قال ليها قالتو ليهم و حتى على علاقتها بيه و كيفاش جرى عليها حرض جميع المستشفيات باش ميخدموهاش.. و فالأخير اختاطفها باغي ينتاقم حيت عاودات لصفاء كلشي..

البوليسي بحدة تيرمقو بتخنزيرات ديال البوليس: اعتارف! واش نت لي ضربتيها و علاش؟
معتز تينكر: مضربتهاش!! ممسيتهاش.. شوفو انا طبيب، و عندي السمعة ديالي علاش غادي ندير شي حاجة لي تخليني نخسرها؟؟
البوليسي: و فنظرك علاش تبلاات عليك؟
معتز بغضب: حيت جريت عليها!! المدام جاتها الغيرة و طلبات مني نجري عليها و هادشي لي درت.. و ملي ملقاتش خدمة بسبب طردها من المشفى ديالي قررات تنتاقم..
البوليسي بشك: يعني معندك تاشي علاقة بيها؟
معتز بعياء: راه شحال من مرة تنقول ليك لا؟
البوليسي: يعني مجمعاتكمش علاقة جنسية؟
معتز تعصب: علاش غادي ندير هاكا انا واحد مزوج.. و تنبغي مراتي مستحيل نخونها..
البوليسي تنهد: ماشي هادشي لي تتقول هي راه قالت بزااف ديال الحوايج لي خاصنا نشوفو واش صحاح حيت الا كانو فعلا صحاح فراه نت مشكيلة كبيرة

معتز تيحاول يهدن راسو حيت فعلا عصبو البوليسي ديال بصح كلما يعاود يسولو نفس الأسئلة بطرق مختلفة

معتز: علاش مباغينش تيقوني؟ قلت ليك لي كاين! انا مدرت والو.. واش عارفيني بعدا شكون؟ انا معتز الادريسي.. معنديش سوابق بالمرة و طبيب معروف عندي مشفى و شعبية بين الناس.. واش انا مسطي ندير شي حاجة لي تخليني نخسر كلشي؟ غير بالعقل فكر، تكون فبلاصتي مزوج بالمرا لي تتبغي و عايش حياتك هاني غادي تنكدها على راسك؟ و هانا گاع داكشي لي قالت صحيح علاش غادي نضربها؟ ياك طردتها من المشفى اوا صافي؟
البوليسي مشا معاه فالخط: و لكن باش متهضرش و تعاود لمراتك شنو وقع بيناتكم ضربتيها و هددتيها..

معتز بغضب: واش تتفكر بعقلك ولا لا؟ واش الا ضربتي شي حد غادي يسكت ؟ مني انا و جبد.. الا شي حد ضربني مستحيل نسكت ليه و غادي ندير لي كان باش نفضحو فهمها علاش انا غادي نتصرف هاكا..
البوليسي باستفزاز: و بالضبط هادشي لي دارت! طردتيها و حرشتي جميع المستشفيات باش ميخدموهاش.. و هي باش تنتاقم مشات قالتها لمراتك و خسرات ليك علاقتك بيها و نت باش ترجع ليها الصرف حيت خسرتي مراتك (باستهزاء) لي تتبغيها..شديتي هند ضربتيها و عذبتيها و بحال والو تكون گاع فكرتي تقتلها..

معتز بعصبية: واش عرفتي شنو تتقول انا مستحيل ندير هادشي.. هادو فقط افتراضات معندهم تاشي اساس من الصحة..
البوليسي بحدة: ماشي هادشي لي تيبان ليا ا دكتور!! واش كنتي غادي تقتلها؟
معتز بدا تيضحك: هههههه! لا لا نت فعلا هرب ليك.. وصلتي القتيلة..
البوليسي تقاد فالجلسة و هضر بجدية: هي عاودات لينا كلشي.. حتى داكشي لي قلتي ليها فاش كنتو فدارك..

**فلاش باك
أحداث من الجزء 378

معتز: انا فقط طبقت الوصية ديالها!! دخلت رؤيا للحبس خديت ولدها و تزوجت بصفاء.. قلت الا درت بوصيتها غادي تكون مرتاحة فقبرها.. لكن دابا لا!! (بحزن كبير) مكنتش عارف بلي حتى هي تتبغيني!! كن عرفت بلي سارة حتى هي تتبغيني ( بقا ساكت مدة) هادا هو السر لي تاشي حد مخاصو يعرف.. مخاصهمش يعرفو بلي انا لي قتلت سارة.. مخاصهمش يعرفو بلي بسبابي رؤيا دخلات للحبس.. مخاصهمش يعرفو

هند غير تتشوف فيه و هي مخلوعة ديال بصح البنت لي تيبغي و محنش فيها يعني باينة نهايتها كيفاش غادي تكون.. غادي يقتلها بأبشع الطرق..

هند: علاش قتلتي البنت لي تتبغي؟
معتز شاف فيها و ابتاسم: سارة!! سميتها سارة..
هند بخوف: سميتها زوينة..
معتز: ماشي غير سميتها.. كلشي فيها زوين! انا بغيتها من كل قلبي.. متحكمتش فراسي و قجيتها زيرت عليها بكل قوتي حتى ماتت..

نهاية لفلاش باك**

معتز غير تفكر تعصب بزااف و حاول ميبين والو، كان ناوي يقتل هند و يتهنى داكشي علاش خوى عليها قلبو لي كان عامر.. مقدرش يبقى بدون ميهضر حيت فعلا مع مرور جميع هاد الأحداث حس براسو مضغوط بالجهد صافي مبقاش قادر يتحمل، داكشي علاش عاود ليها كلشي.. باش يرتاح شوية من الأسرار الكثير لي فوق كتافو.. و لكن دابا غادي ترجع ليه بالعكس، و مقدرش يقتلها و لا غيقدر يقتلها ملي غادي يخرج حيت أنظار البوليس عليه.. و دابا هو فورطة كبيرة خاصو يخرج منها بأي ثمن..

#يتبع